Salmos 125

Ol man we oli stap trastem Hae God oli save stap gud

(Sing ya i blong ol man oli singsing long hem taem oli stap wokbaot blong go antap long Jerusalem* blong mekem lafet)

(Tok i go long ol man.)

1 Olgeta.

Ol man we oli stap trastem Hae God

oli olsem hil ya Saeon,*

we i no save seksek samtaem,

i no save kamaot long ples blong hem.

2 Ol hil ya raon long Jerusalem

oli stap blokemgud hem,

mo long sem fasin,

Hae God tu bambae i stap blokemgud

ol man blong hem,

i stat naoia, gogo i no save finis.

3 Yumi ol stret man,

mo ol man nogud oli no save rul longtaem

long ples blong yumi.

Sipos oli stap mekem olsem,

maet yumi tu i mekem samting nogud.

(Tok i go long Hae God.)

4 Hae God.

Plis yu mekem i gud long ol gudfala man,

we oli stap obei long ol tok blong yu.

5 Be taem yu panisim ol man nogud,

plis yu panisim olgeta tu

we oli lego ol fasin blong yu.

(Tok i go long ol man.)

Prea blong mi,

we yumi ol laen* blong Isrel,*

bambae yumi gat gudfala laef.