1 Shakapanu Bilidadi muntu gwa Shuhi kamwankula Ayubu,

2 Hagutakuli mirandu ayi mpaka ndii?

Mpaka ndii visoweru vyaku haviweri hera handa liyega?

3 Gulishera Mlungu kankutenda ntambu yayifiruwa?

Hashi, gulihola Mlungu Yakana likakala kaweza kugalambula unakaka kuwera upayu?

4 Payiwera wana waku wamtendera vidoda Mungu,

yomberi hakawakomangi kulawirana na gawatenditi.

5 Handa pagumsakula Mlungu,

na kumluwa ayu Mlungu Yakana likakala,

6 handa gwenga gwana moyu guherepa na kulikala ntambu yakafira Mlungu,

nakaka Mlungu hakizi kukutanga,

na kukupanana pahala pakulikala yapafiriziwa.

7 Tembera gwanjiti kulikala na vintu vididini

makaliru gaku ga shakapanu hagaweri gaherepa nentu.

8 Gulifundi kwa walii yawatulongoleriti,

gutendi mirandu yawayambulitwi yawatulongoleriti.

9 Hangu twenga twiwuka mashaka gatangalandiri, tuvimana ndiri vintu,

mashaka gatwenga pasipanu ndo shivuni yashipita.

10 Kumbiti womberi hawakufundi na kukugambira,

mirandu yawalifunditi.

11 Mitefu imera hera papawera na mashimashi,

miteti iherepa pahala pamashimashi

12 Payindeleya kukula pamberi pa wantu kudumla

na payikosa mashi miteti ayi iyuma kalongola kuliku mihambi imonga.

13 Ayi ndo ntambu yawawera woseri yawamwaluwa Mlungu.

Litumbiru lya yawamwaminindiri Mlungu halyagamiri.

14 Shirii shawashitumbira hashiweri shahera mana,

hashiweri handa ubunta wa buyibuyi.

15 Hawegemeri ubunta kumbiti hapeni uwatangi,

wawukolera kumbiti ulikalandiri

16 Wantu yawamleka Mlungu hawaweri gambira mtefu,

payiwera panamashi na mshenji hayimeri pahala poseri.

17 Mishigira yakuyi iripotapota mumabuwi

na yomberi kagenda kulolalola mngati mlitalabuwi.

18 Kumbiti pawawusiwa awa pahala pakuyi pakulikala,

kwahera yakamana kuwera kuweriti nawa.

19 Guloli, awu ndo upeleru wa nemeleru ya wantu awa,

na pahala pakuyi hapaweri na wantu wamonga.

20 Guloli! Mlungu hapeni kamlemi muntu yakahera likosa,

pota hapeni kawatangi wantu wakontola.

21 Su hakakutendi guweri na sekeleru,

na hakakutendi guweri na nemeleru.

22 Walii yawakukalalira hawawoni soni,

pahala pa kulikala wantu wakontola hapagamiri nakamu.