1 Shakapanu Elifazi, muntu gwa Temani kankula,

2 hashi mumtu yakana luhala kankula pota kulihola

na visoweru vyakuyi vyahera mana?

3 Hashi, yakana luhala kalitakulira kwa visoweru yavifaandiri,

ama kwa visoweru vyahera mana?

4 Kumbiti gwenga gubeziya kumguwira Mlungu,

na gulewelera kumholera Mlungu.

5 Ukontola waku ndo yawukufunda kutakula,

na gwenga gusyagula kutakula gambira wazyanga.

6 Visoweru vyaku gamweni vikutoza, nenindiri,

matakula gaku gakutakulira gwamweni.

7 Hashi, gwenga ndo muntu gwa kwanja kwiwuka?

Ama gwenga gwiwukiti pamberi pa kunyawa migongu?

8 Hashi, guweriti pashotera motu sha Mlungu?

Ama gwenga gweka yaku yagwana luhala?

9 Gushimana shintu gaa yatushimanandiri twenga?

Gushimana shintu gaa yatushimanandiri twenga?

10 Pakati petu kwana wazewi wana luhala,

wana vinja vivuwa kuliku tati gwaku.

11 Hashi, Mlungu kugutenda moyu gwaku gunemeleri ndo shididini nentu?

Ama shisoweru shakuyi sha kutakula mpolimpoli ndo shintundiri?

12 Hashi moyu gwaku gukutenda gukalala

na kulaviya masu jodu,

13 ata kumgalambuka Mlungu

na kutakula visoweru vidoda gambira avi?

14 Muntu ndo gaa, ata kawezindiri kuwera na likosa kulongolu kwa Mlungu?

Yomberi yakiwukiti na mdala, kaweza hashi kuwera muntu mheri?

15 Payiwera Mlungu kawaminindiri ata malaika wakuyi,

Na mpindi ziherepa ndiri kulongolu kwakuyi.

16 Hayiweri, muntu yakawera mdoda na mpotuziya,

muntu yakatenda ukontola handa kulanda mashi!

17 Vinu gumpikiniri, naneni hanikulanguziyi,

hanikugambiri galii gamoniti,

18 mafunda ga wana luhala,

mirandu yeni wazewi wawu wayififandiri,

19 Weni Mlungu kawapanana isi ayi gweka yawu,

pota kwahera mhenga yakapititi pakati pawu.

20 Mkontola hakatabiki kwa utama mashaka goseri,

vinja vyoseri vyawapangilitwi wangesera.

21 Maziwu ga kutiriziya hagamtenderi umatu mumakutu,

pakalishera kanambatiru mwagamiziya hakamkankali.

22 Mkontola kahera litumbiru lya kulawa kuluwindu,

upeleru wakuyi ndo kuhowa kwa ligumba.

23 Kayerayera kusakula shiboga,

pakalonga, Shakoshi?

Kavimana kuwera lishaka lya luwindu lyapakwegera.

24 Ntabiku na kutama, vimtiriziya,

vimgendera gambira lishonta lya mfalumi yakakomanga.

25 Toziya katalipisiya liwoku lyakuyi kwa Mlungu.

Kankulitumba kuwera kaweza kumnkaka Mlungu Yakana likakala,

26 Katugiti kwa mtiti kumkomanga,

agawu kana lusegeyu lukulu lugangamala.

27 Sheni shakuyi kashinenepeziya kwa lipaki,

na shunu shakuyi shimema lipaki.

28 Kumbiti hakalikali mumiji ya mahami,

munumba zyazikaliritwi ndiri na muntu,

numba zyazifilitwi ziweri limamatiru lya uhalibisiya.

29 Muntu ayu hapeni kaweri mlundamali,

pota ulundamali wakuyi hapeni uwendeleyi kulikala pasipanu.

30 Hapeni kalushapili luwindu lya kuhowa.

Lipulipu za motu haziyumiziyi ntomolu zakuyi,

uluwa wakuyi hawugulusiwi na lyega.

31 Mbaka kaleki kutumbira uzigizigi na kulizyanga,

mana uzigizigi hawuweri ndo lifupu lyakuyi.

32 Hakalipwi pota kupungulwa shoseri pambeli pa kuhowa kwakuyi

na wiwuka wakuyi hapeni walikali.

33 Hakaweri gambira mzabibu yagutulusiya zabibu mbisi,

gambira mzeyituni gwagupulutusiya uluwa wakuyi.

34 Woseri yawamguwirandiri Mlungu hapeni wapati wana,

motu hagulunguziyi malingu ga watola swinda.

35 Wantu awa wapanga mipangu ya ukontola na kulera madoda.

Mumioyu yawu imema uzyanga.