1 Wantu wana mahengu gakamala pasipanu,

wafiruwa kutenda mahengu mashaka goseri gambira shibaluwa,

2 yomberi gambira mmanda yakafira shivuni,

gambira muntu yakana lihengu yakahepera shibena mgongu shakuyi.

3 Mumiezi yoseri nahera shoseri shashiweza kuntanga kulikala,

pashiru mpaka pashiru nana utama.

4 Pangonja nonga, Hanimuki ndii?

Toziya masaa ga pashiru gawera matali nentu,

ngalangata mushitanda mpaka pawushiya.

5 Nshimba yaneni imema wampekenyi na ushafu,

likuli lyaneni liyuma na lilawa ufira wa lipu.

6 Mashaka ganeni hagaperi

na ntumbirandiri shoseri shashintenda weri mbaka.

7 Gwee Mtuwa Mlungu, makaliru ganeni gambira pumula hera,

nivimana kuwera hapeni liwoni liheri lyoseri kayi.

8 Yakamona vinu, hapeni kamoni kayi,

katepu hera pagundola hanagamili.

9 Gambira liwundi ntambu yaliwuka,

ndo handa wantu ntambu yawahowa pota kuwuya.

10 Hapeni kawuyi kayi kulikala,

na wantu wamlwaluwa.

11 Hangu hapeni nyamali,

Hanongi galii yagawera mumoyu gwangu,

handalami kwa utama wa moyu gwangu.

12 Hashi, neni ndo bahari ama kanyama mkulu nentu gwa mubahari,

ata guntulili ulolera?

13 Panonga Shitanda hashintendi noyeri,

kugonja kwaneni hakumpunguliri, malalamiku gangu,

14 gwenga gwiza kuntiliziya mu kulota,

guntiliziya kwa kunjegera malola,

15 su mona, mbaka nilikongeri,

kuliku kwendeleya kupata ntabiku azi.

16 Nkalalira kwendeleya kulikala.

Hapeni nilikali kayi. Mundeki, mana makaliru gangu shintundiri!

17 Muntu ndo gaa ata gumloli?

Ntambu gaa gumhola nentu?

18 Gwenga gwiza kumlola kila mandawira,

kila lishaka gusoka kumjera!

19 Hagwendereyi kundola mpakandii,

pota kundeka ata shididini?

20 Handa pantenda vidoda, vikutenda shishi gwenga yagutatira wantu?

Hashi guntula kuwera shintu shagupangiti?

Ntambu gaa wera shisanka shaku?

21 Ntambu gaa gundekeziyandiri likosa lyangu

na kumbusilira ukontola waneni?

Sambira nankuhowa,

hagunsakuli, hapeni gumoni kayi!