ଆଦି 29

ଯାକୁବ୍‌ ଲାବନ୍‌ନେ ଡୁଆ ୱେଚାକେ

1 ଏନ୍‌ଇଡ଼ିଙ୍ଗ୍‌ ଯାକୁବ ଅଲେଙ୍ଗ୍‌ନେ ମୁଲେକେ, ମେଁ ପୁର୍ବ ଦିଗ୍‌ନେ ଦେସ୍‌ପାକା ୱେକେ । 2 ଯାକୁବ କେକେ, ଲିଜଅରିଆ ମୁଇଂ କୁଇଁସାଲ୍‌ ଲେଃଗେ । ଆତ୍‌ଡାଗ୍ରା ଞ୍ଜି ମାନ୍ଦା ମେଣ୍ଡା ଡୁଲେଗ୍‌ ଲେଃଗେ । ଡାଗ୍ଲା ରେମୁଆଁଇଂ ମେଣ୍ଡା ରାସିକେ ଆତେନ୍‌ କୁଇଁସାଲ୍‌ନେ ଣ୍ଡିଆ ଆଉଗ୍‌ଆର୍‌ଏ । ଆତେନ୍‌ କୁଇଁସାଲ୍‌ ସାର୍‌ମୁଆଃନ୍ୟା ମୁଇଂ ମ୍ନା ବ୍ରି ଡାବଆର୍କେ । 3 ଆତେନ୍‌ କୁଇଁସାଲ୍‌ ଡାଗ୍ରା ସାପା ମେଣ୍ଡା ମାନ୍ଦା ମୁଇଂଡାଗ୍ରା ଡିଙ୍ଗ୍‌ଆର୍‌ଏ, ବାରି ରେମୁଆଁଇଂ କୁଇଁସାଲ୍‌ନ୍ୟା ଡାବକ୍ନେ ବ୍ରି ଗୁଚେଚେ ମେଣ୍ଡାଇଂକେ ଣ୍ଡିଆ ଆଉଗ୍‌ଆର୍‌ଏ । ବାର୍‌ମୁଇଂତର୍‌ କୁଇଁସାଲ୍‌ ସାର୍‌ମୁଆଁ ଡିରକମ୍‌ ଲେଃକ୍ନେ ଦେତ୍‌ରକମ୍‌ ବ୍ରି ଡାବି ଆର୍‌ଏ ।

4 ଯାକୁବ ଆମେଇଂକେ ସାଲିଆକୁକେ, "ଅ ବୟାଁଇଂ ପେଇଂ ଆଣ୍ଡିନେ ରେମୁଆଁ ? ମେଇଂ ବାସଙ୍ଗ୍‌ଆର୍‌କେ, ନେ ହାରୋଣ ଇନିନେ ରେମୁଆଁ ।"

5 ତେଲା ଯାକୁବ ବାସଙ୍ଗ୍‌କେ, "ପେଇଂ ନାହୋରନେ ଏଗ୍‌ଲେ ଲାବନକେ ମ୍ୟାଃପେଲେକେ ?" ମେଇଂ ବାଲିର୍‌ଆର୍କେ, "ନେ ଆମେକେ ମ୍ୟାଃନେଲେକେ ।"

6 ଯାକୁବ ଆମେଇଂକେ ସାଲିଆକୁକେ, "ମେଁ ଡିରକମ୍‌ ଲେଃଗେ ।" ମେଇଂ ବାଲିର୍‌ଆର୍କେ, "ମେଁ ନିମାଣ୍ଡାଃ ଲେଃଗେ । କେଲା, ମେଁନେ ସେଲାମ୍ବଃଅ ରାହେଲ ମେଇଂନେ ମେଣ୍ଡା ମାନ୍ଦା ଏଃତେ ପାଙ୍ଗ୍‌ଡିଂକେ ।"

7 ଯାକୁବ ବାସଙ୍ଗ୍‌କେ, "କେଲାପା, ଏବେ ଗୁଲୁଏ ସ୍ନି ଲେଃକେ । ମେଣ୍ଡା ମାନ୍ଦା ମୁଇଂଡାଗ୍ରା ଉଃଡ଼ିବେଲା ଙ୍କାରେ ଡିଙ୍ଗ୍‌ । ପେଇଂ ମେଣ୍ଡାଇଂକେ ଣ୍ଡିଆ ଆଉଗ୍‌ଚେ ବାରି ମୁଇଂତର୍‌ ତୁର୍‌ତ୍ୟା ନ୍‌ସା ରାଙ୍ଗ୍‌ୱେଲାପା ।"

