ଲକ୍ମଃନ୍କାର୍ ଡିର୍
18 ସଃଡେବଃଳ୍ ସଃବୁ ଲକ୍ ମେଗ୍ ଗଃର୍ଜାଣ୍ ଆର୍ ବିଜ୍ଲି ମାର୍ତାର୍ ଆର୍ ତୁରି ସଃବଦ୍ ଆର୍ ଦୁଆଁ ଅୟ୍ରିଲା ହର୍ବାତ୍ ଦଃକ୍ଲାୟ୍; ଆରେକ୍ ସେରି ଦଃକି ସେମଃନ୍ ଡିରିଜାୟ୍ ଦୁରିକ୍ ଟିଆ ଅୟ୍ଲାୟ୍ 19 ଆର୍ ସେମଃନ୍ ମସାକେ କୟ୍ଲାୟ୍, "ତୁୟ୍ ଅଃମିମଃନାର୍ ସଃଙ୍ଗ୍ କଃତା କଃଉ ଅଃମିମଃନ୍ ସୁଣୁନ୍ଦ୍; ମଃତର୍ ମାପୁର୍ ଅଃମାର୍ ସଃଙ୍ଗ୍ କଃତା କଃଉଅ ନାୟ୍ ନୟ୍ଲେକ୍ ଅଃମିମଃନ୍ ମଃରିଜଃଉଁନ୍ଦ୍।" 20 ସେତାକ୍ ମସା ଲକ୍ମଃନ୍କେ କୟ୍ଲା, "ଡିରା ନାୟ୍; କାୟିତାକ୍ ବଃଲେକ୍ ତୁମିମଃନ୍କେ ପରିକ୍ୟା କଃରୁକେ ଆର୍ ତୁମିମଃନ୍ ଜଃନ୍କଃରି ହାହ୍ ନଃକେରାସ୍, ତାର୍ ଡିର୍ ତୁମିମଃନାର୍ ମଃନେ ରଃୟ୍ଜାୟ୍ଦ୍ ଇତାର୍ ଗିନେ ମାପୁର୍ ଆସି ଆଚେ।" 21 ସେତାକ୍ ଲଃକ୍ମଃନ୍ ଦୁରିକେ ଟିଆ ଅୟ୍ରିଲାୟ୍; ମଃତର୍ ମସା ସେ ଅଃନ୍ଦାର୍ ଲଃଗେ ଗଃଲା, ଜୁୟ୍ତି କି ମାପୁର୍ ରିଲା।
ହୁଜା ବେଦିର୍ ନିୟମ୍
22 ଇତାର୍ହଃଚ ମାପୁର୍ ମସାକେ କୟ୍ଲା, "ତୁୟ୍ ଇସ୍ରାଏଲ୍ ଲକ୍ମଃନ୍କେ ଇ କଃତା କଃଉ, ମୁୟ୍ ସଃର୍ଗେ ହୁଣି ତୁମିମଃନାର୍ ସଃଙ୍ଗ୍ କଃତା କୟ୍ରିଲେ, ଇରି ତୁମିମଃନ୍ ନିଜେ ଦଃକି ଆଚାସ୍। 23 ଇତାର୍ଗିନେ ତୁମିମଃନ୍ ମର୍ ସଃଙ୍ଗ୍ ତୁଳ୍ନା କଃରୁକ୍, ବିନ୍ ଦେଉତାମଃନ୍ ତିଆର୍ କଃରା ନାୟ୍; ନିଜାର୍ ହାଁୟ୍ ରୁହାର୍ ଦେଉତା ଆର୍ ସନାର୍ ଦେଉତା ତିଆର୍ କଃରା ନାୟ୍। 24 ତୁମି ମର୍ ଗିନେ ଗଟେକ୍ ମାଟିର୍ ବେଦି ହିଣ୍ତା ହାଜାସ୍, ଆର୍ ସେ ବେଦି ଉହ୍ରେ ସୁସ୍ତା ହାଉଁକ୍ ତୁମାର୍ ଚେଳି ମେଣ୍ତା ଆର୍ ହସୁମଃନ୍ ହମ୍ହୁଜା ଦିଆସ୍; ମୁୟ୍ ଜୁୟି ଜୁୟି ଟାଣେ ଅଃହ୍ଣାର୍ ନାଉ ଏତୁ କଃରାୟ୍ନ୍ଦ୍, ସେ ସେ ଟାଣେ ମୁୟ୍ ତୁମାର୍ ହାକ୍ ଆସିନ୍ଦ୍ ଆର୍ ତୁମିକ୍ ଆସିର୍ବାଦ୍ କଃରିନ୍ଦ୍।
25 ଜଦି ତୁମି ମର୍ ହାଁୟ୍ ଟେଳାର୍ ବେଦି ତିଆର୍ କଃରାସ୍, ତଃବେ ଟେଳାୟ୍ କଦିକଃରି ସେରି ତିଆର୍ କଃରା ନାୟ୍; ବଃଲେକ୍ ତାର୍ ଉହ୍ରେ ତୁମି ତୁମାର୍ ଅଃତିଆର୍ ସଃଙ୍ଗ୍ କଦି କଃରାନାୟ୍, ସେରି ବିଟାଳ୍ କଃରାସ୍।
26 ଆର୍ ତୁମାର୍ ନଃଗ୍ଳା ମର୍ ବେଦି ଉହ୍ରେ ଜଃନ୍କଃରି ଦଃକା ନଃଜାୟ୍, ଇତାର୍ଗିନେ ତୁମି ହାଉଜ୍ ଦଃୟି ମର୍ ବେଦି ଉହ୍ରେ ଚଃଗା ନାୟ୍।"