1 Su vinu, Ayubu, gumpikaniri shantakula,

gupikanili visoweru vyangu vyoseri.

2 Vinu hantakuli na gwenga,

nakala kukugambira shilii shawera nashi.

3 Na muntu muheri, hangu hagujimiri shantakula,

hanikugambiri shanishimana kwa waminika.

4 Rohu ya Mlungu ndo yayiwumbiti,

na pumula ya Mlungu Yakana Makakala yimpanana makaliru.

5 Gunankuli handa guweza,

gupangi visoweru vyaku weri kulongolu kwa neni,

6 gwenga na neni tuwera teratera kulongolu kwa Mlungu,

viraa neni wumbitwi kulawa muutapaka.

7 Hangu gwahera toziya ya kuntira,

visoweru vyangu vizotopa vikutoperandiri.

8 Nakaka gutakula, naneni mpikanira.

Mpikinira goseri gagulongiti.

9 Gwenga gutakula, guherepa na gwahera likosa,

10 Gutakula viraa kuwera Mlungu kankukusakulira shidoda,

na kukuwona gambira mnkondu gwakuyi.

11 Kantawa magulu kwa minyololu,

na kulolalola maleka gaku goseri.

12 Kumbiti, nikugambira Ayubu panu gutenda likosa.

Mlungu ndo mkulu kuliku muntu.

13 Hashi gulikama nayu,

hangu pagumkosiya hapenikankuli?

14 Mlungu patakula katendera njira yimu, ama njira imonga

kumbiti muntu kavimanandiri.

15 Mlungu kayowera na wantu mukulota na mkuwona,

shaka mpota zizotopa paziwakangala,

16 Pawasizira muvitanda mwawu.

Panu kawavugulira wantu makutu gawu,

kawapapanana lyoga kwa makalipiru gakuyi,

17 Mlungu kayowera nawa su walekani na matendu gawu madoda,

na kuwusilira kutali mtiti gwawu.

18 Hangu kawatula wantu kutali na kahowa,

makaliru gakuyi nagagamira kwa ligumba.

19 Mlungu kamwazibu muntu kwa utama yawumtenda kagonji mushitanda,

utama ukolera viwungilu vyakuyi pota kuleka,

20 na yomberi kahera hamu ya kuliya shiboga,

ata shiboga shiherepa kashiwona shimfiliziyandiri.

21 Nshimba yakuyi yonda pota kumanika,

na mifupa yakuyi yayilififiti iwoneka kunja.

22 Kapagwegera kwingira mulisembi,

kuhowa kumwepela.

23 Kumbiti malayika wa Mlungu pakawera na yomberi,

yumu pakati pa maelufu ga wantumintumi wa kumpindi wa Mlungu, su kumlangaziya shilii shiheri shakutenda.

24 Kamwonera lusungu na kumgambira Mlungu,

Gumlopoli nakahowa nankugenda pahala pa wantu yawahowiti

panu nanashakutakula toziya yakuyi.

25 Panu nshimba yakuyi iwera gambira mntemba

hakawezi kuwuyira kayi handa makakala ga untemba.

26 Shakapanu hakamluwi Mlungu na yomberi hakajimirwi,

hakizi kulongolu kwakuyi kwa nemeru,

na Mlungu hakawuzilili nemeru yakuyi.

27 Hakanemeleli kulongolu kwa wantu na kutakula.

Ntenditi vidoda na kupotiziya yashifiruwitwi,

na neni ntozwandiri kwa aga.

28 Mlungu kanopoliti nanagamira kulilindi,

nsigala mkomu na mona kulangala.

29 Guloli Mlungu kamtendera muntu goseri aga.

Kayi mala zivuwa.

30 Kamlopola muntu nakahowa,

kampanana lulangala lwa makaliru.

31 Gupikanili Ayubu, gumpikiniri weri,

gunyamali na neni nikugambili.

32 Pagwana shakutakula, gunankuli,

gutakuli, mana nfira kukuwona gwahera likosa.

33 Su gunyamali, gumpikaniri,

gulikali jii neni nikufundi luhala.