1 ವಾಟೆ ಕರಲ್ಲ್ಯಾ ಆಧಾರಾ ಸಾರ್ಕೆ ಕುಳಿಯಾಂಚಿ ನಾವಾ ಹಿಚ್. ದೆಶಾಚ್ಯಾ ಉತ್ತರಾಕ್ ತವ್ಡೆಚ್ ಹಮಾತ್ ಸಿಮೆಚ್ಯಾ ಜಗ್ಗೊಳ್ ದಾನಿಕ್ ಎಕ್ ವಾಟೊ, ತೆಚಿ ದಿಸ್ ಉಗ್ತಲಿ ದಿಕ್ಕಾಚಿ ಹದ್ದ್ ಹೆತ್ಲೊನಿಚ್ಯಾ ವಾಟೆಚ್ಯಾ ಭಾಜುಕ್ನಾ ಜಾವ್ನ್, ಹಾಮಾತಿಚಿ ವಾಟ್ ದಾಟುನ್ ದಮಸ್ಕಾಚ್ಯಾ ಹದ್ದಾತ್ ರ್‍ಹಾತಲ್ಯಾ ಹಚರ್ ಎನಾನಿಯಾಚ್ಯಾಕ್ನಿ ಪಗಳ್ತಾ. ತೆಚಿ ಭಾಜುವಾ ದಿಸ್ ಉಗಾವ್ತಲ್ಯಾ ಅನಿ ದಿಸ್ ಬುಡ್ತಲ್ಯಾ ದಿಕ್ಕಾಂಚ್ಯಾ ಪತರ್ಬಿ ಪಗ್ಳುನ್ ರ್‍ಹಾತಾ. 2 ದಾನಿಚ್ಯಾ ಹದ್ದಾಚ್ಯಾ ಜಗ್ಗೊಳ್ ಹೊತ್ತ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಅಶೆರಾಕ್ ಎಕ್ ವಾಟೊ. 3 ಅಶೆರಿಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ನಪ್ತಾಲಿಕ್ ಎಕ್ ವಾಟೊ. 4 ನಪ್ತಾಲಿಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಮನಸ್ಸೆಕ್ ಎಕ್ ವಾಟೊ. 5 ಮನಸ್ಸೆಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಎಪ್ರಾಯಿಮಾಕ್ ಎಕ್ ವಾಟೊ. 6 ಎಪ್ರಾಯಿಮಾಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ರುಬೆನಿಕ್ ಎಕ್ ವಾಟೊ. 7 ರುಬೆನಿಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಜುದೆವಾಕ್ನಿ ಎಕ್ ವಾಟೊ. 8 ಜುದೆವಾಂಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ತುಮಿ ಸರ್ವೆಸ್ಪರಾಕ್ ನೆಮ್ಸುನ್ ಭೆಟ್ವುತಲೊ ಎಕ್ ವಾಟೊ ರ್‍ಹಾತಾ, ತೊ ಸಾಡೆಬಾರಾ ಹಾಜರ್ ಹಾತ್ ರುಂದಿ ಅನಿ ದಿಸ್ ಬುಡ್ತಲ್ಯಾ ದಿಕ್ಕಾಕ್ನಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಕುಳಿಯಾಕ್ನಿ ದಿಲ್ಲ್ಯಾ ವಾಟ್ಯಾಚ್ಯಾ ತವ್ಡೆಚ್ ಲಾಂಬಿ ರ್‍ಹಾವ್ನ್ ತೆಜ್ಯಾ ಮದ್ದಿ ಪವಿತ್ರ್ ಗುಡಿಚೊ ಜಾಗೊ ರ್‍ಹಾತಾ. 