1 ନିଜେ ଚର୍‌ କିୱିତିସ୍‌ପା ମ୍ଡାତାଦେର୍‌ନା ଜେ ଏପେଙ୍ଗ୍‌; ଆରେ, ମାନାୟାର୍‌ ମି କାଜିଂ ବିସାସ୍‌ତ ବିସ୍‌ ହିୱିତିସ୍‌ପା ଆଁ ବିସାସ୍‌ତ ବିସ୍‌ ହିନାଦେରା ଜେ ଏପେଙ୍ଗ୍‌, ଏପେଙ୍ଗ୍‌ ଦୁକ୍‌ନି ମାନାୟ୍‌ । ଏପେଙ୍ଗ୍‌ ଚର୍‌କିନାକା ୱିସ୍ତି ପାଚେ ମ୍ଡାୟାନାତ୍‌ ଆରି ବିସାସ୍‌ତ ବିସ୍‌ହିନାକା ୱିସ୍ତିପାଚେ ମାନାୟାର୍‌ ମି କାଜିଂ ବିସାସ୍‌ତ ବିସ୍‌ ହିଦ୍‌ନାର୍‌ । 2 ଏ ନିତ୍ରେମାପ୍ରୁ, ମା କାଜିଂ ଦୟା କିଦା; ଆପେଙ୍ଗ୍‌ ମିଙ୍ଗ୍‌ କାତ୍‌ନାପା; ଏନେଙ୍ଗ୍‌ ସବୁ ନାଡ଼ିସିଂ ହେୱାର୍‌ତି ମାରା ଲାକେ ଆ, ଅବାବ୍‌ ସମୁତ ପା ମା ମୁକ୍‌ଡ଼ାୟ୍‌ ଲାକେ ଆ । 3 ଗଣ୍ଡ୍‌ଗଲ୍‌ ସବଦ୍‌ତ ଗସ୍ଟିନିକାର୍‌ ହନ୍ତାର୍‌, ଏପେଙ୍ଗ୍‌ ନିଙ୍ଗ୍‌ତିଲେ, ବିନ୍‌ ଦେସ୍‌ନିକାର୍‌ ଜେଡ଼େକେତେ ଆତାର୍‌ । 4 ଇ ମାନାୟାର୍ ଜାତି ଏପେଙ୍ଗ୍ ପା ପାମିଂ ଲାକେ ରୁଣ୍ଡା ଆନିକ୍‌, ଏପେଙ୍ଗ୍ ପା ହେ ଲାକେ ରୁଣ୍ଡାଆଡ । 5 ନିତ୍ରେମାପ୍ରୁ ଉନ୍‌ତି; ଇନାକିଦେଂକି ହେୱାନ୍‌ ଜପିନିକାର୍‌ ବାହା କିନାନ୍‌; ହେୱାନ୍‌ ସିୟନ୍‌ତ ନିୟାୟ୍‌ ବିଚାର୍‌ ଆରି ଦାର୍ମିକାତାତ ପୁରା କିତାନ୍‌ନା । 6 ଆରେ, ମି ସମୁତ ସୁସ୍ତା ଆନାତ୍‌; ମୁକ୍‌ଡ଼ାନାକା, ଗିୟାନ୍‌ ଆରି ବୁଦିନି ବେସି ଆନାତ୍‌; ନିତ୍ରେମାପ୍ରୁ ବିସ୍ରେନି ପାଣ୍ଡ୍ରାନାକା ତାଦାଂ ଗାଦ୍ୟା । 7 ହୁଡ଼ାଟ୍‌, ହେୱାର୍‌ତାଂ ବେସି ସାନ୍ତିନିକାର୍‌ ବାର୍‌ତ ଆଡ଼୍‌ବାନାରା; ହାନ୍ଦି ଡେକ୍‌ନିକିକ୍‌ କାବୁର୍‌ହିନିକିକ୍‌ ଜବର୍ ଆଡ଼୍‌ବିନିକା । 8 ଅହାର୍‌ହାଜ଼଼ିତିଂ ନାର୍‌ୱାରାକା, ହାଜ଼଼ିହାନାକାର୍‌ ଇନେର୍‌ ହିଲୁର୍‌; ହେୱାନ୍‌ ନିୟମ୍‌ ଡ଼ିକ୍‌ତାନ୍‌ନା, ହେୱାନ୍‌ ଗାଡ଼୍‌ସବୁ ଇଣ୍‌ କିତାନ୍‌ନା; ହେୱାନ୍‌ ମାନାୟ୍‌ତିଂ ପୁନୁନ୍ । 9 ଦେସ୍‌ କାନ୍ଦାଣ୍‌ ଆଜ଼଼ି ୱାଚ୍‌ନାତା; ଲିବାନନ୍‌ ଲାଜାଜ଼଼ି ୱାଚ୍‌ନାତା; ସାରଣନି ରାନ୍‌ ଲାକେ ଆତାତ୍; ଆରେ ବାସନ୍‌ ଆରି କର୍ମିଲ୍‌ ମାଡିନି ଆକିଂ ହାଡ୍‌ଜି ହାନିକା ।

