1 Ayubu kendereya kutakula, 2 nilirapa kwa Mlungu yakawera mkomu,

yakambusiliriti mirandu yayiweriti gangu,

Mlungu Yakana Makakala yakantenditi neni weri na utama

3 Ntambu yanendeleya kulikala,

na rohu ya Mlungu payendeleya kuwera mngati mwangu,

4 neni hapeni ntakuli mpayu,

pota kuwazyanga wantu.

5 Mbezandiri kutakula gambira mwenga mzumba nakaka

mpaka kuhowa kwaneni ntakula nahera likosa.

6 Hapeni ndeki kutakula nahera makosa

Mumoyu gwangu kwahera sha kuntoza.

7 Mnkondu gwangu kapati azabu ya mkontola,

yakagoloka kundawumu kakomangwi gambira mdoda.

8 Muntu yakampananandiri ligoya Mlungu kana litumbiru gaa,

Mlungu pakamwusiya mkontola,

na pakamwusilira ukomu wakuyi kana litumbiru gaa?

9 Hashi, pakapatwa na ntabika,

Mlungu hakapikaniri kulira kwakuyi?

10 Mkontola hapeni kanemeleri kulongolu kwa Mlungu yakana makakala,

hapakawezi kwendeleya kumluwa Mlungu.

11 Haniwafundi uwezu wa Mlungu ntambu yawuwera,

hapeniniwafifi mipangu yakuyi Mlungu Yakana Likakala.

12 Kumbiti mwenga muvinamana weri mlandu agu muliwona ali maweni,

Hashi, mtakula visoweru vyaviwerandiri na mana?

13 Ashi ndo Mlungu shakamtuliliti muntu mkontola,

shawampangiriti muntu yakawonera wantu ndo ashi.

14 Ata wana wakuyi wapalu pawawera wavuwa,

kumbiti hawalagwi kunkondu,

wiwuka wakuyi hapeni waweri na shiboga shivuwa.

15 Walii yanawaponeka kunkondu, hawahowi kwa malweri,

na wakenja wawu hapeni wawaliliri.

16 Ata pakamamatira mpiya gambira lidikudiku,

na nguwu zivuwa ata wasindi kuvala,

17 hakamamatili hera, kumbiti muntu yakamfiriziya Mlungu ndo hakazivali,

na mpiya zakuyi hawabagulani wantu yawahera likosa.

18 Numba yakayinyawa mkontola ndo gambira ubunta wa buyibuyi,

ndo gambira shisasa sha mlolera kulirambu.

19 Kagonja pakawera mlunda,

shaka pakavugula masu gakuyi ulunda wakuyi wagamira.

20 Vitiliziya vimkangala gambira malawa,

pashiru kapatwa na shimbunga.

21 Lyega lya kwagulawira mshenji limugulusiya kagamira,

lifyagilira kutali kulawa pakalikala.

22 Lyega ali limkankala pota lusungu,

hakajeri kutuga kumbiti mbiru za hera.

23 Lyega limbolera pakatuga,

na kumdokola kulawa pahala pakuyi.