1 Maze Yobu abandanya avuga ati:

2 "Icompa ngasubira kuba nk’uko nari mbayeho mu mezi aheze,

aho inyonga z’Imana zahora kuri jewe,

3 aho itara ryayo ryakira hejuru yanje,

umuco wayo ukandongora mu gihe c’umwijima.

4 Icompa ngasubira muri ya misi nari nteye imbere,

aho ubucuti nari mfitaniye n’Imana bwahezagira inzu yanje.

5 Ico gihe Iyishoboravyose yari ikiri kumwe nanje,

kandi abana banje bari bankikuje.

6 Ico gihe inka zanje zakamwa menshi cane,

kandi amato yanje yari asesekaye amavuta ya elayo.

7 Ngiye mu nama y’abatware b’igisagara,

nicarana n’abubahwa kw’ihuriro,

8 abatware bakiri bato bakikuma, bakampa inzira,

inararibonye zikanyakira zihagurutse.

9 Abaganwa bagahagarika inkuru zabo,

bagashira ikiganza ku munwa.

10 Abatware b’abubahwa bagahaguruka bacereje,

ururimi rwabo rukagobwa.

11 Abanyumva bose bamvuga neza,

kandi abambona bose banshingira intahe,

12 kuko nafasha abakene n’impfuvyi,

hamwe n’abatagira gitabara.

13 Nahezagirwa n’abacikana,

imitima y’abapfakazi nkayuzuza indirimbo z’umunezero.

14 Nambara ukugororoka nk’umwambaro,

ubutungane yari yo kanzu n’inkofero vyanje.

15 Nabera amaso impumyi,

ibimuga nkabibera amaguru.

16 Nari se w’abakene,

naburanira ba kavantara.

17 Navunagura imibangabanga y’ababisha,

nkabambura abo bashinzeko amenyo.

18 Nahora nibaza nti: ‘Nzopfira mu nzu yanje,

imisi yanje izongana n’umusenyi wo ku kiyaga.’

19 Nzoba meze nk’igiti gishorera imizi yaco mu mazi,

ikime co mw’ijoro kigatonyangirira ku mashami yanje.

20 Ubwiza bwanje bukama bwiyubura,

n’inkomezi zanje zikiyubura ku musi ku musi.

21 Abantu bose bantega amatwi bashaka kwumva ivyo mvuga,

bakarindira impanuro zanje bacecetse.

22 Mpejeje kuvuga, nta wasubizayo,

amajambo yanje yashika ku nyota abantu bose.

23 Banyitega nk’abitega imvura,

bakipfuza ko novuga kurya abantu bipfuza ko imvura yogwa.

24 Ndabatwengeye vyarabarengera,

kuko ukubakera mu maso kwanje kwari gufise ikimazi kuri bo.

25 Ni jewe nabereka inzira bakwiye gucamwo, nkababera umurongozi,

nari meze nk’umwami ari hagati mu ngabo ziwe,

nari kiremesha ku bafise imitima ibabaye.