10 ନିତ୍ରେମାପ୍ରୁ ଇନାନ୍‌, ଆସ୍‌ ନଂ ନିଙ୍ଗ୍‌ନାସ୍‌, "ଆସ୍‌ ନଙ୍ଗ୍‌ ଜାର୍‌ତିଂ ନିକ୍‌ନାସ୍‌; ଆସ୍‌ ନଙ୍ଗୟ୍‌ ଜାଜ୍‌ମାଲ୍‌ ଆନାସ୍‌ । 11 ମି ଜଜନା ସବୁ ମଲ୍‌ହିଲ୍‌ୱାକା ଆରେ ଇନାକାପା କିତିସ୍ ହେ ୱିଜ଼଼ୁ ମି ବେବାର୍ ହିଲ୍‌ୱାକା ଇନାକାପା କିୟାଟ୍ ନା ଜିବୁନ୍ ନାଣି ଲାକେ ଆହ୍‌ନାତା ହେଦାଂ ମିଂ ଗୁସ୍ତାନାତ୍‌ । 12 ଆରେ, ଗସ୍ଟିନିକାର୍‌ ହୁସ୍‌ତି ପିଟ୍‌ୱା ଲାକେ ଆରି ନାଣିତ କାଚାନି ୱାଡ଼ିଙ୍ଗ୍‌ ଲାକେ ଆନିକ୍‌ । 13 ଏ ଦେହାନି ମାନାୟ୍‌ ୱିଜ଼଼ାଦେର୍‌, ଏପେଙ୍ଗ୍‌ ମା କିତି କାମାୟ୍‌ ୱେନାଟ୍‌; ଆରି, ଏ ଲାଗେନି ଲକ୍‌ ୱିଜ଼଼ାଦେର୍‌, ଏପେଙ୍ଗ୍‌ ମା ସାକ୍ତିତିଂ ମାନିକିୟାଟ୍‌ ।" 14 ସିୟନତ ପାପ୍‌ୟାର୍‌ ପାଣ୍ଡ୍ରା ଆଦ୍‌ନାର୍‌: ଦାରମ୍‌ହିଲ୍‌ୱାକିରିଂ କେଇ ହଟାତ୍‌ ଟ୍ରାକ୍‌ତାଦେରା । ମା ବିତ୍ରେ ଇନେର୍‌ ସବୁଗୁହ୍‌ନି ନାଣିତ ବାହା କିଦେଂଆଡ଼୍‌ନାନ୍‌ ? ମା ବିତ୍ରେ ସିୟନ୍‌ ଇନେନ୍‌ ୱିସ୍‌ୱି କାଡ଼୍‌ଲାକେ ଆହ୍‌ନିନାଣିତ ବାହା କିଦେଂଆଡ଼୍‌ନାନ୍‌ ? 15 ଇମ୍‌ଣି ଲକ୍‌ ଦାର୍ମିନି ହାଜ଼଼ିତ ହନାନ୍‌ ଆରି ଇନେନ୍‌ ହୁଦାର୍‌ କାତା ଇନାନ୍‌; ଇମ୍‌ଣି ଲକ୍‌ ଉତ୍‌ପାତ୍‌ ଲାବ୍‌ ମିଚ୍‌ କିନାନ୍‌ ଆରି ଲାଞ୍ଚ୍‌ ଆହ୍‌ନି ବିସ୍ରେତାଂ ଜାର୍‌ କେଇ ତୁର୍‌ବି କିନାନ୍‌, ଇନେନ୍‌ ବାଦିକି କାତାତ ୱେନ୍‌ଞ୍ଜି ତା କିତୁଲ୍‌ ଆଞ୍ଜି କିନାନ୍‌, ଆରେ, ବାନ୍ୟାକେୟ୍‌ କେଚ୍‌କଣ୍‌ତ ତା କାଣ୍‌କୁ ଡାବାୟ୍‌କିନାତ୍‌; 16 ହେୱାନ୍‌ ପାନ୍ତି ବାହାତ ବାହା କିନାନ୍‌; କାଲ୍‌ନି ଦେହାନିକା ବାହାତ ତାଦି ମାଚା ଲାକେ ଆନାତ୍‌; ତା ତିନାକା ତାଂ ହିଆନାତ୍, ତା ଏସ୍‌କି ଅବାବ୍‌ ଆଉତ୍ ।

