1 Nilitawa nakamu namweni

nagamlola mhinga kwa matamata.

2 Mlungu Yakana Makakala kawatoza,

wantu yawatenda hangu.

3 Kagalagalira malaguwa kwa wantu yawatenda ukontola,

na kuwatoza wantu yawatenda madoda. 4 Mlungu kagawona gantenda,

na kugawona makaliru ga nkala.

5 Payiwera nilikala kwa kufata mpayu,

na kugenda kuwapayira wantu,

6 nimluwa Mlungu katakuli kuwera,

neni nahera likosa.

7 Payiwera nilikandiri ntambu yayifiruwa ama moyu gwangu gufwata matamata ga nshimba yangu,

ama mawoku gangu gadodisiwa na vidoda,

8 su shayaliti kaliyi muntu yumonga

viboga vyangu mlirambu vitupulwi.

9 Payiwera neni nanamatamata kwa mdala gwa muntu,

ama kumgwadira gwapakwegera gwangu,

10 su, mdala gwangu kamtelekeri shiboga mpalu yumonga,

ama wapalu wamonga wagonji nayu.

11 Mlandu agu ndo likosa likulu na lyakukalaziya,

ukontola weni ufiruwa kutozwa.

12 Likosa lyangu liwera gambira motu gwa kununguziya

na kunagamiziya, na kulunguziya nakamu vintu vyangu vyoseri.

13 Payiwera niwapananandiri shilii shawafiruwiti wantumintumi wangu wadala na wapalu,

pawanjegiriti malalamiku gawu,

14 hantendi shishi Mlungu pakaliwona na neni?

Pakanolanola hanimwankuli shishi?

15 Mana Mlungu ndo yakamumbiti neni na ntumintumi gwangu, yomberi ndo yakatuwumbiti twawoseri twenga.

16 Payiwera niwawima shawafira wahushu,

ama kugaleka masu ga wakenja gasindi kulola,

17 Ama ndiya shiboga shangu ulanamweni, pota kuwatanga washiwa shoseri?

18 Kumbiti! Kwanjira untemba waneni wera mlera gwawu,

kwanjira uwana wangu niwalongoziya wakenja.

19 Hashi, nimwoniti muntu kuhowa kwa kukosa nguwu,

ama mhushu yakahera nguwu ya kuvala,

20 nimpananiti livuki kwa kumvalisiya nguwu ya mibahira ya kondolu wangu,

Na yomberi kantekelera.

21 Kwakuwatanga washiwa,

hampendelewi kumahakama,

22 Mlungu na kankomangi neni payiwera mirandu ayi yanakaka,

na hanjimili nkomangu ayi.

23 Toziya ntira kukomangwa na Mlungu,

wezandiri kusegelera ukulu wakuyi.

24 Litumbiru lyangu nilitula muzahabu, ama niyigambira zahabu iherepa, Gwenga ndo uponera wa neni.

25 Hashi menemeleli uvuwa wa ulunda wangu, ama, kulitumba vyampatiti vya mawoku gangu?

26 Handa nguwiliti mshenji paguwala,

na lyezi palipata muherepa wakuyi,

27 na moyu gwangu gujerwa su kuviguwira,

naneni niganonera mawoku gangu kwa ligoya,

28 viraa awu mewuweri ukontola wa wakwazibiwa na watoza,

mana meweri udoda kulongolu kwa Mlungu yakawera kumpindi.

29 Hashi nsekelela kwagamira kwa mnkondu gwangu,

ama kusekelera pakapatitwi na magamiziya?

30 Ndala! Nimtakulindiri muntu yoseri madoda,

kwa kumpangira su kahowi.

31 Wantumintumi wangu woseri watakula pota kufifa,

kila mhenga kashemerwa ukaya kwaneni.

32 Yakawera na mwanja kagonjandiri kunja munumba yaneni,

niwalekandiri wagonji kunja.

33 Nfifa makosa gangu gambira wamonga?

Nema kujimira vidoda vyangu?

34 Ntirindiri kugoloka kulongolu kwa shipinga sha wantu,

pota kunyamala ama kulitatira mnumba kati, kwa kutiliziwa na beziya zawu.

35 Meyiweri mbaka kuweri na muntu gwa kumpikanira!

Nililapa kila shantakuliti shanakaka.

Nimgambira Mlungu Yakana Makakala kanankuli!

Pamonga masitaka gawandavilira wankondu waneni megalembwi!

36 Menigavali kwa malingu mumawega,

na kulivalisiya kumtuwi gambira lijenjeri.

37 Menimwalangiri Mlungu kila shintu shantenditi,

menimgenderi gambira mwana gwa mfalumi.

38 Payiwera niwa litapaka lyanililima,

lilambu melinsitaki payiwera ntenda hangu,

39 Payiwera ndiya viboga pota kulipa,

ama kuwalaga wenikaya,

40 su misontu imeri pa nganu,

na magugu pa shayiri.

Matakulu ga upeleru ga Ayubu.