1 Paweriti na muntu yumu muisi ya Usi, yawamshema Ayubu. Muntu ayu kaweriti mheri na muntu yakamguwira Mlungu na yakatendandiri ukontola. 2 Ayubu kaweriti na wana saba wapalu na wahinga watatu, 3 kaweriti na kondolu elufu saba na ngamia elufu tatu na wang'ombi elufu yimu wa kulimira na punda shidala miya tanu na wantumintumi wavuwa nentu. Yomberi kaweriti mlunda nentu kuliku wantu woseri aku kwagulawa mshenji.

4 Wana wakuyi walishemiraniti kuliya na kulanda ukaya kwa kila yumu gwawu kwa lishaka lyakuyi, wawashemiriti wadada wawu kuliya na kulanda pamuhera nawu. 5 "Kila pawamalira kutenda hangu, Ayubu kimukiti mandawira putiputi na kulaviya tambiku za kulunguziwa kwa kila mwana yumu gwakuyi toziya kaliholiti pamonga wana wakuyi watenda vidoda na kumkalaziya Mlungu mumiyoyu mwawu."

6 Lishaka limu malaika wa Mlungu wagenditi kuliranguziya palongolu pa Mtuwa Mlungu na shetani viraa kawera pamuhera nawu. 7 "Mtuwa Mlungu kamkosiya Shetani, gulawa koshi?

Na Shetani kamwankula Mlungu, ndawa kutyangatyanga na kuzyengetazyengeta pasipanu.

8 Mtuwa Mlungu kamgambira Shetani, gumwona ntumintumi gwangu Ayubu. Kwahera yumonga yakaweriti gambira yomberi Pasipanu poseri. Yomberi ndo muntu mwaminika, yakamguwira Mlungu na yakalitula gweka na ukontola.

9 Shetani kamwankula Mtuwa Mlungu, hashi, Ayubu kakuguwira hera? 10 Hashi, gwengandiri yagumlolera wega zoseri pamuhera na kaya yakuyi na kila shintu shakawera nashi? Gwenga gumtekelera na lunda yakuyi yongereka muisi. 11 Kumbiti vinu, gujeri kutola vyoseri vyakaweriti navi. Haguwoni ntambu yakakwigiranga pota kutira!

12 Mtuwa Mlungu kamgambira Shetani, yina, guweza kutenda shoseri shaguweza kwa lunda yakuyi. Ila nagumshinkula mweni. Su, Shetani kawuka kulongolu kwa Mtuwa Mlungu."

13 Lishaka limu wana wapalu na wadala wa Ayubu waweriti wankuliya na kulanda pamuhera munumba mwa kaka gwawu mkulu, 14 "Ntumintumi yumu kiziti kwa Ayubu pakatuga na kumgambira, tuweriti twankulima na wang'ombi. Punda na womberi waweriti wankuliya pakwegera panu. 15 Wantu wa Seba vumu watukangala na kuwatola wankanyama na kuwalaga wantumintumi kwa ligumba. Neni gweka yangu mponeka su kwiza kukugambira."

16 "Pamberi hakeni malili kutakula, ntumintumi yumonga kasoka, kalonga, lumeta lulawa kumpindi luwalunguziya kondolu na wantumintumi, neni gweka yangu mponeka su kwiza kukugambira."

17 Pamberi hakeni malili kutakula, "Ntumintumi yumonga kaziti pakatuga na kulonga, wakalidayu walipangiti vipinga vitatu wawakomanga ngamiya, wawatola na kuwalaga wantumintumi waku kwa ligumba! Neni gweka yangu mponeka su niza kukugambira."

18 Pamberi hakeni malili kutakula, "Ntumintumi yumonga kiziti pakatuga kalonga, wana waku wapalu na wadala waweriti wankuliya na kulanda divayi ukaya kwa kaka gwawu mkulu, 19 vumu liyega livuma kulawa kushiwala. Liyikoma numba ayi kila uwega nayeni iwabomokera wana woseri wahowa, neni gweka yangu mponeka su kwiza kukugambira gwenga."

20 Shakapanu Ayubu kagoloka na kapapula lihabiti lyakuyi na kumoga viri zyakuyi, kansuntamala pasi na kumguwira Mlungu, 21 "Pakalonga, ndawiti mumtima mwa mawu gwangu pota shintu na hahowi pota shintu, Mtuwa Mlungu kampananiti na yomberi kaviwusiya, litawu lyakuyi likwiswi."

22 Mumirandu yoseri ayi Ayubu katendandiri vidoda, pota kulihola kuwera Mlungu kakoseya.