1 ଏନ୍‌ସାପା ଗଟେକ୍ନେ ଇଡ଼ିଙ୍ଗ୍‌ ମାପ୍‌ରୁନେ ସାମୁଆଁ ଦର୍ସନ୍‌ନ୍ୟା ଅବ୍ରାମନେ ଡାଗ୍ରା ପାଙ୍ଗ୍‌କେ, ଏନ୍‌ ବାସଙ୍ଗ୍‌କେ, "ଅ ଅବ୍ରାମ ଆବ୍‌ଟଗେ । ନେଙ୍ଗ୍‌ ନାଁନେ ବିପଦ୍‌ବାନ୍‌ ରକ୍ୟା ଣ୍ଡିଂଏ ଆରି ଆନାକେ ମ୍ନା ପୁରୁସ୍‌କାର୍‌ ମ୍ୱିଏ ।"

2 ମାତର୍‌ ଅବ୍ରାମ ବାସଙ୍ଗ୍‌କେ, "ମାପ୍‌ରୁ ପର୍‌ମେସର୍ ଆନେଙ୍ଗ୍‌ ପୁରସ୍‌କାର୍ ବିଚେ ମେଃନି ନିମାଣ୍ଡା ଡିଙ୍ଗ୍‌ଏ ? ନିଂ ତ ଗଗିସିଆଃ ମାବାଚେ ବ୍ରୁଆ ଣ୍ଡିଂକେ । ଆତେନ୍‌ସା ଦମ୍ମେଶକନେ ନେଙ୍ଗ୍‌ନେ ମ୍ନା ସେବା ଡିଂଣ୍ଡ୍ରେ ଇଲୀୟେଜର ନେଙ୍ଗ୍‌ନେ ସମ୍ପତି ଅଦିକାର୍‌ ଡିଙ୍ଗ୍‌ଏ ।" 3 ବାରି ଅବ୍ରାମ ବାସଙ୍ଗ୍‌କେ, "ନାଁ ଆନେଙ୍ଗ୍‌ ଗଗିସିଆ ନାବିକେ ଣ୍ଡୁ । ଆତେନ୍‌ସା ନେଙ୍ଗ୍‌ ଡୁଆନେ ମୁଇଂ ଚାକର୍‌ ନେଙ୍ଗ୍‌ନେ ଗଡ଼େଅ ଡିଙ୍ଗ୍‌ଏ ।"

4 ଅଃତେନ୍‌ବେଲା ମେଁ ଆଡ଼ାତ୍ରା ମାପ୍‌ରୁନେ ଆକେନ୍ ସାମୁଆଁ ପିଙ୍ଗ୍‌ଚାଃକେ, "କେଲା ଆତେନ୍‌ ଚାକର୍‌ ନାଁନେ ଗଡ଼େଅ ଆଡିଙ୍ଗ୍ ଣ୍ଡୁ । ମାତର୍‌ ନାଁନେ ଗର୍‌ବେ ବାନ୍‌ ଜନମ୍‌ ଡିଙ୍ଗ୍‌ଏ, ମେଁ ନାନେ ସମ୍ପତିନେ ରାଜା ଡିଙ୍ଗ୍‌ଏ ।" 5 ଏନ୍‌ ଇଡ଼ିଙ୍ଗ୍‌ ପର୍‌ମେସର୍‌ ଆମେକେ ବାଏରେ ଡୁଙ୍ଗ୍‌ୱେକେ ବାରି ବାସଙ୍ଗ୍‌କେ, "ଆଡ଼ାତ୍ରା ତ୍ରିଗ୍‌ଡ୍ୟାନ୍ୟା କେଲା ବାରି ଚାଙ୍ଗ୍‌କୁଆଇଂକେ ଏଜା, ନାଁ ଜଦି ଚାଙ୍ଗ୍‌କୁଆଇଂକେ ଏଜା ନାୟାଏ ।" ବାରି ପର୍‌ମେସର୍‌ ବାସଙ୍ଗ୍‌କେ, "ନାନେ ବଂସକୁଲ୍‌ ଚାଙ୍କୁଆଇଙ୍ଗ୍‌ ରକମ୍‌ ଜାବର୍‌ ସକ୍ୟା ଡିଙ୍ଗ୍‌ଏ ।"

6 ଅବ୍ରାମ ମାପ୍‌ରୁକେ ବିସ୍‌ବାସ୍‌ ଡିଙ୍ଗ୍‌କେ, ତେସାଃ ମାପ୍‌ରୁ ଅବ୍ରାମ୍‌କେ ଦରମ୍‌ ରେମୁଆଁ ଡାଗ୍‌ଚେ ଏଜାକେ ।

