OL SAM 78

Fasin blong God mo fasin blong ol man blong hem

1 Ol man blong mi.

Yufala i lesin long ol tok ya blong mi

we bambae mi tijim yufala long hem,

yufala i lesin gud long ol samting ya

we bambae mi talem.

2 ✝ 78.2: Mat 13.35 Bambae mi tijim yufala long ol parabol,

mo bambae mi talemaot mining

blong ol tokhaed ya blong bifo.

3 Hemia ol samting we yumi harem finis

mo we yumi save finis.

Ol samting ya,

ol papa blong yumi oli talem long yumi finis.

4 Hae God i gat paoa,

mo hem i stap mekem ol merikel

mo ol bigbigfala wok.

Bambae yumi no haedem ol samting ya

long ol pikinini blong yumi,

oltaem yumi mas talemaot long olgeta.