1 Shakapanu Bilidadi, muntu gwa Shuhi kankula.

2 Hagusakuli visoweru vya kutakula mpaka ndii?

Guliholi weri na twenga hatutakuli.

3 Ntambu gaa, gututenda gambira wankanyama?

Hashi gutuwona twenga kuwera wazigizigi?

4 Gwenga gulipapula gamweni kwa maya gaku.

Ntambu gaa pasipanu palekwi hera toziya yaku

ama matalabuwi gahamiziwi kulawa pahala pakuyi?

5 Koloboyi ya muntu mkontola izimiwa,

mlipulipu gwa motu gwakuyi haguzimiki.

6 Munumba yakuyi kulangala ndo luwindu,

na koloboyi yayimyakira hayizimwi.

7 Maleka gakuyi matali hagafupiziwi,

mipangu yakuyi hayimgusiyi pasi.

8 Lwayu zakuyi mweni hazimgomiziyi,

kila pakagendagenda hakapatukili mlirindi.

9 Mgomiziwu gumbata mshisukulumbi,

lugoyi lumkongera ng'ering'eri.

10 Kafifirwa ligoyi lwa kumgomiziya mulitapaka,

kayambirwa mgomiziwu munjira yakuyi.

11 Lyoga likulu limtiriziya kila uwega,

limfata mukila lileka lyakuyi.

12 Kaweriti na ulunda, kumbiti vinu kana njala,

matenduwa gakala kumgusiya.

13 Ulweri udoda wankuliya likuli lyakuyi

malweri yagajega kuhowa galiya viwungiru vyakuyi.

14 Wakontola woseri hawatupurwi muliringu lyakuyi lyakalitumbiriti

na kujegwa kwa mfalumi gwa kutiliziya.

15 Motu hagupambiri kila shintu muliringu lyakuyi,

motu gwa shibiriti haguweri kila pahala munumba zawu.

16 Yomberi gambira mtera yaguyumiti mishigira,

ntambi zakuyi pampindi zinyala.

17 Muisi kwahera yakafira kumhola,

litawu lyakuyi hapeni likantwi kayi mnjira.

18 Mkontola hakawusiwi muulangala na kwasirwa mluwindu,

kawingwa kutali kulawa pasipanu.

19 Kahela wana pota wazukulu,

kwahera yakasigaliti pakaya pakuyi,

20 Wantu wa kwaguzyetera mshenji walikangasha kwa galii yagampatiti,

lyoga haliwapati wantu wa kwagulawira mshenji.

21 Aga ndo galii yagawapatiti yawamsherandiri Mlungu,

Panu ndo pahala palii wantu yawamanandiri Mlungu.