17 ମି କାଣ୍‌କୁ ରାଜାଙ୍ଗ୍‌ ହେୱାନ୍‌ତି ହଲ୍‌ନାକା ହୁଡ୍‌ନାନ୍‌; ର ଦେହାହାନି ଦେସ୍‌ ହୁଡ଼୍‌ନାଦେର୍‌ । 18 ମି ଜିବୁନ୍ ପାଣ୍ଡ୍ରୁ ବିସ୍ରେ ୱାରି କିନାଦେର୍‌; ହେୱାନ୍‌ ଗାଣାକିନାକାନ୍‌ ଇମେନ୍‌ ? ଡାବୁଙ୍ଗୁ ତୁଡାଇ କିନାକାନ୍‌ ଇମେନ୍‌ ? ପାନ୍ତି ମାଚା ଗାଣାକିନାକାନ୍‌ ଇମେନ୍‌ ? 19 ଏନେଙ୍ଗ୍‌ ହେ ଦେହାନି କୁଟୁମ୍‌ତିଂ, ଇଚିସ୍‌, ଇମ୍‌ଣାକାର୍‌ ଡେଙ୍ଗାଟି ବାସା ଏପେଙ୍ଗ୍‌ ପୁନ୍‌ୱା ତାଦେର୍‌, ଇମ୍‌ଣାକାର୍‌ ବିନ୍‌ଦେସ୍‌ନି ବାସା ଏପେଙ୍ଗ୍‌ ବୁଜାଦେଂ ଆଡ୍‌ୱାତାଦେର୍‌, ହେ କୁଟୁମ୍‌ତିଂ ଆରେ ହୁଡ଼ୁଦେର୍‌ । 20 ମା ପୁଇପୁୟା ହଲ୍‌ନାକା ବାହା ସିୟନ୍‌ ଗାଡ଼୍‌ କାଜିଂ ହୁଡ଼଼ାଟ୍‌; ମି କାଣ୍‌କୁ ସାନ୍ତିନି କୁଚ୍‌ଚିବାହା ଜିରୁସାଲମ୍‌ତ ହୁଡ଼୍‌ନାଦେର୍‌, ହେଦାଂ ଗୁଚାୱି ତୁମ୍‌ ଲାକେ, ହେବେନି କୁଟ୍ରୁ ସବୁ ଇନାୱାଡ଼ାଙ୍ଗ୍‌ ପା ଉନ୍ଦ୍ୟାଜ଼଼ି ହାଲୁତ୍‌, କି ହେବେନି ଇମ୍‌ଣି ଡରି ନାଡୁତ୍‌ । 21 ମାତର୍‌ ହେବେ ନିତ୍ରେମାପ୍ରୁ ସାକ୍ତିତ ମା ତାକେଣ୍ଡାଂ ସାଇଜ କିଦ୍‌ନାନ୍‌, ଅହାର୍‌ ନାଗୁଡ଼୍‌ ଆରି ଜାରାଣ୍‌ନି ବାହା ଲାକେ ଆନାତ୍‌; ହେ ବାହାତ ଉଲ୍‌କିଆତିସ୍‌ ଇମ୍‌ଣାକାପା ଡଙ୍ଗା ନାସି ହାଲୁତ୍‌, କି ବୟ୍‌କାର୍‌ନି ଏସ୍‌ଜାଜ୍‌ ହେଦାଂ ନାତେଂ ଆଡୁତ୍‌ । 22 ଇନାକିଦେଂକି ନିତ୍ରେମାପ୍ରୁ ମା ବିଚାର୍‌କାରିୟା, ନିତ୍ରେମାପ୍ରୁ ମା ବିଦି ହିତ୍‌ତାକାନ୍‌, ନିତ୍ରେମାପ୍ରୁ ମା ରାଜା, ହେୱାନ୍‌ ମାଙ୍ଗେଙ୍ଗ୍‌ ମୁକ୍‌ଡ଼ାୟ୍‌ କିଦ୍‌ନାନ୍‌ । 23 ମି ପିରିଡରିଙ୍ଗ୍‌ ସବୁ ଉଲ୍‌ଗା ଆତିକ୍‌ନା, ହେ ସବୁ ମି କାପ୍‌ଡ଼ାତ ଆଟ୍‌ୱା ଆରି ଡରିତିଂ ଟାଣାୟ୍‌ କିଦେଂ ଆଡ୍‌ୱାତାନ୍‌; ହେପଦ୍‌ନା ଜେଲ୍‌ଜି‍ ଚର୍‌କିଜ଼଼ିତାତି ଜିନିସ୍‌ ରି ବାଗ୍‌ କିୟାତାତ୍‌; ଚଟା ଲଗୁ ଚର୍‌କିତି ଜିନିସ୍‌ ଆସ୍ତାନ୍‌ । 24 ଆରେ, ଆନ୍‌ ନାଦାର୍‌ ମାନାଙ୍ଗ୍‌ ଇଞ୍ଜି ବାହାନିକାଦେର୍‌ ଇଞ୍ଜୁର୍‌; ସିୟନତ ବାହା କିତି ମାନାୟାର୍‌ତି ଦସ୍‌ନିକା କେମା କିୟାଆନାତ୍‌ ।