1 अहो माझ्या लोकांनो, माझे विधिनियम ऐका;

माझ्या मुखातून निघणार्‍या वचनाकडे कान द्या.

2 मी तोंड उघडून दाखल्यांनी त्यांच्याशी बोलेन;

मी पूर्वकाळचे रहस्य; जुन्या काळातील गुप्त गोष्टी सांगेन;

3 ज्यागोष्टी आम्ही ऐकल्या आणि आम्हाला समजल्या आहे,

त्या आमच्या पूर्वजांनी आम्हाला सांगितल्या आहेत.

4 आम्ही त्या त्यांच्या वंशजांपासून गुप्त ठेवणार नाही,

आम्ही भावी पिढीच्या लोकांपुढे,

याहवेहचे गौरव करू आणि

त्यांच्या सामर्थ्याचे आणि चमत्कारांचे वर्णन करू.