Salmos 126

प्रवाशांचे आराधना गीत.

1 जेव्हा याहवेहनी सीयोनाला पुन्हा एकवार संपन्न केले*126:1 किंवा जेव्हा इस्राएलला बंदिवासातून परत आणले,

तेव्हा आम्ही स्वप्न पाहत होतो असे वाटले.

2 आमचे मुख हास्याने भरले होते

आणि किती हर्षगीते आम्ही गाईली!

तेव्हा विधर्मी राष्ट्रे म्हणाली:

"पाहा याहवेहने त्यांच्यासाठी किती थोर कृत्ये केली आहेत."

3 याहवेहने आमच्यासाठी महान कृत्ये केलेली आहेत,

आणि आम्ही आनंदाने परिपूर्ण झालो आहोत.

4 हे याहवेह, नेगेव नदीसारखी,

आमची समृद्धी परत आम्हाला मिळू द्या*126:4 म्हणजे आमच्या बंदिवासांना परत आणा..

5 जे अश्रूंनी पेरणी करतात,

ते आनंदाने कापणी करतील.

6 जे रडत पेरणीसाठी

बी घेऊन जातात,

ते आपल्या पेंढ्या घेऊन,

आनंदाने हर्षगीते गात परत येतील.