1 Maze Elihu arongera aravuga ati:

2 "Wibaza ko uri mu kuri,

ko uvuga ngo ‘Ndi umugororotsi imbere y’Imana?’

3 Ariko urabaza uti: ‘Mbega vyomarira iki kugororoka,

kandi vyomarira iki kubaho ntakora icaha?’

4 Reka ndakwishure,

nishure n’abagenzi bawe.

5 Rangamiza kw’ijuru,

urabe ingene ibicu biri kure hejuru yawe.

6 Wibaza ko ukoze icaha hari ico vyoyigira?

Ivyaha vyawe bibaye vyinshi, hari ico vyoyitwara?

7 Mbega uyigororokeye woba uyihaye iki?

Yoronka iki mu biganza vyawe?

8 Haba na mba. Ivyaha vyawe vyonona abantu nka wewe nyene,

kandi ubugororotsi bwawe bwofasha umwana w’umuntu gusa.

9 Iyo agacinyizo kabaye kenshi, amarira aba menshi.

Bataka barondera ububasha bw’umunyenkomezi.

10 Ariko nta n’umwe abaza ati: ‘Mbega Imana umuremyi wanje,

yo impa indiririmbo mw’ijoro,

11 ikatwigisha gusumvya uko yigisha ibikoko vyose vyo kw’isi,

ikatugira abanyabwenge gusumvya inyoni zo mu kirere, iri hehe?’

12 Iyo basemereye Imana ntibishure,

biba vyatewe n’ukwishira hejuru kw’umunyakibi.

13 Mu vy’ukuri, Imana ntiyumva amasengesho agaragara,

Iyishoboravyose ntibishirako umutima.

14 Mbega ntizorushiriza kutakwumva,

ko uvuga ngo ntuyibona,

ko uvuga ngo izi urubanza rwawe,

ariko ikakurindiriza cane,

15 ukongera ukavuga ko uburake bw’Imana budahana,

ko idashira umutima ku kibi.

16 Yobu yugururiye akanwa kuvuga amajambo y’imburakimazi,

yagwije amajambo y’ubupfu."