1 Nigakalalira nentu makaliru gangu aga!

Malalamiku gangu hanongi pota shilewaleru.

Hanongi ntambu yagawera mumoyu mwangu mana gana utama.

2 Hanimgambiri Mlungu, naguntoza.

Gung'ambili handa gwana masitaka gaa na neni.

3 Hashi, ndo iherepa kwa gwenga kumonera,

kugambeza mahengu ga mawoku gaku

na kuyipendeleya mipangu ya wakontola?

4 Hashi, gwana masu handa muntu? Guwona vintu ntambu yakawona muntu?

5 Hashi, mashaka gaku gambira ga muntu? Ama vinja vyaku handa vya muntu?

6 Ata guwulolalola ukontola wangu,

na kuvisakula vidoda vyangu?

7 Gwenga guvimana kuwera neni nahera likosa,

na kwahera gwa kundopola kulawa mumawoku gaku.

8 Mawoku gaku gantenda weri ntambu yawera,

kumbiti vinu gugalambuka na kunagamiziya.

9 Guliholi kuwera guwumbiti kwa litapaka.

Hashi, hagumbuziyi kayi mumadikudiku?

10 Su, gumpanana makakala tati gwangu su wampati neni,

Guntenda nkuli mumtima mwa mawu gwangu?

11 Guwumbiti nshimba yangu kwa mihonju na mishipa,

guyigibikira mihonju ya neni kwa shinofu na likuli.

12 Gumpanana ukomu na kuntendera maheri,

muulolera waku guyiponiziya rohu yangu.

13 Ata mirandu ayi guyififiti mumoyu.

Kumbiti nivimana kuwera ayi meyiweri nfiru yaku.

14 Guweriti gwankuhepelera su gumoni handa hantendi vidoda,

su gulemi kundekiziya ukontola wangu.

15 Handa neni ndo mkontola, hantabiki!

Handa payiwera neni ntenda yagafiruwa, mbezandiri kulizyuma,

toziya mema soni, panikulola kutabika kwangu.

16 Handa panilitenda nashikambaku, haguwingi gambira simba

na kumposhola kayi kwa mauzauza gaku.

17 Kila mala gunjegera ukapitawu su wandiwiri neni,

na kongera maya gaku kwa neni,

gunjegera wankondu wasyayi wankomangi.

18 Gwee Mlungu, ntambu gaa gundekiti neni niwuki?

Mbaka mehowi pamberi pa wantu kumona.

19 Menjegwi mulisembi,

pawera handa muntu yakaweritindiri.

20 Hashi, mashaka ga makaliru gangu madidinindiri?

Gundeki nilinomi.

21 Pamberi pa kugenda aku kweni hapeni mbuyi,

aku kuisi ya hinginiku na luwindu totolu,

22 isi ya hinginiku na ndewi,

kweni uweru wakuyi ndo handa luwindu.