8 ଡାଗ୍ଲା ମେଇଂ ବାଲିର୍‌ଆର୍କେ, "ଉଡ଼ିପର୍‌ ଜାକ ମେଣ୍ଡା ମାନ୍ଦା ମୁଇଂଅରିଆ ଆଡିଙ୍ଗ୍‌ଆର୍‌, ଅତେନ୍‌ପର୍‌ ଜାକ ନେ ଉର୍‌ ନେୟା ଣ୍ଡୁ । ସାପା ମୁଇଂଅରିଆ ଡିଙ୍ଗ୍‌କ୍ନେ ଇଡ଼ିଙ୍ଗ୍‌ କୁଇଁସାଲ୍‌ ଡାବକ୍ନେ ବ୍ରି ନେରଃଏ, ବାରି ଣ୍ଡିଆ ନେରାଉଗ୍‌ଏ ।"

9 ଉଡ଼ିବେଲା ଯାକୁବ ମେଣ୍ଡା ତୁର୍‌ତ୍ୟାରେ ଏତେ ବାଲିର୍‌ବାତା ଡିଙ୍ଗ୍‌ଡିଂକେ, ଆତେନ୍‌ ବେଲା ରାହେଲ ମେଁନେ ଆବାଡ଼େନେ ମେଣ୍ଡା ମାନ୍ଦା ଏତେ ପିଙ୍ଗ୍‌ଚାଆର୍‌କେ । ନିଜର୍‌ ଆବାନେ ମେଣ୍ଡାଇଂ ଜତନ୍‌ ଡିଙ୍ଗ୍‌ନେ ରାହେଲନେ କାମ୍‌ ଲେଃଗେ । 10 ରାହେଲ ଲେଃଗେ ଲାବନନେ ଗଡ଼େଅ । ଲାବନ ଲେଃଗେ ଯାକୁବନେ ଇୟାଙ୍ଗ୍‌ ରିବିକାନେ ବୟାଁ । ଯାକୁବ ଆତେନ୍‌ ବେଲା ମାତୁଲ ଲାବନନେ ସେଲା ମେଣ୍ଡା ଏତେ ରାହେଲକେ କେକେ, ମେଁ ୱେଚେ ବ୍ରି ଗୁଚେକେ ବାରି ମେଁନେ ମେଣ୍ଡାଇଂ ଣ୍ଡିଆ ଆଃଉଗ୍‌କେ । 11 ଏନ୍‌ ଇଡ଼ିଙ୍ଗ୍‌ ଯାକୁବ ରାହେଲକେ ବଏନ୍ତାକେ ଆରି ଜାବର୍‌ ସାରଚେ ଅଃନେ ମୁଲେକେ । 12 ଯାକୁବ ରାହେଲକେ ବାସଙ୍ଗ୍‌କେ, "ନେଙ୍ଗ୍‌ ଡିଙ୍ଗ୍‌ଣ୍ଡିଂକେ ରିବିକାନେ ଉଂଡେ ।" ତେସା ରାହେଲ ଡୁଆ ୱିର୍‌ ରାଙ୍ଗ୍‌ୱେଚେ ମେଁନେ ଆବାକେ ବାଲିର୍‌କେ, 13 ଲାବନ ମେଁନେ ତନାନେ ବିସଏରେ ସାପା ଅଁକେ । ତେସା ଲାବନ ଆମେକେ କେନ୍‌ସା ୱିର୍‌ ରାଙ୍ଗ୍‌ୱେକେ, ଲାବନ ଆମେକେ କଣ୍ଡକେ ବାରି ବଏନ୍ତାକେ । ବାରି ଆମେକେ ମେଁନେ ଏତେ ମେଁନେ ଡୁଆ ଡୁଙ୍ଗ୍‌ପାଙ୍ଗ୍‌କେ ଆରି ଯାକୁବ ଲାବନକେ ସାପା କିଚି ବାସଙ୍ଗ୍‌କେ । 14 ଏନ୍‌ ଇଡ଼ିଙ୍ଗ୍‌ ଲାବନ ବାସଙ୍ଗ୍‌କେ, "ନାଁ ଡିଲାଡିଗ୍‌ ନିଂନେ ମ୍‌ମ୍ୟାଁ ଆରି ଚିଲି ରକମ୍‌ । ତେସାଃ ଯାକୁବ ମେଁନେ ଡୁଆ ମୁଇଂ ଆର୍କେ ଜାକ ବାସାକେ ।"

