1 Hashi guweza kumlopola ligongolu ayu yawamshema Lewuyatani kwa ndowana?

Ama kumtawa lulimi wakuyi kwa lugoyi?

2 Guweza kupitiziya lugoyi mumpula mwakuyi

ama kudonola lisaya kwa ndowani?

3 Hashi hakendereyi kuluwa gumwoneri lusungu?

Ama kayoweri nayu visoweru viheri.

4 Hashi hakatendi lipatanu nayomberi su gumtoli kaweri ntumintumi gwakuyi mumakaliru gakuyi goseri?

5 Hashi guweza kumtawa gambira mbongu?

Ama kumtawa lugoyi kwajiri ya wahinga waku?

6 Hashi yawashuwuza hawashuwuzi kwa vintu?

Ama kubagula pakati pa yawashuwuza?

7 Hashi Ayubu guweza kumguma mgoha njoka yawamshema lewowatani mushimba yakuyi na kumlaga?

Ama kumguma msali mumtuwi gwakuyi?

8 Pagujera kumkola, hapeni gulwaluwi nkondu yakuyi,

hapeni gujeri kayi kutenda hangu!

9 Payiwera muntu yoseri kana litumbiru lya kumbata,

pakamwona hera, makakala goseri gampelera.

10 Kwahera shikambaku yoseri yakajera kumwimusiya,

ama kwahera yoseri yakaweza kugoloka kulongolu kwakuyi.

11 Mumlomu mwakuyi ilawa milipulipu yayiwaka,

nzesi za motu ziguruka kunja.

12 Haniwagambili kuusu magulu gakuyi,

na kuwalangaziya ntambu ya makakala na ukulu wakuyi.

13 Gaa yakaweza kumwambula likuli lyakuyi,

ama gaa yakaweza kumsegelera na kumtula lugoyi su kamlongoziyi. 14 Kwahera muntu yakajera kumamula mlomu gwakuyi,

menu gakuyi gawatenda wantu woseri wamtila.

15 Magamba gakuyi gawera pamuhera,

gakamala gambira shuma na itikinyikandiri.

16 Kila limu lyapakwegera na lumonga,

hewa iwezandiri kupena pakati pakuyi.

17 Ziwera pamuhera na zikolanila kila imu,

zilibatilira pamuhera na ziwezandiri kubagulwa.

18 Pakatyamula langala ing'eleng'eta, masu gakuyi gambira miyozi ya mshenji gwa mandawila.

19 Mambamba galawa mumlomu gwakuyi,

nsesi za motu zikopoka kunja.

20 Lyosi lilawa mumpula mwakuyi,

gambira kuwala mushiwiga shashipwata mumotu gwa mateti.

21 Pumla yakuyi iyakiziya makala ga mabuwi,

na mambamba ga motu galawa mumlomu mwakuyi

22 Msingu yakuyi yana makakala,

wantu watira poseri paligenda.

23 Minofu ga yanyama yakuyi galikolera pamuhera,

ikamala gambira shuma.

24 Shifuwa shakuyi shikamala gambira libuwi,

shikamala gambira libuwi lya kusagira.

25 Pakagoloka, wana likakala watira,

wana likakala wawuya kumbeli pakanja kugendagenda.

26 Pagulikoma kwa ligumba hapeni gulitendi,

pota mgoha ama msali.

27 Kwa yomberi shuma ndo gambira luberegi,

na shaba gambira mtera yaguwoliti.

28 Kwahera misali yagumtenda katiri,

ngulungu zyakagumilitwi ziwera gambira miwawi.

29 Kwa yomberi shindonga ndo gambira shipandi sha lubelegi,

na wantemba pawamwasira misali mweni kaseka.

30 Wega wakuyi wa kumtima kwana menumenu na magomboli handa vigayi vya shiwiga,

zikwalambula litapaka gambira shipandi sha shuma yashikwegwa.

31 Yomberi kagatikisiya mashi matali gambira sufuriya shashipwata,

na kukologa bahari gambira shiwiga sha lipaki.

32 Pakapita kumbeli kwakuyi kaleka njira yaying'eling'eta,

muntu mekalisheri mashi matali gana neziwu.

33 Kwahera shoseri pasipanu shashilifana na yomberi,

na katirandiri shoseri.

34 Kawabeziya wankanya woseri yawalitumba,

yomberi ndo mfalumi gwa woseri yawanamtiti.