6 Musa kasola idamu chidogho keka mna pfiya, na nusu ingi kamitsa hanu ha kulapfila nambiko. 7 Kuya kasola ichitabu che laghano lye Imulungu, kachisoma hambele he iwanu, nawo walonga, "Agho ghose ghayalongile IMNDEWA, tutsoghatenda na tutsoghakinda."
8 Musa kaisola idamu ila yekile mchiha, kawamitsila iwanu, kalonga, "Aino idamu ya laghano yalikile Imulungu na mwemwe, hayaweng’ile malaghitso ghano."