1 Biludadi w’i Shuhi na we avuga ati:

2 "Mbega uzogeza ryari kuvuga ayo majambo yose?

Nuvuge ibiroranye nimba ugomba kwishura.

3 Ni iki gituma udufata nk’ibikoko,

ukabona ko turi ibijuju imbere yawe?

4 Wewe witabagurana uburake bwawe,

wibaza ko isi ica ihebwa kubera wewe?

Canke ko igitandara gica gikurwa aho kiri?

5 Ni ukuri itara ry’umunyakibi rizozima,

n’urubeya rwiwe ruzohagarika kwaka.

6 Umuco wo mu nzu yiwe uzohinduka umwijima,

urumuri rumanitse mu nzu yabo ruzozima

7 Intambuko z’inkomezi ziwe zizopfunyapfunywa,

kandi imigabo yiwe ni yo izomutsinda hasi.

8 Ibirenge vyiwe ni vyo bimutwara mu mutego,

bikamuta mu kinogo cimbwe mu nzira.

9 Umutego uzomufata ku gitsintsiri,

ibiziriko bimubohe bimugumye.

10 Umugozi wo kumufata uhishijwe mw’ivu,

umutego wiwe uryamye mu nzira.

11 Ibimutera ubwoba bizomukanga impande zose,

bizomwoma ku birenge bimwiruke inyuma.

12 Ivyago biramwipfuza,

ugutikiza kwiteze ko atsitara.

13 Ingwara zishishimuye umubiri wiwe,

imfura z’urupfu zimuriye amaguru n’amaboko.

14 Azorandurwa mu rugo rwiwe yishimiye,

ahonyangwe n’umwami w’ibiteye ubwoba.

15 Umuriro uzokwama ku nzu yiwe,

n’amazuku aturira azokwama akwiragiye aho aba.

16 Imizi yiwe izokwumira mu kuzimu,

na yo amashami yiwe yumire mu kirere.

17 Izina ryiwe rizokwibagirwa kw’isi,

mu gihugu nta wuzomwibuka.

18 Azokwirukanwa mu muco ajanwe mu mwijima,

azocibwa kw’isi.

19 Ntazobona abana canke abuzukuru mu bwoko bwiwe,

nta wuzosigara aho azoba yarabaye.

20 Abazova mu burengero bazotangarira ibizomushikako,

abo mu buseruko bibatere guhinda agashitsi.

21 Bazovuga bati: ‘Ni ukuri aho ni ho mu nzu y’abanyakibi,

ni co kibanza c’abataye Imana.’ "