1 Shakapanu Ayubu kankula.

2 Hamwendereyi kuntabisiya mpaka ndii,

na kumegangamenga kwa visoweru vyenu?

3 Mala zoseri azi kumi munigiranga.

Hashi muwonandiri soni kuntendera vidoda?

4 Handa meweriti nkosa nakaka,

likosa lyangu ndo lyangu namweni.

5 Muntenda moneki nahera mana su mwenga muwoneki wa mana,

munigiranga kwa kulinanagaziwa kwangu.

6 Mvimani kuwera Mlungu kantendera madoda,

na kumbata mumgomiziwu gwakuyi.

7 Tembera ndira ntenderwa madoda,

kumbiti nankulitwindiri.

Tembera nduwa utanga kumbiti mpatandiri shanfiruwa kupanana.

8 Mlungu kadiwa njira ya neni nampita

kazitula luwindu njira za neni.

9 Kawusiya ulunda wa neni

na kantenda nampananwa ligoya.

10 Kamega wega zoseri naneni mpera,

kaliwusiya litumbiru lyangu gambira mtera.

11 Mlungu kankalalira nentu,

na kamona gambira mnkondu gwakuyi.

12 Wamashonta wakuyi wanizira pamuhera,

wanyawa njira kwiza kwa neni,

wanyawa ngonjeru kuzyengeta numba yaneni.

13 Mlungu kawatula walongu wangu kutali na neni,

waganja wangu wapamuherandiri na neni.

14 Walongu wangu na waganja wangu wantangandiri kayi.

15 Wahenga mnumba mwaneni wandyaluwa,

wayaya wangu wamona gambira namuhenga.

Kwa womberi wera muntu yawamanandiri.

16 Nimshema ntumintumi gwangu kumbiti kitikandiri,

ata panimluwiti kantangi kanankula ndiri.

17 Mdala gwangu kalonga pumula yangu inunka,

walongu wangu wakala kutali na neni.

18 Ata wana wadidini wambeziya,

pandawira womberi wambolera.

19 Waganja wangu wapakwegera wakalaziwa naneni,

walii yawaweriti niwafira wangalambuka.

20 Nshimba yaneni isigala mihonju na likuli,

mponera padidika hera kuhowa.

21 Mumoneri lusungu, mumoneri lusungu mwenga waganja waneni,

mana Mlungu kantenda ntabiki.

22 Namunkomanga Mlungu ntambu yakankomanga?

Ntambu gaa mtosiwandiri na nshimba yaneni?

23 Meyiweri mbaka visoweru vyangu mevilembwi!

Mevilembwi mushitabu!

24 Meyiweri mbaka visoweru vyangu mevisongorwi kwa shuma na lisasi,

pampindi pa libuwi su vikali mashaka goseri!

25 Nivimana kuwera mlopola gwangu mkomu,

upeleru yomberi hakanteteyi pasipanu.

26 Ata likuli lyangu palihalibisiwa hangu,

pawera nankali na shimba ayi hanimwoni Mlungu.

27 Haniliwoni na yomberi,

namweni neni pota muntu yumongandiri. Gulori moyu gwangu gwana nfiru na gwenga

28 Waganja wangu namlihola kuwera njira zamuntendera su nendereyi kutabika.

Mwenga mlonga aga nilifilira namweni ntabiku

29 Kumbiti mwenga maweni mtira makomangu, mana nkalaliru ijega makomangu,

shakapanu mwenga hammani kuwera Mlungu ndo mtoza.