1 Shakapanu, Elifazi muntu gwa Temani, kamwankula Ayubu.

2 Kwahera shintu shoseri muntu kaweza kumtanga Mlungu.

Ata yakana luhala kawezandiri kumtanga Mlungu.

3 Hashi, gulihola gumsekeziya Mlungu toziya gwahera madoda?

Ama kapata mota gaa handa gwahera likosa?

4 Su gulihola Mlungu kankukukoma na kukutoza

toziya gwenga gumpanana ligoya?

5 Ndala! Ukontola wa gwenga ndo mkulu nentu!

Udoda waku wahera mpeleru!

6 Gwenga gumpoka mlongu gwaku nguwu yakatuliti poni, gumtoliliti nguwu yimu ayi yakaweriti nayi.

7 Guwawima mashi walii yawaweriti watoka,

guwawima shiboga walii yawaweriti na njala.

8 Gwenga ndo muntu yagwana makakala, na litapaka lyoseri lyaku,

wantu wankutira. Litapaka ali likupanana makaliru gaherepa.

9 Guwatangandiri wakenja,

na kuwawonera washiwa.

10 Ndo mana gwana ntabiku zivuwa,

na ndo mana gwankulendemera kwa lyoga.

11 Luwindu likugibikira naguwona shintu,

malawa ga mashi gakugibikira.

12 Hashi Mlungu kakumpindi za kumpindindiri?

Kumpindi kuliku ntondu yaziwera kumpindi nentu!

13 Kumbiti gwenga gutakula, Mlungu kavimana shishi?

Hashi, yomberi kaweza kutoza mmawundi?

14 Mawundi gazotopa gamzyengeta nakatulola

yomberi ntambu yakagendagenda kunja mulyera lya pasipanu!

15 Hashi, gwamuwa kufata njira za makashu

zyeni wantu wadoda wazifata?

16 Wantu woseri wahowiti pamberi pa mashaka gawu,

malawa gawajega kutali.

Na waheriti pahala pa kulikala

17 Womberi wamgambira Mlungu, gutuleki!

Mlungu Yagwana Makakala guweza kututenda shishi?

18 Kumbiti Mlungu ndo yakamemiziyiti numba zawu vintu vivuwa viherepa,

kumbiti womberi wamtuliti kutali na maholu gawu!

19 Wantu wa Mlungu pawagawona aga waseka,

na wantu yawahera madoda wawaseka na wawabeziya,

20 walonga nakaka wankondu watwenga walagwa,

na shashisigaliti shilunguziwa motu.

21 Su vinu Ayubu, gumjimiri Mlungu su guweri na ponga,

na panu mirandu iherepa hayikwiziri.

22 Gwanki mafundu kulawa kwakuyi,

na guvituli visoweru vyakuyi mumoyu gwaku.

23 Pagumuwuyira Mlungu mirandu yaku hayigendi weri,

paguwusiya ukontola kutali na ukaya kwaku,

24 pagwasira kutali lunda yaku,

na zahabu ya Ofiri guyiyasiri kutali,

25 Gumtendi Mlungu yakana makakala kawera ndo zahabu yaku,

na feza yaku ya mana,

26 ndo hagumnemeleri Mlungu yakana makakala,

na gumtumbiri yomberi.

27 Hagumluwi na yomberi hakakupikaniri,

gwenga hagutendi galii gagutakuliti kwa Mlungu.

28 Shirii shagufira kutenda hashitendeki,

na kulangala hakukuwaliri njira zaku.

29 Mana, Mlungu kawasulusiya woseri yawalitumba,

kumbiti kawalopola yawananaga.

30 Mlungu kamlopola muntu yakahera likosa,

gwenga hagulopolwi kwa matendu gaku gaherepa.