7 ମାପ୍‌ରୁ ଅବ୍ରାମକେ ବାସଙ୍ଗ୍‌କେ, "ନେଙ୍ଗ୍‌ ଆତେନ୍‌ ମାପ୍‌ରୁ, ଜାଣ୍ଡେ ଆପେକେ କଲଦୀୟଇଂନେ ଊର୍‌ବାନ୍‌ ଏନ୍‌ ଦେସ୍‌ ଆନାକେ ବିଃନ୍‌ସା ଆଃତାର୍‌ଚେ ଡୁଙ୍ଗ୍‌ମ୍ପାଙ୍ଗ୍‌କେ ।"

8 ମାତର୍‌ ଅବ୍ରାମ ବାସଙ୍ଗ୍‌କେ, "ଅ ମାପ୍‌ରୁ, ନେଙ୍ଗ୍‌ନେ ମାପ୍‌ରୁ ନେଙ୍ଗ୍‌ ଜେ ଏନ୍‌ ଦେସ୍‌ନେ ଅଦିକାର୍‌ ଣ୍ଡିଙ୍ଗ୍‌ଏ, ଆତେନ୍‌ ନେଙ୍ଗ୍‌ ଡିରକମ୍‌ ମ୍ୟାଏ ?"

9 ମାପ୍‌ରୁ ଉତର୍ ବିକେ, "ନାଁ ମୁଇଂ ଞ୍ଜି ମୁଆଁନେ ବାଚି, ମୁଇଂ ଞ୍ଜି ମୁଆଁନେ ଗିମିଃ, ମୁଇଂ ଞ୍ଜି ମୁଆଁନେ ମେଣ୍ଡା, ମୁଇଂ ଉଂ କୁକୁର୍ୟାଃ ବାରି ମୁଇଂ ଙ୍ଗିର୍‌ବୁଏଃ କୁକୁର୍ୟାଃ ନେଙ୍ଗ୍‌ ଡାଗ୍ରା ଡୁଙ୍ଗ୍‌ ପାଙ୍ଗ୍‌ଲା ।" 10 ଆତ୍‌ବାନ୍‌ ମେଁ ଆତେନ୍‌ ସାପା ପର୍‌ମେସର୍‌ନେ ଡାଗ୍ରା ଡୁଙ୍ଗ୍‌ପାଙ୍ଗ୍‌ଚେ ମ୍ୱାର୍‌ ଗନ୍ଦା ଆଡିଙ୍ଗ୍‌ଚେ, ମୁଇଂ ଗନ୍ଦା ସେନୁଗ୍‌ ବିନ୍‌ନେ ଗନ୍ଦା ବକେ, ମାତର୍‌ ପ୍ଲିଗ୍‌ଇଂକେ ମ୍ୱାର୍ ଗନ୍ଦା ଆଡିଙ୍ଗ୍‌କେ ଣ୍ଡୁ । 11 ଏନ୍‌ ଇଡ଼ିଙ୍ଗ୍‌ ମ୍ନାଃ ପ୍ଲିଗ୍‌ଇଂ ଆତେନ୍‌ ଗୁଏଃକ୍ନେ ମଡ଼ା ଆଡ଼ାତ୍ରା କଲା, ଅବ୍ରାମ ଆମେଇଂକେ ନୁଆଁ ବିଃକେ ।