9 ತುಮಿ ನೆಮ್ಸುನ್ ಥವಲ್ಲ್ಯಾ ಜಿಮ್ನಿಚ್ಯಾ ಜಾಗ್ಯಾತ್ ಸರ್ವೆಸ್ಪರಾಕ್ ನೆಮ್ಸುನ್ ಭೆಟ್ವುತಲ್ಯಾ ವಾಟ್ಯಾಚೊ ಜಾಗೊ, ಸಾಡೆ ಬಾರಾ ಹಾತ್ ಲಾಂಬಿ ಅನಿ ಪಾಂಚ್ ಹಾಜಾರ್ ಹಾತ್ ರುಂದಿ ರ್‍ಹಾತಾ. 10 ನೆಮ್ಸುನ್ ಥವಲ್ಲೊ ತೊ ಪವಿತ್ರ್ ಜಾಗೊ ಯಾಜಕಾಕ್ನಿ ಸಮಂದ್ ಪಡಲ್ಲೊ ರ್‍ಹಾತಾ. ಉತ್ತರಾಕ್ ದಿಕ್ಕಾಕ್ ತೆಚಿ ಲಾಂಬಿ ಸಾಡೆ ಬಾರಾ ಹಾಜಾರ್ ಹಾತ್, ಅನಿ ದಿಸ್ ಬುಡ್ತಲ್ಯಾ ದಿಕ್ಕಾಕ್ ಪಾಂಚ್ ಹಾಜಾರ್ ಹಾತ್ ರುಂದಿ, ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ತೆಚಿ ರುಂದಿ ಪಾಂಚ್ ಹಾಜಾರ್ ಹಾತ್, ದಕ್ಷಿನ್ ದಿಕ್ಕಾಕ್ ತೆಚಿ ಲಾಂಬಿ ಸಾಡೆಬಾರಾ ಹಾಜಾರ್ ಹಾತ್, ಅನಿ ತೆಜ್ಯಾ ಮದ್ದಿ ಸರ್ವೆಸ್ಪರಾಚಿ ಪವಿತ್ರ್ ಗುಡಿ ರ್‍ಹಾತಾ. 11 ತೊ ಜಾಗೊ ಚಾದೊಕಾಚ್ಯಾ ಪಿಳ್ಗಿಚ್ಯಾ ಅನಿ ಮಾಜ್ಯಾ ಸಾಟ್ನಿ ಯೆಚುನ್ ಕಾಡಲ್ಲ್ಯಾ ಮಾಜ್ಯಾ ಗುಡಿಕ್ ಬಗುನ್ ಘೆತಲ್ಯಾ ಯಾಜಕಾಕ್ನಿ ಪಾವ್ಚೆ ಹೊಲ್ಲೆ ಹಾಯ್, ಇಜ್ರಾಯೆಲ್ ಲೊಕಾನಿ ಮಾಕಾ ಧುರ್ ಕರಲ್ಲ್ಯಾ ತನ್ನಾ ಲೆವಿನಿ ಕರಲ್ಲ್ಯಾ ಸಾರ್ಕೆ ಹೆನಿ ಕರುಕ್ನಾತ್ ನ್ಹಯ್. 12 ಲೆವಿಚ್ಯಾ ಕುಳಿಚ್ಯಾ ವಾಟ್ಯಾಚ್ಯಾ ಹದ್ದಾಚ್ಯಾ ಜಗ್ಗೊಳ್ ಹೊತ್ತೊ ತೊ ಜಾಗೊ ಅಗ್ದಿ ಪವಿತ್ರ್ ಅನಿ ದೆಸಾತ್ ಎಚುನ್ ಕಾಡಲ್ಯಾತುಚ್ ಎಚುನ್ ಕಾಡಲ್ಲೊ ಜಾಗೊ ಮಾಕಾ ಸಮಂದ್ ಪಡಲ್ಲೊ ಹೊವ್ನ್ ರ್‍ಹಾತಾ. 