1 Ba bamarayika bashika i Sodomu ku mugoroba, ico gihe Loti yari yicaye kw’irembo ryinjira mu gisagara ca Sodomu. Ababonye aja kubasanganira, yikubita hasi imbere yabo yubamye, 2 arababwira ati: "Ba nyakwubahwa, ndabinginze muze mwoge ibirenge, murare iwanje, jewe umusavyi wanyu. Ejo mu gitondo muzoheza muvyuke kare mubandanye urugendo rwanyu."

Na bo baramwishura bati: "Oya, turarara hanze, ku kibuga c’igisagara."

3 Ariko Loti abandanya abinginga, na bo barateba baremera kujana na we no kurara iwe. Loti abategurira amazimano agizwe n’imikate itarimwo umwambiro, barafungura. 4 Ariko imbere yo kuja kuryama, abagabo bose bo muri ico gisagara ca Sodomu, abakuze n’abakiri bato, bakikuza inzu ya Loti. 5 Bahamagara Loti baramubwira bati: "Ba bagabo baza kurara iwawe iri joro bari he? Batuzanire tubasambanye!"

6 Nuko Loti arasohoka yugara umuryango ahagarara imbere y’inzu. 7 Arababwira ati: "Bavukanyi, ndabinginze ntimukore ikibi nk’ico! 8 Mfise abakobwa babiri batarigera baryamana n’umugabo. Reka abe ari bo ndabazanira mubagenze uko mushaka. Ariko ntihagire ico mugira aba bagabo, kuko ni abashitsi banje mbwirizwa kubakingira."

9 Baramukankamira bati: "Tuve imbere!" Baravuga bati: "Uwu mugabo yaje muri iki gisagara ari umunyamahanga, none raba yigize umucamanza wacu. Ubu rero turagukorera ikibi gisumba ico tubakorera." Nuko basunikira Loti hirya, begera umuryango ngo bawumene.

10 Ba bamarayika babiri bafata Loti ukuboko bamwinjiza mu nzu, bugara umuryango. 11 Maze bateza uruhumyi ba bagabo bari ku muryango, abakuze n’abato, ku buryo batashobora kubona aho umuryango uri.

12 Ba bamarayika babaza Loti bati: "Hari abandi bantu ufise hano, baba abakwe, abahungu, abakobwa, canke uwundi muntu w’incuti ufise muri iki gisagara? Basohore bose ubakure muri iki gisagara. 13 Tugira turandure iki gisagara, kuko urwamo rwagiriza abantu baba muri co rwabaye rwinshi cane imbere y’Uhoraho, ni co gituma yadutumye kukirandura."

14 Nuko Loti arasohoka aja kubwira abakwe bategura kurongora abakobwa biwe ati: "Nimwihute muve muri iki gisagara kuko Uhoraho agiye kukirandura!" Ariko bo babifata nk’aho ariko arafyina.

15 Mu gitondo kare, ba bamarayika bihutisha Loti bati: "Nyarutsa usohokane n’umugore wawe n’abakobwa bawe babiri muri kumwe kugira ngo ntimurandurwe n’igihano c’ababa muri iki gisagara!"

16 Loti atanguye gukwega amaguru, ba bamarayika bamufata ukuboko, we n’umugore wiwe n’abakobwa biwe babakwegera inyuma y’igisagara, kuko Uhoraho amugiriye ubuntu. 17 Babashikanye hanze y’igisagara, umwe muri ba bamarayika arabihanikiriza ati: "Nimuhunge! Kandi ntimuhindukire canke ngo mugire aho muhagarara muri iki kiyaya. Nimuhungire ku musozi, kugira ngo ntimuranduke."

18 Loti aravuga ati: "Oya ba nyakwubahwa! 19 Jewe umusavyi wanyu nagiriwe ubuntu imbere yanyu kandi mwanyeretse imbabazi nyinshi mu kunkiza. Ariko rero sinohungira ku musozi, kuko ikiza cohava kiza ntarashikayo hanyuma kikampitana. 20 Murabona karya gasagara ko kari hafi. Ndabasavye mundeke mpungireyo; ntimubona ko ari gato? Harya nohakirira."

21 Wa mumarayika aramwishura ati: "N’ico na co ndakikwemereye. Karya gasagara sindakarandura. 22 Ariko ihute uhungireyo kuko ata co nkora utarashikayo." Ni co gituma ako gasagara bakise Zowari, bisigura "ahantu hato".

23 Nuko Loti ashika i Zowari izuba rirashe. 24 Maze Uhoraho akororera kuri Sodomu na Gomora umuriro n’ibizuku vyaka bivuye mw’ijuru; 25 arandura ivyo bisagara vyose hamwe n’ikiyaya cose, n’abantu bose baba muri ivyo bisagara n’ibiterwa vyose. 26 Ariko muka Loti arahindukira araba inyuma aca acika inkingi y’umunyu.

27 Nuko Aburahamu azinduka kare mu gitondo aja muri ca kibanza yahagararamwo imbere y’Uhoraho. 28 Maze araba muri ca kiyaya cose atumbereje amaso i Sodomu n’i Gomora abona umwotsi mwinshi upfunduka nk’umwotsi w’itanure.

29 Ariko igihe Imana yarandura ivyo bisagara, yagumye yibuka ico Aburahamu yayisavye, ikiza Loti ikiza caranduye ivyo bisagara vyo mu kiyaya.

30 Nuko Loti ava i Zowari kuko yatinya kuhaba, adugana n’abakobwa biwe babiri mu misozi, baja kuba mw’isenga. 31 Umukuru muri ba bakobwa abwira mutoyi ati: "Urabona ko data ashaje, kandi nta mugabo asigaye muri iki gihugu ngo aturongore nk’uko bigenda ku bandi. 32 Ingo duhe data umuvinyu tumuboreze, hanyuma turyamane na we kugira ngo turonke uruvyaro biciye kuri we."

33 Nuko baboreza se n’umuvinyu iryo joro, maze umukobwa mukuru arinjira asambana na se. Kubera akaborerwe, Loti ntiyigeze amenya igihe yinjiriye n’igihe yasohokeye.

34 Umusi ukurikira, umukuru abwira mutoya wiwe ati: "Urabona ko nararanye na data iri joro. Ingo twongere tumuboreze n’iri joro na ryo, maze winjire uryamane na we kugira ngo turonke uruvyaro biciye kuri data." 35 Nuko bongera kuboreza se n’umuvinyu iryo joro. Wa mukobwa mutoya arinjira aryamana na we. Kubera akaborerwe, Loti ntiyigeze amenya igihe yinjiriye n’igihe yasohokeye.

36 Nuko ba bakobwa ba Loti uko ari babiri basama inda batewe na se. 37 Umukuru avyara umwana amwita Mowabu. Ni we sekuruza w’ihanga ryitwa Abanyamowabu gushika uno musi. 38 Umutoya na we avyara umuhungu amwita Beni-Ami. Ni we sekuruza w’ihanga ryitwa Abamoni gushika uno musi.