12 ଉଡ଼ିବେଲା ସ୍ନି ଲଗ୍‌ଡିଂକ୍ନେ ବେଲା ଅବ୍ରାମ ଜାବର୍‌ ଲେମୁଆଃ ପାଙ୍ଗ୍‌ଲା ଡୁଲେଗ୍‌ ବିକେ, ବାରି ଉଲୁସ୍‌ତେ ମେଁନେ ଆଡ଼ାତ୍ରା ମୁଇଂ ବୟାଙ୍କାର୍‌ ତାଙ୍ଗ୍‌କିଗ୍‌ ପାଙ୍ଗ୍‌ଲା ମେଁ ବୁଟମେଗ୍‌କେ । 13 ଆତେନ୍‌ ବେଲା ମେଁ ଅବ୍ରାମକେ ବାସଙ୍ଗ୍‌କେ, "ନାଁନେ ଗଗିସିଆଇଂ ଚାଲିସ୍‌ ମୁଆଁ‌ ବିଦେସ୍‌ ଲେଃଆର୍‌ଏ । ଚାକର୍‌ ରକମ୍‌ ଡିଙ୍ଗ୍‌ଚେ କସ୍ଟ ବାଆର୍‌ଏ । ଏନ୍‌ ଡିଲାଡିଗ୍‌ ନାମ୍ୟାଏ । 14 ମାତର୍‌ ମେଇଂ ଆଣ୍ଡିନେ ଦେସ୍‌ନେ ରେମୁଆଁଇଂନେ ଚାକର୍‌ ଡିଙ୍ଗ୍‌ଚେ ଲେଃଆର୍‌ଏ, ନେଙ୍ଗ୍‌ ଆମେଇଂକେ ବିଚାର୍‌ ଣ୍ଡିଙ୍ଗ୍‌ଏ । ଏନ୍‌ ଇଡ଼ିଙ୍ଗ୍‌ ମେଇଂ ଜାବର୍‌ ଦନ୍‌ ଏତେ ଆତେନ୍‌ ଦେସ୍‌ବାନ୍‌ ତାର୍‌ଆର୍‌ଏ । 15 ମାତର୍‌ ନାଁ ସାନ୍ତିରେ ନିଜର୍‌ ଅସେନେ ନ୍ତାଞ୍ଜାଇଂନେ ଡାଗ୍ରା ନାୱେଏ ବାରି ଆନାକେ ଜାବର୍‌ ଡକ୍ରା ବୟସ୍‌ରେ ରାଚ୍ୟାନ୍ୟା ଆତିଆର୍‌ଏ । 16 ବାରି ଏନ୍‌ ଦେସ୍‌ନ୍ୟା ନାଁନେ ବଂସନ୍ୟା ଅଁ ରେମୁଆଁ ପାଙ୍ଗ୍‌ଏ । ଡାଗ୍ଲା ଆଣ୍ଡିନେ ଇମୋରୀୟଇଂ ଆକ୍‌ଅରିଆ ବାସା ଲେଃଆର୍‌ଗେ, ମେଇଂନେ ପାପ୍‌ ଏଃ ଜାକ ଆଡାକେ ଣ୍ଡୁ ।"

17 ସ୍ନି ଲଗ୍‌କ୍ନେ ଇଡ଼ିଙ୍ଗ୍‌, ଉଡ଼ିବେଲା ଏନ୍‌ ଜାବର୍‌ ତାଙ୍ଗ୍‌କିଗ୍‌ ଡିଙ୍ଗ୍‌କେ, ମୁଇଂ ମାଃସ ତାର୍‌ମ୍ୟାକ୍ନେ ତୁରୁକ୍‌ସ ବାରି ଡୁଆମ୍ୟାକ୍ନେ ସୁଆ ଉଲୁସ୍‌ତେ ତ୍ନାକେ ବାରି ଆତେନ୍‌ ପସୁଇଂନେ ମ୍ୱାର୍‌ ବାଗ୍‌ ମଜେ ବିଃଚେ ୱେକେ । 18 ଆତେନ୍‌ ଦିନ୍‌ ମାପ୍‌ରୁ ଅବ୍ରାମନେ ଏତେ ମୁଇଂ ନିଅମ୍‌ ତିଆର୍‌ ଡିଙ୍ଗ୍‌ଚେ ବାସଙ୍ଗ୍‌କେ, "ନେଙ୍ଗ୍‌ ଏନ୍‌ ମିସର୍‌ନେ ଲଣ୍ଡିଆବାନ୍‌ ମ୍ନା ଲଣ୍ଡିଆ ଫରାତ୍‌ ମ୍ନିକ୍ନେ ମ୍ନାଃ ଲଣ୍ଡିଆଃ ଜାକ ଏନ୍‌ ଦେସ୍‌ ନାଁନେ ବଂସକେ ନେଙ୍ଗ୍‌ ମ୍ୱିଗେ । 19 ଆକେନ୍‌ ଏଃତେ କେନୀୟଇଂନେ, କନକୀୟଇଂନେ ବାରି କଦ୍‌ମୋନୀୟଇଂନେ, 20 ହିତ୍ତୀୟଇଂନେ, ପରିଷୀୟଇଂନେ ବାରି ରଫାୟୀୟଇଂନେ, 21 ଇମୋରୀୟଇଂନେ, କିଣାନୀୟଇଂନେ, ବାରି ଗିର୍ଗାଶୀୟଇଂନେ ବାରି ଯିବୂଷୀୟଇଂନେ ଦେସ୍‌ ଡିଗ୍‌ ମ୍ୱିକେ ।"