13 ಅನಿ ಸಾಡೆಬಾರಾ ಹಾಜಾರ್ ಹಾತ್ ಲಾಂಬಿ, ಅನಿ ಪಾಂಚ್ ಹಾಜಾರ್ ಹಾತ್ ರುಂದ್ ಎಕ್ ವಾಟೊ ಯಾಜಕಾಂಚ್ಯಾ ವಾಟ್ಯಾಚ್ಯಾ ಘಡಿಕ್ ಲಾಗುನ್ ಲೆವಿಚ್ಯಾ ಕುಳಿಚ್ಯಾ ವಾಟ್ಯಾಕ್ ಯೆತಾ. ಹ್ಯಾ ದೊನಿ ವಾಟ್ಯಾಂಚಿ ಸಗ್ಳಿ ಮೆಜ್ನಿ ಕವ್ಡಿ ಮಟ್ಲ್ಯಾರ್, ಲಾಂಬಿ ಸಾಡೆ ಬಾರಾ ಹಾಜಾರ್ ಹಾತ್, ರುಂದಿ ಧಾ ಹಜಾರ್ ಹಾತ್. 14 ತೊ ಜಾಗೊ ಸರ್ವೆಸ್ಪರಾಚ್ಯಾ ವಾಟ್ಯಾಕ್ ಕಾಡುನ್ ಥವಲ್ಲೊ ಹೊಲ್ಲ್ಯಾ ಸಾಟ್ನಿ, ತ್ಯಾತುರ್ ಖಲೊ ಭಾಗ್ ಬಿ ಇಕಾತ್ ದಿತಲೆ ನಕ್ಕೊ, ಸದ್ಲಾ ಬದ್ಲಿ ಕರ್‍ತಲೆ ನಕ್ಕೊ, ದೆಶಾಚೊ ತೊ ಬರೊ ಭಾಗ್ದುಶ್ಯಾಂಚೊ ವಾಟೊ ಹೊತಲೆ ನಕ್ಕೊ. 15 ಸಾಡೆ ಬಾರಾ ಹಾಜಾರ್ ಹಾತ್ ಲಾಂಬಿ ತ್ಯಾ ಜಾಗ್ಯಾಚ್ಯಾ ಜಗ್ಗೊಳ್, ಕಾಡುನ್ ಥವಲ್ಲ್ಯಾ ಒಟ್ಟು ಜಾಗ್ಯಾತ್ ಹುರಲ್ಲ್ಯಾ ಸಾಡೆ ದೊನ್ ಹಾಜಾರ್ ಹಾತ್ ರುಂದಿ ತ್ಯಾ ಜಾಗ್ಯಾಕ್ ಎಚುನ್ ಕಾಡುನ್ ಥವಲ್ಲೊ ನ್ಹಯ್ ಮನುನ್ ಚಿಂತುನ್, ಶಾರ್ ಮಟ್ಲ್ಯಾರ್, ಲೊಕಾಂಚ್ಯಾ ವಸ್ತಿ ರ್‍ಹಾತಲ್ಯಾ ಜಾಗ್ಯಾಕ್ ಅನಿ ಭೊತ್ಯಾನಿ ಹೊತ್ತ್ಯಾ ಜಾಗ್ಯಾಕ್ಬಿ ಎಚುನ್ ಕಾಡುನ್ ಥವ್ನ್ ಹೊವ್ಚೆ, ಶಾರ್ ತೆಜ್ಯಾ ಮದ್ದಿ ರ್‍ಹಾವ್ಚಿ. 16 ಶಾರಾಚಿ ಮಾಪ್ ಅಸೆ ರ್‍ಹಾವ್ಚೆ, ಉತ್ತರ್ ದಿಕ್ಕಾಕ್ನಾ ದೊನ್ ಹಾಜಾರ್ ದೊನ್ಸೆ ಪನ್ನಾಸ್ ಹಾತ್, ದಕ್ಷಿನ್ ದಿಕ್ಕಾಕ್ ದೊನ್ ಹಾಜಾರ್ ದೊನ್ಸೆ ಪನ್ನಾಸ್ ಹಾತ್, ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ದೊನ್ ಹಾಜಾರ್ ದೊನ್ಸೆ ಪನ್ನಾಸ್ ಹಾತ್, ದಿಸ್ ಬುಡ್ತಲ್ಯಾ ದಿಕ್ಕಾಕ್ ದೊನ್ ಹಾಜಾರ್ ದೊನ್ಸೆ ಪನ್ನಾಸ್ ಹಾತ್. 17 ಶಾರಾಕ್ ಭೊತ್ಯಾನಿ ಜಾಗೊ ರ್‍ಹಾವ್ಚೆ. ತೆಚಿ ಲಾಂಬಿ ಉತ್ತರ್ ದಿಕ್ಕಾಕ್ ಎಕ್ಸೆ ಪಂಚಿಸ್ ಹಾತ್, ದಕ್ಷಿನಾಕ್ ಎಕ್ಸೆ ಪಂಚಿಸ್ ಹಾತ್, ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಪಂಚಿಸ್ ದಿಸ್ ಬುಡ್ತಲ್ಯಾ ದಿಕ್ಕಾಕ್ ಎಕ್ಸೆ ಪಂಚಿಸ್ ಹಾತ್ ರ್‍ಹಾವ್ಚೆ. 