Salmos 19

Ol wok blong God i soemaot bigfala paoa blong hem

1 Oltaem skae i stap soemaot bigfala paoa blong God,

mo olgeta samting we oli stap long hem

oli stap soemaot ol gudgudfala wok we God i mekem.

2 Evri dei ol man oli save luk

bigfala paoa ya blong God

mo evri naet oli save luk

ol gudgudfala wok ya blong hem.

3 Skae wetem olgeta samting ya

oli no save tok,

man i no save harem voes blong olgeta,

4 ✝ 19.4: Rom 10.18 be tok blong olgeta i stap goaot

long olgeta ples long wol,

toktok blong olgeta i stap go

long evri kona blong hem.

God i mekem ples blong hem long skae.

5 San i stap girap long moning,

i kamaot olsem wan man we i jes mared

we i hapi tumas,

olsem wan jampion blong resis

we i rere blong resis blong i win.

6 Hem i stat long narasaed blong skae,

nao i gokros long narasaed blong hem.

Mo i no gat wan samting

we i save ronwe long hot blong hem.

Loa blong Hae God

(Tok i go long ol man.)

7 Loa* blong Hae God i stret gud,

mo i stap givim niufala paoa long yumi.

Ol tok we Hae God i putum,

yumi save bilif long hem,

mo i stap givim waes long olgeta

we oli no waes.

8 Ol loa we hem i stap tijim yumi long hem

oli stret,

mo olgeta we oli stap obei long ol loa ya,

oli stap harem gud.

Ol tok we hem i putum oli stret gud,

mo oli stap givim save long yumi.