ଯାକୁବ ଲାବନ ଆରି ରାହେଲ୍‌କେ ବିଏ ବିଃକେ

15 ମେଃସୁଆ ଲାବନ ଯାକୁବକେ ବାସଙ୍ଗ୍‌କେ, "ନାଁ ନେଙ୍ଗ୍‌ନେ କୁଟୁମ୍‌ ଡାଗ୍‌ଚେ ବିନା ଆଜ୍‌ରିନ୍ନିଆ ନେଙ୍ଗ୍‌ନେ ଚାକର୍‌ କାମ୍‌ ନାଡିଙ୍ଗ୍‌ଏ ? ଏଲେ ଡିଗ୍‌ ଆଜ୍‌ରି ରାଙ୍ଗ୍‌ନାୱେଏ ? ଆତେନ୍‌ ବାସଙ୍ଗ୍‌ ।" 16 ଲାବନନେ ମ୍ୱାକ୍ଲିଗ୍‌ ସେଲାମ୍ବୁଏଃଅ ଲେଃଗେ । ମ୍ନା ସେଲାମ୍ବଃଅନେ ମ୍ନି ଲେୟା ବାରି ଡାଆଁ ସେଲାମ୍ବଃଅନେ ମ୍ନି ରାହେଲ । 17 ଲେୟାନେ ମ୍‌ମୁଁଆଃ ସୁନ୍ଦର୍‌ ତ୍ନାଡିଂଗେ, ମାତର୍‌ ରାହେଲ ଜାବର୍‌ ସୁନ୍ଦର୍‌ ବାରି ରୁପ୍‌ବତି ଲେଃଗେ ।

18 ଯାକୁବ ରାହେଲକେ ଆଲାଦ୍‌ ଡିଙ୍ଗ୍‌କେ । ଯାକୁବ ଲାବନକେ ବାସଙ୍ଗ୍‌କେ, "ନେଙ୍ଗ୍‌ ନାଁ ନ୍‌ସା ଗୁ ମୁଆଁ ଚାକର୍‌ କାମ୍‌ ଣ୍ଡିଙ୍ଗ୍‌ଏ, ଜଦି ନାଁ ଆନେଙ୍ଗ୍‌ ନାଁନେ ଡାଆଁ ସେଲାମ୍ବଃଅ ରାହେଲ ଏତେ ବିବା ଆଡିଙ୍ଗ୍‌ ନାବିଃଏ ।"

19 ଲାବନ ବାସଙ୍ଗ୍‌କେ, "ବିନ୍‌ଣ୍ଡ୍ରେକେ ବିଃନେ ବାଦୁଲ୍‌ ମେଁ ଆନାକେ ବିବା ଡିଙ୍ଗ୍‌ଲା, ଡିଲାଡିଗ୍‌ ବଲ୍‌ ଡିଙ୍ଗ୍‌ଏ; ତେସା ନାଁ ନେଙ୍ଗ୍‌ ଏତେ ଲାଲା ।" 20 ତେସା ଯାକୁବ ମେଁନେ ଏତେ ଆତ୍‌ଅରିଆ ଗୁ ମୁଆଁ ଲେଃଚେ ଚାକର୍‌ କାମ୍‌ ଡିଙ୍ଗ୍‌କେ । ମାତର୍‌ ଆକାନ୍‌ ଆମେକେ ମାତର୍‌ ଗଣ୍ଡା ଦିନ୍‌ ଜାନା ପଡ଼େକେ; ଡାଗ୍ଲା ମେଁ ରାହେଲକେ ଜାବର୍‌ ଆଲାଦ୍‌ ଡିଙ୍ଗ୍‌ଡିଂଗେ ।