18 ಶಾರಾಕ್ ಸೊಡುನ್ ತೆಕಾ ಸಂಮಂದ್ ಪಡಲ್ಲಿ ಹುರಲ್ಲಿ ಜಿಮ್ನಿಚೆ ಲಾಂಬಿ ಎಚುನ್ ಥವಲ್ಲ್ಯಾ ಪವಿತ್ರ್ ಜಾಗ್ಯಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ಡೆ ಪಾಂಚ್ ಹಾಜಾರ್ ಹಾತ್ ದಿಸ್ ಬುಡ್ತಲ್ಯಾ ದಿಕ್ಕಾಕ್ಡೆ ಪಾಂಚ್ ಹಾಜಾರ್ ಹಾತ್, ತಿ ಜಿಮಿನ್ ಎಚುನ್ ಥವಲ್ಲ್ಯಾ ಜಿಮ್ನಿಚ್ಯಾ ಪವಿತ್ರ್ ಜಾಗ್ಯಾ ಚ್ಯಾ ಹದ್ದಾಕ್ನಾ ಜಾತಾ, ತೆಜ್ಯಾಕ್ಡೆ ಉತ್ಪನ್ ಹೊಲ್ಲೆ ಪಿಕ್ ತ್ಯಾ ಲೊಕಾಕ್ನಿ ಜೆವ್ನಾಖಾನಾಕ್ ವಾಪ್ರುಕ್ ಹೊತಾ. 19 ತೆನಿ ಇಜ್ರಾಯೆಲಾಚ್ಯಾ ಖಲ್ಯಾ ಕುಳಿಚೆ ಹೊಲ್ಯಾರ್ಬಿ ಶಾರ್‍ಹಾತ್ ವಸ್ತಿ ರ್‍ಹಾವ್ನ್, ತಿ ಜಿಮ್ನಿತ್ ಸೆತ್ ಕರುನ್ ಖಾತಾತ್. 20 ನೆಮ್ಸುನ್ ಥವಲ್ಲ್ಯಾ ಸಗ್ಳೊ ಜಾಗೊ ಸಾಡೆ ಬಾರಾ ಹಾಜಾರ್ ಹಾತ್ ಲಾಂಬಿ ಅನಿ ಸಾಡೆ ಬಾರಾ ಹಾಜಾರ್ ಹಾತ್ ರುಂದಿ, ತಿ ನೆಮ್ಸುನ್ ಥವಲ್ಲಿ ಜಿಮಿನ್ ರಾಜಧಾನಿಕ್ ಸಮಂದ್ ಪಡಲ್ಲ್ಯಾ ಜಿಮ್ನಿ ವಾಂಗ್ಡಾ ಚವ್ಕ್ ರ್‍ಹಾವ್ಚಿ. 21 ಎಚುನ್ ಕಾಡಲ್ಲ್ಯಾ ಪವಿತ್ರ್ ಜಾಗ್ಯಾಚ್ಯಾ ಅನಿ ರಾಜಧಾನಿಕ್ ಸಮಂದ್ ಪಡಲ್ಲ್ಯಾ ಜಿಮ್ನಿಚ್ಯಾ ದೊನಿ ಭಾಜುನಿ ಹುರಲ್ಲಿ ಜಿಮಿನ್ ಮುಖಂಡಾಚೊ ವಾಟೊ ಹೊವ್ನ್ ರಾಂವ್ದಿತ್, ತೊ ವಾಟೊ ನೆಮ್ಸುನ್ ಥವಲ್ಲ್ಯಾ ಜಾಗ್ಯಾಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಸಾಡೆ ಬಾರಾ ಹಾಜಾರ್ ಹಾತ್ ಲಾಂಬ್ ಹದ್ದಾಚ್ಯಾ ಜಗ್ಗೊಳ್ ಅನಿ ದಿಸ್ ಬುಡ್ತಲ್ಯಾ ದಿಕ್ಕಾಕ್ಡೆ ಸಾಡೆ ಬಾರಾ ಹಾಜಾರ್ ಹಾತ್ ಲಾಂಬ್ ಹದ್ದಾಚ್ಯಾ ಜಗ್ಗೊಳ್ ಹರ್ ಎಕ್ ಕುಳಿಚ್ಯಾ ವಾಟ್ಯಾಚ್ಯಾ ತವ್ಡೆ ಲಾಂಬ್ ಪಗ್ಳುನ್ ರ್‍ಹಾತಾ, ತೆ ಮುಖಂಡಾಚೊ ವಾಟೊ ಹೊವ್ನ್ ಹಾಯ್, ನೆಮ್ಸುನ್ ಥವಲ್ಲೊ ಪವಿತ್ರ್ ಜಾಗೊ ಅನಿ ಪವಿತ್ರ್ ಗುಡಿ ತೆಜ್ಯಾ ದೊನಿ ಭಾಗಾಂಚ್ಯಾ ಮದ್ದಿ ರ್‍ಹಾತಾ. 