Gênesis 6

Wu’kenagu’zi wa v’antu'

1 Yav’aga v’antu' aho v’alamulaga kwingi’ha na ku’sambala mu welelo, na v’ana v’a ki’ki’ma v’av’yalagwa ku' wav’o. 2 V’atundwa v’a ki’loho v’a Mulungu*6:2 "V’atundwa v’a ki’loho v’a Mulungu," Ku' Ki’ebulania v’ali' "V’ana v’a Mulungu v’a ki’gosya." V’ingi v’ali’wiganika ku’v’a v’ali' v’atundwa v’a ku' ilunde ninga v’ali' v’amalaika v’a wu’gwe. v’av’awonaga v’enav’o v’aniki' v’a v’antu' ku’v’a v’ali' v’asoga, na v’isogolelaga v’aki’ma ki’ti' i’vi v’atogilwe na ku’v’atoola.

3 Haho Gu’ku' Mulungu wayombaga, "Myu’ye yanne ya wu’panga yi’kakowola kwikala mu muntu' nhananhana ku’nguno mweni’ki’li' ali' wa ku’fwa, na wikalo wakwe mu welelo wu’ku’v’a myaka igana li’mo na maku’mi av’i’li' du'." 4 Mu nsiku' zyeni’zyo na zya ha mbele, gav’age gali’ho mantu' mu welelo ago gav’age mav’yalwa ga v’atundwa v’a ki’loho ago ndi' galala na v’aniki' v’a v’antu'. Genago hu' gav’age mantu' makowozi ago gitanagwe Manefili, mantu' genago gav’age makumalu’ku mu itungo lya nsiku' zyeni’zyo zya kale.

5 Gu’ku' Mulungu wawonaga ku’v’a wu’kenagu’zi wa v’antu' wu’li' wu’hanya mu welelo, na ki’la ndaka ya miganiko ga v’antu' nsiku' zyose gav’aga ga wu’kenagu’zi du'. 6 Gu’ku' Mulungu wasayaga ku’v’atunda v’antu' mu welelo, na moyo gwakwe gwav’aga na wu’satu. 7 Haho Gu’ku' Mulungu wayombaga, "Nku’v’azimangu’zya v’antu' v’ose mu welelo av’o nav’atundile, haki’mo na ndimu zyose na vitundwa vingi' vya ku’yu’mba ha igu’lya na nsi', na nnoni zyose. Ku’nguno nu’saya ku’vitunda." 8 Sumbwa Nowa wapandi’kaga wu’soga ha mbele yamwa Gu’ku' Mulungu.

Mulungu ali’mupi’zya Nowa

9 I’yi' hu' mmola yamwa Nowa na wu’v’yalwa wakwe. Mwenu’yu' wav’age muntu' mugololoku ku' Mulungu na wa lole mugati' na v’antu' v’a ha itungo lyakwe, hangi' mugati' na kwikala kwakwe wav’age ali' bi’hi' na Mulungu.