1 Wantu watatu awa. Elifazi na Bilidadi na Sofari, walekiti kumwankula toziya Ayubu kaliwoniti kuwera muheri.

2 Hangu Elihu mwana gwa Barakeli kulawa likabila lya Buzi muntu gwa lukolu lwa Rama kakalala,

Kamkalaliriti Ayubu toziya Ayubu kaliwoniti mwaminika pa Mlungu kumwalangila kuwera kaminika.

3 Viraa, kawakalaliriti waganja watatu wa Ayubu,

toziya wawerindiri na shakumwankula Ayubu na hangu iranguziya kuwera Mlungu kanalikosa.

4 Elihu kaweriti kanyamala shaka wazewi awa pawatakuliti na Ayubu, toziya yomberi kaweriti mntemba kuliku womberi. 5 Kumbiti pakawoniti wantu watatu awa wasinditi kumwakula Ayubu, kaweriti na maya. 6 Su Elihu mwana gwa Barakeli, kulawa likabila la Buzi kanjiti kutakula.

Neni namntemba na mwenga mwawazewi nentu,

hangu neni ntiriti kuwagambira shaniliholiti.

7 Ntakuliti mmoyu. Guleki wana mashaka gavuwa watakuli,

wana vinja vivuwa wafundi luhala.

8 Kumbiti rohu ayi yayiwera mngati mwa muntu,

pumula ya Mlungu yakana likakala ndo imtenda muntu kuvimana.

9 Kumbiti wazewi ndiri gwaka yawu ndo wana mahala,

pota wakulundiri gweka yawu yawamana yaliwera teratera.

10 Hangu ntakula, mumpikaniri neni,

mleki na neni ntakuli shanishimana.

11 Hangu heperiti shamfiriti kutakula,

mpikaniriti matakulu yenu ya luhala,

pamuweriti mwankusakula visoweru vya kutakula.

12 Niwapikaniriti weri, kumbiti kwahera yumu gwenu yakamkankiti Ayubu,

mwawoseri msinditi kuvyankula visoweru vyakuyi.

13 Namtakula, vinu tupata luhala.

Yakafira kumkanka ndo Mlungu pota muntu ndiri.

14 Visoweru vya Ayubu viweriti ndiri toziya ya neni,

hangu hapeni nimwankuli ntambu yamumwankuliti mwenga.

15 Mwenga mwana lyoga na mperuwa visoweru,

mwenga mwahera sha kutakula nentu.

16 Su, heperi hera toziya mtakula ndiri,

nilikala hera pota kwankula shintu?

17 Neni viraa hantaviyi lyankulu lyangu,

naneni hantakuli lyanilimana.

18 Nanavi visoweru vivuwa nentu,

rohu yaneni intenda ntakuli.

19 Moyu gwangu gumema gambira divayi yayidiwitwi,

gambira mhaku gwa likuli lya divayi yasyayi kala kupantika.

20 Guleki ntakuli su weri na ponga,

guleki ntakuli.

21 Hapeni weri muwega wa muntu yoseri,

pota kutendera visoweru vya kumzyangazyanga muntu.

22 Neni manandiri kumzyangazyanga muntu,

hera hangu, Muumba gwangu mekantagi.