1 Kumbiti vinu wantu wankuseka, wantu yawaweriti wapusu kuliku neni,

wantu weni watati wawu niwawoniti wafaandiri,

ata kuwalola wang'ang'a waneni yawalolera kondolu waneni.

2 Mempati shishi kulawa kwa womberi,

wantu weni makakala gawu gaweriti gawapelera.

3 Waweriti wahushu nentu toziya waweriti wananjala,

wasakuliti shiboga kushiwala pashiru,

wasakuliti kuliya ata mishigira pahala papawerandiri na wantu. 4 Wapiti mihambi kulidowi waliya,

waliyiti ata mishigira ya mtera.

5 Wawingitwi kutali na wantu,

wantu wawabotera gambira wavimbegu.

6 Su wafiritwi kusakula uponeru munshemba za mashi mumpanga,

kumalindi mlitapaka na mumatalabuwi.

7 Kuntundu aku waliliti gambira wankanyama,

wajojonikiti pamuhera pasi kushisaka.

8 Waweriti wazigizigi nentu na yawabeziwitwi nentu,

wantu wawawingira kutali na muisi yawu,

9 Su vinu wana wawu wankunseka,

na wankunjongera neni.

10 Wankalalira na kushapira,

pawamona neni wantemera mata kusheni.

11 Toziya Mlungu kampusilira makakala na kunsoniziya,

wawera lekeru kuntendera ntambu yawafira.

12 Shipinga sha wantu shigoloka kunsitaki pashisakula kunkusiya kwa kunyambira,

shinkomanga su kunaga.

13 Watu awa wadiwa njira yangu,

wongera maya ga neni,

na kwahera muntu gwa kuwalewelera.

14 Wanizira kila uwega,

na kunkopokera shaka paweriti pasi su wantagi,

15 Nkolitwi na lyoga nentu,

ligoya lyangu liwusiwa gambira lyega,

gampatiti galii gawusiwitwi gambira liwundi.

16 Vinu nivimana kuwera sambira nankuhowa,

mashaka goseri ntabika.

17 Pashiru mihonju yaneni yoseri intama,

utama yawumemena upolandiri.

18 Kwa makakala gakuyi Mlungu kawera gambira nguwu kwaneni,

kantawira gambira ukosi wa nguwu yangu musingu.

19 Kanasira mulidika,

wera gambira livu na lidikudiku.

20 Nikulilira, kumbiti gunankulandiri,

na nikuluwa kumbiti gumpikanirandiri.

21 Gwenga gugalambuka kuwera mnkesera kwa neni,

guntabisiya kwa liwoku lyaku lyana makakala.

22 Gunasira muliyega na kunkulusiya,

gunasa aku na aku mumakupala nentu.

23 Nakaka! Nivimana hagunjegi mukuhowa,

pahala pawanaliwoni woseri yawawera wakomu.

24 Payiwera muntu kawera muntabiku kaluwandiri utanga,

na ndililiti utanga mushiwembu shakuyi?

25 Hashi, niwaliliritindiri yawaweriti na ntabiku?

Ama monitindiri kutama toziya ya wahushu?

26 Kumbiti pahepeliti maheri, madoda gampatiti,

pandoliti lulangara luwindu linizira

27 moyu gwangu gushashatika pota kunyamalira,

mashaka ga ntabika gampata.

28 Ulweli utenda likuli lyangu liweri lititu ila kwa kungulandiri kwa mshenji,

ngoloka paweru kuluwa utanga.

29 Ndira gambira shibweta,

na ganja gwa lisisigira.

30 Lukuli lwangu luwambuka,

mihonju yagu ilwala kwa malweri. 31 Lingutinguti lyangu liwera lya kutenda shiwembu,

na mluli gwangu guwera gwa kudayilira.