1 Mtuwa Mlungu kendeleya kumgambira Ayubu.

2 Hashi, gwenga yagulolalola makosa hagulikami na neni Mlungu yakana makakala?

Gwenga yagwankulana na neni Mlungu, su gwankuli mirandu ayi!

3 Shakapanu Ayubu kamwankula Mtuwa Mlungu.

4 Neni nfaa shintundiri hanikwankuli shishi?

Su nankudiwa mlomu gwangu.

5 Njeriti kutakula na hapeni ntakuli kayi.

Ntakuliti nentu kumbiti hapeni nendereyi kutakula kayi,

6 Shakapanu Mtuwa Mlungu kamwankula Ayubu kulawa muupepu wa shivyulavyula.

7 Gukamali gambira gwampalu.

Hanikukosiyi na gwenga hagunankuli.

8 Hashi, gufira nakaka kuwusiya toza ya neni,

gumona nanalikosa su gwenga naguwera na likosa?

9 Hashi, gwana makakala gambira neni Mlungu gakutenda makulu?

Guweza kuyowera kwa liziwu likulu gambira lupanda?

10 Su, gulilanguziyi kuwera na ligoya na ukulu,

gulivalisiyi mweni kwa uweru na ligoya.

11 Guwawitiri wantu maya gaku makulu,

gumloli kila yakana mtiti na kumgusiya.

12 Gumloli yoseri yakana mtiti na gumsulusiyi,

guwatimbangi wakontola pahala pawawera.

13 Guwafindiri woseri pamuhera mulitapaka,

guwatawi sheni shawu mulisembi.

14 Panu hanikumani,

kuwera likakala lyaku gamweni likupanana ukanka.

15 Gumloli nkanyama mkulu ulii njoka yawamshema Behemoti,

yanimwumbiti na nikuwumbiti gwenga,

ayu kaliya ntundu gambira ng'ombi,

16 guloli makakala yagawera munshimba yakuyi,

na gulikangashi ugangamala wa misuli ya mtima gwakuyi.

17 Kagutenda mshira gwakuyi gutikinyiki gambira mwerezi,

mishipa ya mawondu gakuyi gawera pamuhera.

18 Mihonju yakuyi gambira mabomba ga shaba,

viwungu vyakuyi gambira vipandi vya shuma.

19 Yomberi ndo muwamu mwa viwumbi vya kulikangasha vya niviumbiti,

neni namweni ndo muwumba gwakuyi yaweza kumkanka.

20 Kumigongu kwana viboga vyawu

na wankanyama woseri wadinga kundundu,

21 Kaligonjeka pasi pa viputira vya misontu,

na kulififa pakati pa miteti mumatanda.

22 Kalififa mlisisi lya viputira vya misontu,

na vya mitera yayimera mumpeku mwa nshemba.

23 Lushemba palumema katirandiri, yomberi kalilimukandiri kwa lyoga,

katirandiri lushemba Yoridani palumema mumlomu.

24 Gaa yakaweza kumdiwa masu na kulibata,

Gaa yakaweza kumtobola mpula kwa mgomiziwu?