Gênesis 6

Wu’kenagu’zi wa v’antu'

1 Yav’aga v’antu' aho v’alamulaga kwingi’ha na ku’sambala mu welelo, na v’ana v’a ki’ki’ma v’av’yalagwa ku' wav’o. 2 V’atundwa v’a ki’loho v’a Mulungu*6:2 "V’atundwa v’a ki’loho v’a Mulungu," Ku' Ki’ebulania v’ali' "V’ana v’a Mulungu v’a ki’gosya." V’ingi v’ali’wiganika ku’v’a v’ali' v’atundwa v’a ku' ilunde ninga v’ali' v’amalaika v’a wu’gwe. v’av’awonaga v’enav’o v’aniki' v’a v’antu' ku’v’a v’ali' v’asoga, na v’isogolelaga v’aki’ma ki’ti' i’vi v’atogilwe na ku’v’atoola.

3 Haho Gu’ku' Mulungu wayombaga, "Myu’ye yanne ya wu’panga yi’kakowola kwikala mu muntu' nhananhana ku’nguno mweni’ki’li' ali' wa ku’fwa, na wikalo wakwe mu welelo wu’ku’v’a myaka igana li’mo na maku’mi av’i’li' du'." 4 Mu nsiku' zyeni’zyo na zya ha mbele, gav’age gali’ho mantu' mu welelo ago gav’age mav’yalwa ga v’atundwa v’a ki’loho ago ndi' galala na v’aniki' v’a v’antu'. Genago hu' gav’age mantu' makowozi ago gitanagwe Manefili, mantu' genago gav’age makumalu’ku mu itungo lya nsiku' zyeni’zyo zya kale.

5 Gu’ku' Mulungu wawonaga ku’v’a wu’kenagu’zi wa v’antu' wu’li' wu’hanya mu welelo, na ki’la ndaka ya miganiko ga v’antu' nsiku' zyose gav’aga ga wu’kenagu’zi du'. 6 Gu’ku' Mulungu wasayaga ku’v’atunda v’antu' mu welelo, na moyo gwakwe gwav’aga na wu’satu. 7 Haho Gu’ku' Mulungu wayombaga, "Nku’v’azimangu’zya v’antu' v’ose mu welelo av’o nav’atundile, haki’mo na ndimu zyose na vitundwa vingi' vya ku’yu’mba ha igu’lya na nsi', na nnoni zyose. Ku’nguno nu’saya ku’vitunda." 8 Sumbwa Nowa wapandi’kaga wu’soga ha mbele yamwa Gu’ku' Mulungu.

Mulungu ali’mupi’zya Nowa

9 I’yi' hu' mmola yamwa Nowa na wu’v’yalwa wakwe. Mwenu’yu' wav’age muntu' mugololoku ku' Mulungu na wa lole mugati' na v’antu' v’a ha itungo lyakwe, hangi' mugati' na kwikala kwakwe wav’age ali' bi’hi' na Mulungu. 10 Nowa wav’age na v’ana v’adatu' v’a ki’gosya: Shemu, Hamu na Yafeti. 11 Ha itungo lyeni’lo Mulungu wayi’wonaga welelo ku’v’a yav’ipaga na kokala wu’kandi, 12 ku’nguno yi’li' nhana ki’la yu’mo wav’ipyaga nzi’la yakwe mu welelo.

13 Mulungu wamuwi’laga Nowa, "Gi’si' ni’na ndaka ya ku’v’azimangu’zya v’antu' v’ose, ku’nguno v’okazyaga welelo wu’kenagu’zi. Nhana nku’v’azimangu’zya v’antu' v’ose mu welelo! 14 Sumbwa ev’e wiv’ezezye safina ku' mbawo zya muti' gwa muvinje, u’gawu’le masenge, na u’gav’ile lami mugati' na ha ibala. 15 U’layi’v’ezye i’vi: Wu’lihu wayo makono*6:15 Mukono gu’mo gu’gelani’lile na mita yi’mo. Vipimo ku' Ki’ebulania vili': wu’lihu zilaa magana adatu', wu’gali’nhu zilaa maku’mi atano, na wi’i’ma zilaa maku’mi adatu'. igana li’mo na maku’mi adatu' na kenda, wu’gali’nhu wayo makono maku’mi av’i’li' na itano, na wi’i’ma wayo makono iku’mi na atano. 16 Safina yeni’yo u’yi’tu’u’li’le muzigo mu lu’v’azu lwayo. U’v’ezye twano tu’datu': kamo ka ha nsi’li’li', ka hagati' na ka ha igu’lya. U’yi’vimbe ha igu’lya, na u’lekele kapunye ka wu’lihu wa mukono hagati', kav’e hagati' ya kano na wu’vimbe. 17 Nhana, ndalete kamilamasenga ya minzi' ku’zimangu’zya vitundwa vyose vya myu’ye ya wu’panga. Ki’la ki’tundwa mu welelo ki’lafwe.

18 "Ali’vi ev’e ku' wako ndaki’ndi’ke ilagano lyanne. Ev’e u’lingi’le mu safina haki’mo na muki' wako, v’ana v’ako na v’aki' v’av’o. 19 Mugati' na vitundwa vyose vya muv’i’li' vya myu’ye ya wu’panga, u’sole vya ki’gosya na vya ki’ki’ma u’viyane mu safina, ki’gele u’vipi’zye na lu’fu viv’e na wu’zuwu’ku haki’mo nanho.

20 "U’latu’u’lemo nnoni, ndimu, na vitundwa vingi' vyose vya ku’yu’mba ha igu’lya na nsi', na ki’la ki’mo ku' wu’tundwa wacho, vilize ku' wako viv’i’li' viv’i’li' ki’gele u’vitu’u’le viv’e na wu’zuwu’ku. 21 U’kuminge ki’la ki’liwa, u’sole vyose hekeheke ku’nguno yinywe na vitundwa i’vyo u’lingi’le navyo." 22 Nawe Nowa wav’ezyaga vyeni’vyo. Wav’ezyaga ki’ti' i’vyo Mulungu wamulagi’li’zyaga.