1 O Bosate, si ɔkɛ aakɛ kuɖokpo aso aba ne,

abe to aati akpakpa ku ifɔ̃ i fɔ anɔ!

2 Lɛ kumɛgɔ i ɔtɔ sɛ ɔtsuedza ndɔrɛ̃ wiriwria

fiɛ isɛ itã ndu ɔfu ne,

kumɛɔ si aso aba aatã fɔ matsirise si matsue fɔ iyere ne,

si atã nɖebi si miti mikpakpa i fɔ anɔmi ame ne!

3 Alasɔ gɔ abara afɔ̃ra wa boito bonyɔ ɔri ne,

aso aba, ne abe ɔti akpakpa i fɔ anɔmi ame ne.

4 Ta kokooko ne, kuwɛ̃ iinɔ ɔnɔ,

fiɛ iibo i kutsue kukuwɛ̃ ame,

fiɛ anɔmi kuawɛ̃ iinya Ɣaa mama ibua i fɔ iso,

nwɔ nsɛ ɔbara ara ɔtã mma nsɛ manyɔ ɔri matã wũ kanya.

5 Asɛ abuai mma nsɛ mabara isɛɛ ku isoɣɔ,

mma nsɛ masɛ ngbã lɛ asɛ abie.

Ɣɛɛ si bokɛlɛ i katɔ̃ bobara akpi ne

asɛ ana sikpã.

Si bokɛlɛ i katɔ̃ bobara nnɛ ato abie ne ato aaɖi bo.

6 Bo ɔɖuɖu ka bose lɛ ɔturi wɔ loisekele,

fiɛ ara bɔlɔlɔa wa bosɛ bobara ɔɖuɖu se lɛ akatisɛ wa loɣɛ awe.

Bo ɔɖuɖu ɔɔɣɔ lɛ iyata awe,

fiɛ bo aranyanyariã ibara ɔsore bo akpagu lɛ ɔwiri furia awe.

7 Kuwɛ̃ iisɛ ɔkparamakayi ɔtã-ɔ

ɣee ɔkpɛkpɛ̃ sɔ ɔ̃amatã-ɔ iso.

Alasɔ ɔɔkɔla fɔ katɔ̃ i bo kɔrɛ

fiɛ ɔɔtã boto bowɔ ala bo akpi iti.

8 Ɣɛɛ ne, Bosate fɔ nɖe bo Ɔse.

Bo ne bose lɛ sipɔse awe, fɔ nɖe rapɔdze,

fɔ nɖe bo pɔdze, bo ɔɖuɖu ɖe fɔ kɔrɔ̃ ame kurabarara.

9 O Bosate, daanagu bo sikpã kaɖukaɖu,

daala ɔɔnyigi bo aranyanyariã ibara ɔwi daaro.

Nyɔ bo lo, boto-ɔ i kukpa,

alasɔ bo ɔɖuɖu ne fɔ maturi boɖe.

10 Fɔ simagɛ̃siare sekelea ɔɔkpese fafuĩ ame.

Zion ana kɔraa ɔɔkpese fafuĩ ame, Yerusalem ɔɔkpese ikpakpi.

11 Bo isɔrɛyo sekelea nɛ nto ilɛnyɔ, ngbegɔ i bo mawa ɔle-ɔ

i ɔtɔ ɔɔtsuedza ne,

fiɛ bo ara nyaa ku kulɛ ɔɖuɖu ɔɔnina.

12 O Bosate ato aasɛ sɔ aibasu kuira i ara ɔɖuɖu wagbe ame?

Ato aalokanana ala ɔɔkpadzɛ̃ bo kutsue abua?