21 ଗୁ ମୁଆଁ ଇଡ଼ିଙ୍ଗ୍‌ ଯାକୁବ ଲାବନକେ ବାସଙ୍ଗ୍‌କେ, "ଆନେଙ୍ଗ୍‌ ରାହେଲକେ ବିଲା, ନେଙ୍ଗ୍‌ ଆମେକେ ବିବା ଣ୍ଡିଙ୍ଗ୍‌ଏ । ନାଁ ନ୍‌ସା ନେଙ୍ଗ୍‌ନେ ଚାକର୍‌ କାମ୍‌ ଡିଙ୍ଗ୍‌ନେ ଡାୱେଗେ ।" 22 ତେସା ଲାବନ ଆତ୍‌ ଡାଗ୍ରାନେ ସାପା ରେମୁଆଁକେ ମୁଇଂଅରିଆ ଆଡିଙ୍ଗ୍‌ଚେ ବଜି ବିକେ । 23 ଆତେନ୍‌ ଦିନା ମିଡିଗ୍‌ ଲାବନ ନିଜର୍‌ ସେଲା ଲେୟାକେ ଯାକୁବ ଡାଗ୍ରା ରାଙ୍ଗ୍‌ପାଙ୍ଗ୍‌କେ । ଆରି ଯାକୁବ ବାରି ଲେୟା ମ୍ୱାୟା ଡୁଲେଗ୍‌ଆର୍କେ । 24 ବାରି ଲାବନ ନିଜର୍‌ ସେଲା ଲେୟାନେ ଦାସି ଡିଙ୍ଗ୍‌ ନ୍‌ସା ସିଲ୍‌ପା ମ୍ନିକ୍ନେ ନିଜର୍‌ ଦାସିକେ ବିକେ । 25 ମାତର୍ ତାରାଃଲା, କେଲା, ମେଁ ତ ଲେୟା ! ତେସାଃ ଯାକୁବ ଲାବନକେ ବାସଙ୍ଗ୍‌କେ, "ନା ନେଙ୍ଗ୍ ଏଃତେ ଏନ୍ ମେଃ ବେବଆର୍ ନାଡିଂକେ ? ନେଙ୍ଗ୍ ମେଃନେ ରାହେଲ୍ ନ୍‌ସାଃ ନାନେ ଚାକର୍‌ କାମ୍ ନ୍ନାଡିଂକେ; ତେଲା ମେଃନ୍‌ସାଃ ଆନିଂକେ ନାନାଲେକେ ?"

26 ଲାବନ ବାସଙ୍ଗ୍‌କେ, "ନେ ଦେସ୍‌ନ୍ୟା ନିଅମ୍‌ ଲେଃକେ ଜେ ମ୍ନାରେ ଲେଃ ଲେଃଚେ ଡାଆଁରେକେ ବିଏ ବିଃନେ ବଲ୍‌ ଣ୍ଡୁ । 27 ମାତର୍‌ ନାଁ ଆକ୍‌ଡାଗ୍ରା ବିବା ମୁଇଂ ସାନ୍ତା ସାଚେ ପାଲନ୍‌ ଡିଙ୍ଗ୍‌, ଏନ୍‌ ଇଡ଼ିଙ୍ଗ୍‌ ନେଙ୍ଗ୍‌ ଆନାକେ ରାହେଲ ଏତେ ବିବା ଆଡିଙ୍ଗ୍‌ ମ୍ୱିଏ । ମାତର୍‌ ଆନାକେ ନେଙ୍ଗ୍‌ ନ୍‌ସା ବାରି ଗୁ ମୁଆଁ ଚାକର୍‌ କାମ୍‌ ଡିଙ୍ଗ୍‌ନେ ପଡ଼େଏ ।"

28 ଆତ୍‌ବା ଯାକୁବ ଦେତ୍‌ରକମ୍‌ ମେଁନେ ସାନ୍ତା ବର୍ତି ଆଡିଙ୍ଗ୍‌କେ । ଆତ୍‌ଅରିଆ ଲାବନ ମେଁନେ ଏତେ ନିଜର୍‌ ସେଲା ରାହେଲକେ ବିବା ଆଡିଙ୍ଗ୍‌ ବିକେ । 29 ବାରି ରାହେଲନେ ଦାସି ଡିଙ୍ଗ୍‌ ନ୍‌ସା ମେଁ ନିଜର୍‌ ବିଲହା ମ୍ନିକ୍ନେ ଦାସିକେ ବିକେ । 30 ତେସା ଯାକୁବ ରାହେଲ ଏତେ ଡୁଲେଗ୍‌କେ, ବାରି ଯାକୁବ ଲେୟା ବାଟା ରାହେଲକେ ଜାବର୍‌ ବଲ୍‌ ବାକେ । ଯାକୁବ ଲାବନ ନ୍‌ସା ବାରି ଗୁ ମୁଆଁ ଚାକର୍‌ କାମ୍‌ ଡିଙ୍ଗ୍‌କେ ।

