OL SAM 103

Hae God i lavem yumi tumas

1 !Oltaem mi mi mas presem Hae God!

!Long olgeta laef blong mi,

mi mas presem tabu nem blong hem!

2 Mi mi mas presem hem,

mo mi no save fogetem

we hem i kaen tumas long mi.

3 Hem i stap fogivim mi,

i stap tekemaot ol sin blong mi.

Hem i stap tekemaot ol sik blong mi,

i mekem mi mi gud bakegen,

4 mo i stap lukaot gud long mi

blong mi mi no ded.

Hem i lavem mi tumas,

mo i sore tumas long mi,

nao oltaem hem i stap mekem

i gud tumas long mi.