1 Shakapanu, Mtuwa Mlungu kamwankula Ayubu kulawa kulyega lya shivyulavyula.

2 Gaa gwenga yaguvuluvusiya matakula gangu,

kwa visoweru vyahera mahala?

3 Gukamali handa mpalu,

na neni hanikukosiyi,

na gwenga gunankuli.

4 Guweriti koshi pantuliti miyanjiru ya pasipanu?

Gung'ambili, handa gwana umani.

5 Gaa yakatuliti vipimu vyakuyi?

Nakaka gwenga guvimana!

Ama gaa yakatalipisiyiti lugoyi pampindi pakuyi kuyipima?

6 Hashi mpanda za pasipanu zigolosiwa pampindi pa shishi,

ama gaa yakatuliti libuwi lyakuyi lya lyanjiru,

7 ntondu za mandawira paziweriti zakwimba pamuhera,

na wana wa Mlungu wabotanga kwa kufyapilira?

8 Gaa yakatatiti malawa ga bahari

shaka pagalawiti na kuvuma kulawa mmashi matali.

9 Neni ndo yang'ibikiti bahali kwa mawundi

na kuyivilingisiya luwindu luzotopa.

10 Niyituliriti bahari mbaka,

niyidiwira bahari pahala pakuyi.

11 Niyigambira bahali, upeleru waku ndo panu, nentu ndiri!

Makupala gaku ga makakala hagapeleri panu.

12 Ayubu, kwanjira kwiwuka kwaku gulagaliliti mandawira iyanji?

Na kulagalila mshenji gulawi,

13 guwugambirandiri langala kugibikila pasipanu,

na kuwawingira kutali wakontola?

14 Kulangala pakwiza, wantu wawona pasipanu,

mishoru na rangi viwoneka gambira nguwu ya langi.

15 Kumbiti wakontola hapeni wawuwoni kulangala aku,

na wawezandiri kutenda mirandu yawu mikondola.

16 Hashi, gusoka kumbwiru za bahari?

Ama kugendagenda pampindi pa mashi matali ga bahari?

17 Hashi, wakulanguziyiti kala migomi ya kuhowa,

ama kuyiwona migomi ya kaya ya luwindu dunyu?

18 Hashi, guvimana ukulu wa pasipanu?

Gung'ambili handa guvimana goseri aga.

19 Njira ya kusoka ukaya kwa kulangala ndo koshi?

Ukaya kwa luwindu ndo koshi?

20 Hashi, guweza kuviwuziya ukaya kwakuyi?

Guvimana njira za kusoka ukaya kwakuyi?

21 Gwenga gufiruwa kuvimana,

gwenga gulikariti vinja vivuwa!

22 Hashi, gwingiliti kala muluhanja lwa balafu,

ama kuwona luhanja lwa mvula ya mabuwi,

23 vyeni nivitula su niviltendeli toziya ya shaka sha ndewu,

toziya ya mashaka ga makomangu ga nkondu?

24 Yoshi njira ya kugenda pahala lumeta palubagulwa,

ama aku kwakulawa lyega lya kwagulawa mshenji gupalasiwa pasipanu?

25 Gaa yakabawiti njira ya mashi

kuliyera kwajili ya mvula.

Gaa yakalanguziyiti lupanda njira yakuyi kumawundi?

26 Gaa kayitenda mvula kutowa kulitapaka kwakalikalandiri muntu na shiwala shasha hera muntu?

27 Mvula itowerwi su isi iyuma na yahera mashi,

kuyitenda imeri ntundu.

28 Hashi, mvula ina tati

Ama gaa kagalera mandonda ga mangami.

29 Balafu ilawa mumtima gwa gaa? Ndo gaa yakaleliti barafu? 30 Mbepu yitenda mashi kuwera gakamala gambira libuwi, na sheni sha bahari shilibata.

31 Guloli vipinga vya ntondu.

Hashi, guweza kuyitawa minyololu ntondu yayishemwa Kilimili,

ama kulegiziya vitawaliru vya ntondu yayishemwa Orioni?

32 Guweza kuzilonguziya ntondu mushaka shakuyi,

ama kumlonguziya kanyama yawamshema Dubu pamuhera na wana wakuyi?

33 Hashi, guvimana lagiru zazikolamlima mpindi?

Guweza kuzipangiya ntambu yakuyi pasipanu?

34 Hashi, guweza kubota na kugugambira mawundi

gakugibikiri kwa mnyililiku gwa mvula?

35 Na kulagalira lumeta lumeti,

halukwiziri na kutakula, napanu?

36 Gaa kampanana muntu luhala

su kayimani mirandu mumahala gakuyi?

37 Gaa yakana luhala lwa kuweza kuwalanga mawundi,

ama kung'ong'onaziya viwiga vya mashi kumpindi aku?

38 Su lidikudiku lya pasipanu lilikolana

na utapaka ulikolani na kuwera madikudiku?

39 Hashi, guweza kumwingira simba mawinga gakuyi,

ama kumalira hamu ya wana simba,

40 pawalififa mumpanga zawu,

ama kugonja mwawalififa pawalotera?

41 Gaa yakawapanana kunguru shiboga shawu,

wana wawu pawandilira neni Mlungu,

pawaguluka aku na kulii kwa njala?