ଯାକୁବନେ ଗଡ଼େଇଂ

31 ଆରି ମାପ୍‌ରୁ ଲେୟାନେ ଅପ୍‌ମାନ୍‌ କେଚେ ଆମେକେ ଗାଗ୍‌ଡ଼େ ସାଃନେ ବପୁ ବିକେ, ମାତର୍‌ ରାହେଲ ବାଞ୍ଜି ଡିଙ୍ଗ୍‌କେ । 32 ଲେୟା ମୁଇଂ ଙ୍ଗିର୍‌ମ୍ବଃଅ ଜନମ୍‌ ବିକେ । ମେଁ ମେଁନେ ମ୍ନି ରୁବେନ୍‌ ବିକେ । ଲେୟା ମେଁନେ ଦେକ୍‌ରକମ୍‌‍ ମ୍ନି ବିକେ, ଡାଗ୍ଲା ମେଁ ବାସଙ୍ଗ୍‌କେ, "ମାପ୍‌ରୁ ନେଙ୍ଗ୍‌ ଦୁକ୍‌ କେଲେଃକେ । ଏବେ ନେଙ୍ଗ୍‌ନେ ଆଣ୍ଡା ଆନେଙ୍ଗ୍‌ ବଲ୍‌ ବାଏ ।" 33 ଲେୟା ବାର୍‌ମୁଇଂତର୍‌ ଗାଗ୍‌ଡ଼େଚେ ବାର୍‌ମୁଇଂ ଗଡ଼େଅ ଜନମ୍‌ ବିକେ । ମେଁ ମେଁନେ ମ୍ନି ବିକେ ଶିମୀୟୋନ, ମେଁ ଅଁ ୟାକେ । ଲେୟା ବାସଙ୍ଗ୍‌କେ, "ମାପ୍‌ରୁ ଅଁକେ ଜେ ନେଙ୍ଗ୍‌ନେ ଆଣ୍ଡା ଆନେଙ୍ଗ୍‌ ଇଙ୍ଗ୍‌ଚେ ମ୍ୟାକେ । ତେସା ମେଁ ନେଙ୍ଗ୍‌ନେ ବୁଲୁନ୍ୟା ଏନ୍‌ ଗଡ଼େଇଂ ବିବକେ ।" 34 ଲେୟା ବାରି ଗାଗ୍‌ଡ଼େଚେ ବାର୍‌ମୁଇଂ ଗଡ଼େଅ ଜନମ୍‌ ବିକେ । ମେଁ ଆତେନ୍‌ ଗଡ଼େଅନେ ମ୍ନି ବିକେ ଲେବୀ । ଲେୟା ବାସଙ୍ଗ୍‌କେ, "ଏବେ ନେଙ୍ଗ୍‌ ଆଣ୍ଡା ଆନେଙ୍ଗ୍‌ ନେଙ୍ଗ୍‌ ଡାଗ୍ରା ଆସାଇ ଡିଙ୍ଗ୍‌ଏ । ଡାଗ୍ଲା ଆମେକେ ଞ୍ଜିକ୍ଲିଗ୍‌ ଗଡ଼େଅ ବିମ୍ୱକେ ।" 35 ଏନ୍‌ ଇଡ଼ିଙ୍ଗ୍‌ ଲେୟା ବାର୍‌ମୁଇଂ ଗଡ଼େଅ ଜନମ୍‌ ବିକେ । ମେଁ ମେଁନେ ମ୍ନି ବିକେ ଯିହୁଦା, ମେଁ ବାସଙ୍ଗ୍‌କେ, "ଏବେ ନେଙ୍ଗ୍‌ ମାପ୍‌ରୁନେ ପ୍ରସଂସା ଣ୍ଡିଙ୍ଗ୍‌ଏ ।" ଏନ୍‌ ଇଡ଼ିଙ୍ଗ୍‌ ଲେୟା ଗଡ଼େଅ ଜନମ୍‌ ଆଡିଙ୍ଗ୍‌ନେ ବନ୍ଦ୍‌ ଆଡିଙ୍ଗ୍‌ ବିକେ ।