1 ଇମ୍‌ଣାକାର୍‌ ସାଇଜ କାଜିଂ ମିସର୍‌ତ ହାନାର୍‌ ଆରି ଗଡ଼ାଙ୍ଗ୍‌କାଂ ଆହ୍‌ର କିନାର୍‌ ଆରି ଗଡ଼଼ାଗାଡ଼଼ି ବେସି ଆନି କାଜିଂ, ଆରେ ଗଡ଼ାଙ୍ଗ୍‌ ଦୁମ୍‌ତାକା ଆହ୍‌ନାକାର୍‌ ବେସି ବାଡ଼୍‌କାସ୍‌ ଆନି କାଜିଂ ହେୱାଙ୍ଗ୍‌ ଜପି ପାର୍ତି କିନାର୍‌; ମାତର୍‌ ଇସ୍ରାଏଲ୍‌ନି ଦାର୍‌ମିନିକାର୍‌ କାଜିଂ ହୁଡ଼ୁର୍‌, କି ନିତ୍ରେମାପ୍ରୁତିଂ ହୁଡ଼ୁର୍‌, ହେୱାର୍‌ ଦୁକ୍‌ନିକାର୍‌ । 2 ଆତିସ୍‌ପା ହେୱାନ୍‌ ଗିୟାନ୍‌ନିକାନ୍‌ ଆରି ହେୱାନ୍‌ ମଙ୍ଗଲ୍‌ଆୱାକା ଗିଟାୟ୍‌ କିଦ୍‌ନାନ୍‌, ଆରେ, ଜାର୍‌ ବଚନ୍‌ ଅନ୍ୟାୟ୍‌ କିଉନ୍‌; ମାତର୍‌ ହେୱାନ୍‌ କାକ୍ରିକିନାକାର୍‌ ଲାତ୍ରାତି ସବୁନିପ ଆରି ଦରମ୍‌ହିଲ୍‌ୱାକାର୍‌ ସାଇଜତାଂ ବିରୁଦ୍‌ତ ନିଙ୍ଗ୍‌ନାର୍‌ । 3 ମିସର୍‌ନିକାର୍‌ ମାନାୟ୍‌ ମାତର୍‌, ପର୍‌ମେସ୍ୱର୍‌ ଆକାୟ୍‌ ଆରି ହେୱାର୍‌ତି ଗଡ଼ାଙ୍ଗ୍‌ ଜେଇ ମାତର୍‌, ଜିବୁନ୍ ଆକାୟ୍‌; ଆରି ନିତ୍ରେମାପ୍ରୁ ତା କେଇ ଲାମାୟ୍‌ କିତାନ୍‌, ସାଇଜକାରିୟା ଅଡ଼୍‌ଜାନାର୍‌ ଆରି ସାଇଜନିକା ଆର୍‌ଜିହାନାତ୍‌, ଆରେ ରିୟାର୍‌ ରଞ୍ଜେମାଟ୍‌ ବୁଡାନାର୍‌ । 4 ଇନାକିଦେଂକି ନିତ୍ରେମାପ୍ରୁ ମାଙ୍ଗେଙ୍ଗ୍‌ ଇ କାତା ଇନାନ୍‌, "ଇନେସ୍‌କି ସିୟଁ ଆରି ବେଣ୍ଡିୟା ସିୟଁ ତା କାପ୍‌ନି କାଜିଂ ଗାର୍‌ଜେନ୍‌ କିନାତ୍‌, ବେସି ମେଣ୍ଡାପାଲିକିନାକାର୍‌ ତା ବେରୁତ କୁକ୍ୟାତିସ୍‌ ଆଁ ହେୱାନ୍‌ ହେୱାର୍‌ ୱେଇଦ ବିଲ୍‌କି ଆଉର୍‌, କି ହେୱାର୍‌ତି ଗଣ୍ଡଗଲ୍‌ତ ଜାର୍‌ତିଂ ପାଣ୍ଡ୍ରୁ ଆଇକିଉନ୍‌, ହେଲାକେ ଆଦିକାରି ନିତ୍ରେମାପ୍ରୁ ସିୟନ୍‌ ମାଡ଼ିତ ଆରି ତାପାଚେ ହାରୁମାଡ଼ିତ ଜୁଜ୍‌ କିନି କାଜିଂ ଜୁଜ଼଼ି ୱାନାନ୍‌ । 