1 Shakapanu Ayubu kamwankula Mtuwa Mlungu.

2 Nivimana kuwera guweza kila shintu,

shoseri shagufirakutenda shiwezandiri kulewelerwa.

3 Gulongiti, gaa ayu yakafifiti matakuziya gangu pota umani?

Nakaka ntakuliti mirandu yaniyimanandiri,

Mirandu ya kulikangasha nentu kwa neni.

Yeni nweriti niyimanandiri.

4 Gulongiti gumpikiniri vinu, na neni hantakuli,

hanikukosiyi na gwenga hagunankuli.

5 Nakaka weriti nikupikanira visoweru vyaku kwa makutu hera,

kumbiti vinu nikulola kwa masu gangu namweni,

6 Hangu su noya vidoda pamuhera na kulityelemeka malivu na madikudiku.

7 "Mtuwa Mlungu pakamaliliti kuyowera na Ayubu visoweru avi, kamgambiriti Elifazi, muntu gwa Temani pakalonga, maya gangu gawera kwa gwenga na waganja wawili. Mana myowerandiri nakaka kwaneni, gambira Ayubu ntambu yakalongiti. 8 Su vinu, mtoli ng'ombi saba na kondolu shipalu saba mumgenderi ntumintumi gwangu Ayubu na mwenga mlaviyi tambiku ya kulunguziwa toziya ya maweni. Ntumintumi gwangu Ayubu hakawaluwili mwenga. Naneni hanigajimili maluwa gakuyi su naniwatendera teratera na uzigizigi wenu. Mwenga mzumbandiri yagawera teratera kwa visoweru vya neni, ntambu yakalongiti ntumintumi gwangu Ayubu."

9 Hangu Elifazi muntu gwa Temani na Bilidadi na Mshuhi na Sofari muntu gwa Naamati, watenda gambira Mtuwa Mlungu ntambu yakawagambiriti na Mtuwa Mlungu kajimira maluwa ga Ayubu.

10 Ayubu pakawaluwiriti kala waganja wakuyi, Mtuwa Mlungu kamwuzilira Ayubu ntambu yakuyi ya kwanja. Kamwongeleriti mala mbili ya vyoseri vyakaweriti navi pa kwanja. 11 Shakapanu walongu wakuyi, wadada wakuyi na waganja yawammaniti pa kwanja wamgendera ukaya kwakuyi, waliya shiboga pamuhera na yomberi. Wamkola mawoku kwajili ya ntabiku yoseri yeni Mtuwa Mlungu kaweriti kamjegera. Kila yumu gwawu kampanana Ayubu mabuwi ga feza na peti ya zahabu.

12 Muvinja vyavifuwata Mtuwa Mlungu kamtekelera nentu Ayubu kuliku ntambu yakaweriti kwanja, su Ayubu kawera na kondolu kumi na msheshi, ngamiya elufu sita ng'ombi elufu mbili na punda shidala elufu yimu. 13 Kaweriti viraa na wana wapalu saba na wadala watatu. 14 Mhinga gwakuyi gwa kwanza wamshemiti Yemima na gwa pili Keziya na gwa tatu Kereni Hapuki. 15 Muisi yoseri ayi kuweritindiri na wanawadala waherepa handa wahinga wa Ayubu. Tati gwawu kawalekeriti uhala ntambu yakawalekeriti wakaka wawu.

16 Pa aga Ayubu kalikala vinja miya alubayini na yomberi kawawona wana wakuyi na wazukulu wakuyi mpaka shiyiwuku sha msheshi. 17 Shakapanu, Ayubu kahowa pakawera mzewi gwa vinja vivuwa nentu.