1 Muntu yakiwukiti na mdala,

kalikala mashaka madidini na geni gamema ntabiku.

2 Gabuma handa uluwa, shakapanu ganyala.

Gatuga handa shivuni na kwagamira.

3 Gwee Mlungu ntambu gaa gulishera ata kumlola?

Na kunjega kumahakama?

4 Gaa yakaweza kulaviya shintu shiherepa kulawa mushintu shidoda?

Kwahera yakaweza.

5 Mashaka ga kulikala muntu gapimwa,

gwee Mlungu, guyipanga walanga wa miyezi yakuyi,

muntu kawezandiri kupita upeleru wagumtuliriti.

6 Guloli pambwega na gumleki,

su kapati kunemelera mashaka gakuyi gambira shibaluwa.

7 Mana mtera pagudumulwa, kwana litumbiru lya kutomola,

mana ntomolu zakuyi hapazileki kutomola kayi.

8 Tembera mishigira yakuyi payiwera migona mulitapaka,

na mishigira yakuyi kuwolera mulitapaka,

9 kumbiti pagupata mashi hagutomoli,

hagulaviyi mintambi gambira shitomolu.

10 Kumbiti muntu pakahowa na awu ndo upeleru wakuyi.

Pakalaviya kala rohu kasigalwa na shishi kayi?

11 Handa mashi ntambu yagayuma mulitanda,

ama lushemba paluleka kunyiririka,

12 ndo ntambu yakahowa muntu, pota hapakimuki kayi.

Wantu hapawimuki ama kwimusiwa mu mpota zyawu.

13 Meyiweri mbaka gunfifi kumambi,

mpaka maya gaku pagapolaku,

mbaka meguntuliri shaka na shakapanu kuhola kayi.

14 Hashi muntu pakahowa kawuya kayi?

Handa meyiweri hangu neni meheperi,

mpaka shaka shangu sha ntabiku pashipera.

15 Megushemi, naneni menitiki,

shaka gwenga pagufira kumona neni mana neni nashiwumbi shaku.

16 Panu meguwezi kuwalanga maleka gangu,

na meguleki kulolalola vidoda vyangu,

17 Makosa gangu megugalekeziyi

na kugafifa kutali.

18 Kumbiti handa migongu ntambu yayimomonyoka

na matalabuwi gatupuka pahala pakuyi

19 Kutuga kwa mashi kuliya matalabuhi, mvula nkulu itenda kumong'onyoka kwa litapaka.

Ndo gwenga ntambu yaguhalibisiya litumbiru lya muntu.

20 Gwenga guwusiya ukomu wa muntu na yomberi kagamira mashaka goseri,

gushigalambula sheni shakuyi na kumwasira patali.

21 Wana wakuyi pawagohilika, yomberi kavimanandiri.

Pawapatuziwa, yomberi kawonandiri.

22 Kapikanira utama kwa nshimba yakuyi hera,

na kulidayilira hera ntambu yakuyi idoda.