5 ଇନେସ୍‌କି ପଟିଙ୍ଗ୍‌ ଉମ୍‌ଜି ଉମ୍‌ଜି ରାକ୍ୟା କିନିକ୍‌, ହେଲାକେ ମେଲ୍ୟାଆଦିକାରି ନିତ୍ରେମାପ୍ରୁ ଜିରୁସାଲମ୍‌ତିଂ ରାକ୍ୟା କିନାନ୍‌; ହେୱାନ୍‌ ତାଙ୍ଗେଙ୍ଗ୍‌ ରାକ୍ୟା କିଜ଼଼ି ଉଦାର୍ କିନାନ୍‌, ହେୱାନ୍ ହେୱାନିଂ ହପ୍‌ଚି ରାକ୍ୟା କିନାନ୍‌ ।" 6 ଏ ଇସ୍ରାଏଲ୍‌ ମାଜ଼଼ିର୍‌, ଏପେଙ୍ଗ୍‌ ବେସି ବିଡ୍ରାୟ୍‌କିନାକାଦେର୍‌ ଇନେର୍‌ତାଂ ମୁକ୍‌ମେଟ୍‌ ଆତାଦେର୍‌ନା, ତା ତାକେ ମାସ୍‌ଦି ୱାଡ । 7 ଇନାକିଦେଂକି ହେ ଦିନ୍ତ ମିଦାଂ ଜାଣ୍‌କେ ଜାଣ୍ ଜାର୍ ଜାର୍ କେଇଦାଂ ରଚ୍‌ଚି ରୁପା ପୁତ୍‌ଡ଼଼ା ଆରି ହନା ପୁତ୍‌ଡ଼ା ଲାକେ ପାପ୍ ଜିନିସ୍ ତୁହିନାଦେର୍ । 8 ହେ ସମୁତ ଅସୁରିୟର୍‌ କାଣ୍ଡାତ ହାନାର୍‌, ମାତର୍‌ ମାନାୟ୍‌ କାଣ୍ଡାତ ଆକାୟ୍‌; ଆରେ କାଣ୍ଡା ତାଙ୍ଗେଙ୍ଗ୍‌ ଗୁହ୍‌ନାତ୍‌, ମାତର୍‌ ମାନାୟାର୍‌ତି କାଣ୍ଡା ଆକାୟ୍‌; ହେୱାନ୍‌ କାଣ୍ଡା ମୁମ୍‌ଦାଂ ହନ୍‌ନାନ୍‌ ଆରି ତା ବେଣ୍ଡିୟାର୍‌ ଆଡ୍ୟାର୍ ଜିତା ଆନାର୍‌ । 9 ହେୱାର୍‌ତି ରାଜା ପାଣ୍ଡ୍ରୁଆଜ଼଼ି ହନ୍‌ନାର୍‌ ଆରେ, ଆଦିକାରି ଏଚେକ୍ ପାଣ୍ଡ୍ରା ଆନାର୍‌ ଜେ, ଜୁଜ୍ ପତ୍‌କା ହୁଡ଼଼ୁନାର୍, ମାପ୍ରୁ ଇନାନ୍ ଇନେନ୍ ଜିରୁସାଲମ୍‌ତ ସିୟନ୍‌ ପାର୍ତନା କିନାର୍ ଆରି ପୁଜା କାଜିଙ୍ଗ୍ ହେବେ ନାଣି ଆସ୍‌ସି ହାନାର୍‌ ।