22 ಮುಖಂಡಾಚ್ಯಾ ವಾಟ್ಯಾಚ್ಯಾ ದೊನಿ ಭಾಗಾಂಚ್ಯಾ ಮದ್ದಿ ಲೆವಿಯಾಂಚ್ಯಾ ವಾಟ್ಯಾಚ್ಯಾ ಘಡಿಕ್ನಾ ಶಾರಾಚಿ ಜಿಮಿನ್ ಘಡಿ ಪತರ್ ಮಟ್ಲ್ಯಾರ್ ಜುದೆವಾಂಚ್ಯಾ ಘಡಿಚ್ಯಾ ಉತ್ತರಾಕ್ನಾ ಬೆನ್ಯಾಮಿನಾಚ್ಯಾ ದಕ್ಷಿನ್ ದಿಕ್ಕಾಚ್ಯಾ ಘಡಿ ಪತರ್ ಮುಖಂಡಾಚೊ ವಾಟೊ ಪಗ್ಳುನ್ ರ್‍ಹಾತಾ.

23 ಹುರಲ್ಲ್ಯಾ ಕುಳಿಯಾಂಚ್ಯಾ ವಾಟ್ಯಾಚಿ ರಿತ್ ಮಟ್ಲ್ಯಾರ್, ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಬೆಂಜ್ಯಾಮಿನಾಚ್ಯಾ ಕುಳಿಕ್ನಿ ಎಕ್ ವಾಟೊ. 24 ಬೆನ್ಯಾಮಿನಾಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಸಿಮಿಯೊನಾಕ್ ಎಕ್ ವಾಟೊ. 25 ಸಿಮಿಯೊನಿಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಇಸ್ಸಾಕಾರಾಕ್ ಎಕ್ ವಾಟೊ. 26 ಇಸ್ಸಾಕಾರಿಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಜೆಬುಲೊನಿಕ್ ಎಕ್ ವಾಟೊ. 27 ಜೆಬುಲೊನಿಚ್ಯಾ ಹದ್ದಾಚ್ಯಾ ಜಗ್ಗೊಳ್ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ನಾ ದಿಸ್ ಬುಡ್ತಲ್ಯಾ ದಿಕ್ಕಾ ಪತರ್ ಗಾದಾಕ್ನಿ ಎಕ್ ವಾಟೊ. 28 ಗಾದ್ ಮನ್ತಲ್ಯಾಚ್ಯಾ ಕುಳಿಚ್ಯಾ ದಕ್ಷಿನ್ ದಿಕ್ಕಾಚ್ಯಾ ಘಡಿಕ್ ದೆಶಾಚಿ ಹದ್ದ್ ತಾಮಾರಿಕ್ನಾ ಸುಟುನ್ ಮೆರಿಬೊತ್ ಕಾದೆಶಿಚಿ ನ್ಹಯ್ ದಾಟುನ್ ಇಜಿಪ್ತಾಚ್ಯಾ ಫಿಡ್ಲೊ ನ್ಹಯಚ್ಯಾ ವಾಟೆನ್ ಮೊಟ್ಟ್ಯಾ ಸಮುಂದರಾಕ್ ಪಾವ್ತಾ. 29 ಹೊಚ್ ತುಮಿ ಇಜ್ರಾಯೆಲಾಚ್ಯಾ ಕುಳಿಯಾಕ್ನಿ ಸ್ವತಾಕ್ ಕರುನ್ ದಿತಲೊ ಜೊಗೊ, ವಾಟುನ್ ದಿವ್ಚೆ ಹೊಲ್ಲೊ ದೆಶಾಚೊ ಇಸಬ್ ಹೊವ್ನ್ ಹಾಯ್, ಕುಳಿಯಾಂಚೊ ವಾಟೊಬಿ ಹೊಚ್, ಅನಿ ಹೆ ಸರ್ವೆಸ್ಪರಾಚೆ ಬೊಲ್ನೆ ಹೊವ್ನ್ ಹಾಯ್.

