Besaleli na Oholiabu
1 IMNDEWA kamlongela Musa, 2 "Lola, nimsaghula Bezaleli, imwana wa Uri, ayo Uri aba wake tsa Huri, wa likabila lya Yuda, 3 nimmemesa Ghumuhe ghwe Imulungu, nimtenda yawe na tsimbutsi, yamanye na yadahe kutenda tsisang’ano tsose, 4 ili yatende tsisang’ano tsa ufundi, yawe muhunzi wa ipfinu pfa nzahabu, fetsa na shaba, 5 nimtenda yamanye kusongola ghamabwe gha kuhambila, kusongola mibani, na yamanye tsisang’ano tsose tso kuhamba. 6 Kuya nimsaghula Oholiabu mwana wa Ahisamaki, wa likabila lya Dani yasang’ane naye. Pfipfila niweng’a uwetso mkulu mafundi wa kutenda sang’ano tsingi, ili watengenetse pfinu pfose pfanikulaghitse.