Salmos 51

7 Plis yu tekemaot ol sin blong mi,

nao bambae mi mi klin.*51.7: Long Oltesteman long lanwis ya Hibru, tok long ples ya i mekem parabol long fasin we pris i folem taem hem i soemaot we man we i bin gat leprosi i klin bakegen, no man we i bin tajem dedbodi i klin bakegen. Parabol ya i min se man ya i wantem blong God i talemaot we hem i klin bakegen long olgeta sin blong hem. Yu luk Levitikas 14.1-9 mo Namba 19.16-19.

Plis yu wasem mi,

nao bambae mi waet we mi waet

i winim waet klaod.

8 Plis yu mekem mi mi harem noes blong olgeta

we oli glad oli stap singsing.

Nating we yu yu mekem ol bun blong mi

oli slak finis,

be plis yu mekem mi mi harem gud bakegen,

mi glad.

9 Plis yu ravemaot olgeta sin blong mi,

yu no moa lukluk long olgeta.

10 God,

plis yu mekem tingting blong mi

i klin olgeta.

Plis yu mekem we hat blong mi

i kam niuwan bakegen,

mo i stap strong long yu oltaem.

11 Plis yu no ronemaot mi

mi gowe long yu,

mo yu no tekemaot Tabu Spirit blong yu

i gowe long mi.*51.11: Narafala rod blong tanem tok ya i olsem. Plis yu no ronemaot mi mi gowe long yu, mo yu no tekemaot paoa blong yu i gowe long mi.

12 Plis yu mekem mi mi glad bakegen

from we yu yu sevem mi.

Plis yu mekem mi

mi wantem blong obei long yu.