1 Shakapanu Sofari, muntu gwa Naamati, kankula.

2 Maholu gangu gantenda nikwankuli,

toziya nsinda kunyamala.

3 Shagung'ambira ndo mayigalangu,

kumbiti niyimana ntambu ya kunkwankula.

4 Nakaka gulyaluwa mlandu agu,

kwanjira makashu Mlungu pakamuumbiti muntu pasipanu,

5 Mkontola hakaliwoni kasinda katepu hela,

nemelera yakuyi yakamguwira ndiri Mlungu ndo shaka shididini hera!

6 Hakaliholi kuwera yomberi ndo mkulu kuliku woseri,

mekalitumbi toziya ya ligoya lyakapananwa na wantu,

7 Kumbiti hawamwasiri kutali gambira mapimba gakuyi.

Yawammaniti hawalikosiyi ka koshi?

8 Hakagamili handa kulota, hapenikawoneki kayi,

hakafutiki gambira malola ga pashiru.

9 Yakamwoniti, hapenikamwoni kayi,

pota pakalikaliti hapeni pamamaniki kayi.

10 Ulamweni hakawuziyi lunda yakuyi yoseri yakawapokiti wantu,

wana wakuyi hawaluwi utanga kwa wahushu.

11 Tembera kalipikanira kamema makakala ga untemba,

kumbiti zoseri hazigonji pamuhera na yomberi mulidikudiku.

12 Mkontola kanemelera kutenda vintu vidoda, gambira kuliya shiboga shinoga,

pakamalira kutenda ukontola kendeleya kulihola awu,

13 kalema kuulekeziya nawugenda,

ila kawukolera mumlomu mwakuyi.

14 Kumbiti pawusoka mumtima uwera ukalipa,

ukalipa gambira usungu wa njoka.

15 Mkontola kamira lunda zakiwiti na kuzihukula,

Mlungu hakazilaviyi mumtima gwakuyi.

16 Shakazulumiti muntu mkontola kwakuyi ndo gambira usungu wa njoka,

hakalaguwi kwa kulumwa na njoka.

17 Hapeni kalikali na kuwona uvuwa wa mpatiru,

pota hapawawoni ntekelera na ulunda.

18 Vyoseri vyakavipatiti hakaviwuziyi pota kuviliya,

hapenikavinemeleri vintu vyakavitenderiti lihengu,

19 toziya kawagamiziya wahushu na kuwaleka,

kawapoka numba zakazinyawitindiri.

20 Mashaka goseri hakafiri kuwera na vintu vivuwa, hakatoli shoseri shakafira kaweri nashi.

21 Vinu kwahera shoseri shasishigala sha kutola yomberi,

su, ulunda wakuyi hawusoki upeleru.

22 Mumpatiru zakuyi zivuwa hakapati ntabiku,

madoda hagampati kwa makakala goseri.

23 Gumleki kaliyi ntambu yakafira,

kumbiti Mlungu hakamjegeri nkalaliru yakuyi

imnyililikiri gambira shiboga shakuyi.

24 Pamonga hakashapili ligumba lya shuma,

kumbiti hakasomwi na msali gwa shaba.

25 Msali hagusomolwi kulawa munshimba yakuyi,

kusongoka kwakuyi hakuwusiwi kumgongu gwakuyi pakung'ereng'eta

vitiliziya vya kuhowa havimkankali.

26 Hanja zyakuyi hazihalibisiwi,

Mlungu hakalagaliri motu gumlunguziyi

shoseri shashisigaliti ukaya kwakuyi hashilunguziwi.

27 Mpindi hazilangaziyi ukontola wakuyi,

pasipanu hapalawiri ukapitawu kwa yomberi.

28 Lunda zakuyi hazitolwi

mulishaka lya maya ga Mlungu.

29 Ashi ndo Mlungu shakampangiliti muntu mkontola,

na awu ndo uhala yawulawiti kwa Mlungu.