30 ಶಾರಾಕ್ನಾ ಬಾರ್ಯ್ ಜಾತಲಿ ವಾಟ್ ಅಸಿ ರ್‍ಹಾವ್ಚಿ, ಆರಂಬಾಕ್ ಉತ್ತರ್ ದಿಕ್ಕಾಚ್ಯಾ ಲಾಂಬಿ ದೊನ್ ಹಾಜಾರ್ ದೊನ್ಸೆ ಪನ್ನಾಸ್ ಹಾತ್. 31 ಶಾರಾಚ್ಯಾ ದಾರಾಕ್ನಿ ಇಜ್ರಾಯೆಲಾಚ್ಯಾ ಕುಳಿಯಾಂಚಿ ನಾವಾ ರಾಂವ್ದಿತ್, ಉತ್ತರ್ ದಿಕ್ಕಾಕ್ ತಿನ್ ದಾರಾ, ಎಕ್ ರುಬೆನಾಚೆ ದಡ್ಪೊ, ಅನಿ ಎಕ್ ಜುದಾಚೆ ದಡ್ಪೊ ಅನಿ ಎಕ್ ಲೆವಿಚೆ ದಡ್ಪೊ. 32 ದಿಸ್ ಉಗಾವ್ತಲ್ಯಾ ದಿಕ್ಕಾಚಿ ಹದ್ದ್ ದೊನ್ ಹಾಜಾರ್ ಎಕ್ಸೆ ಹಾತ್ ಲಾಂಬ್, ಅನಿ ತ್ಯಾತುರ್ ತಿನ್ ದಾರಾ, ಎಕ್ ಜೊಸೆಪಾಚ್ಯಾ ಕುಳಿಚೊ ದಡ್ಪೊ ಅನಿ ಎಕ್ ಬೆನ್ಯಾಮಿನಾಚ್ಯಾ ಕುಳಿಚೊ ದಡ್ಪೊ ಅನಿ ಎಕ್ ದಾನ್ ಮನ್ತಲ್ಯಾಚ್ಯಾ ಕುಳಿಚೊ ದಡ್ಪೊ. 33 ದಕ್ಷಿನ್ ದಿಕ್ಕಾಚಿ ಭಾಜು, ದೊನ್ ಹಾಜಾರ್ ದೊನ್ಸೆ ಪನ್ನಾಸ್ ಹಾತ್ ಲಾಂಬ್, ತ್ಯಾತುರ್ ತಿನ್ ದಾರಾ ಎಕ್ ಸಿಮೊನಾಚ್ಯಾ ಕುಳಿಚೊ ದಡ್ಪೊ, ಅನಿ ಎಕ್ ಇಸ್ಸಾಕಾರಾಚ್ಯಾ ಕುಳಿಚೊ ದಡ್ಪೊ, ಅನಿ ಎಕ್ ಜೆಬುಲುನಾಚ್ಯಾ ಕುಳಿಚೊ ದಡ್ಪೊ. 34 ದಿಸ್ ಬುಡ್ತಲ್ಯಾ ದಿಕ್ಕಾಚಿ ಭಾಜು ದೊನ್ ಹಾಜಾರ್ ದೊನ್ಸೆ ಪನ್ನಾಸ್ ಹಾತ್ ಲಾಂಬ್, ತ್ಯಾತುರ್ ತಿನ್ ದಾರಾ, ಎಕ್ ಗಾದ್ ಮನ್ತಲ್ಯಾಚ್ಯಾ ಕುಳಿಚೊ ದಡ್ಪೊ, ಅನಿ ಎಕ್ ಅಶೆರ್ ಮನ್ತಲ್ಯಾಚ್ಯಾ ಕುಳಿಚೊ ದಡ್ಪೊ, ಅನಿ ಎಕ್ ನಪ್ತಾಲಿನಾಚೆ ದಡ್ಪೊ. 35 ಶಾರಾಚಿ ಭೊತ್ಯಾನ್ ಮಾಪ್ ನವ್ ಹಾಜಾರ್ ಹಾತ್, ತೆ ತಯಾರ್ ಕರಲ್ಲ್ಯಾಕ್ನಾ ತ್ಯಾ ಶಾರಾಚೆ ನಾವ್ ಯಾವ್ವಾ ಶಮ್ಮಾ ಮಟ್ಲ್ಯಾರ್, "ಸರ್ವೆಸ್ಪರಾಚೊ ರಾತಲೊ ಟಿಕಾನೊ" ಮನುನ್ ನಾವ್ ಹೊತಾ.