1 Su Ayubu kanja kutakula kayi. 2 Meweri gambira makashu,

shaka shilii sheni Mlungu pakandoliti,

3 mashaka goseri Mlungu kaweriti pamuhera na neni,

na kawera lulangala pang'endangenda muluwindu.

4 Ashi shiweriti shaka sha mpatiru,

Mlungu ndo ganja gwangu na kalolera numba yangu.

5 Mlungu Yakana Makakala kaweriti pamuhera na neni,

na wana waneni waweriti pakwegera na neni.

6 Shaka ashi ngombi na wambuzi waneni walaviyiti maweli mavuwa

na mizeyituni yaneni ilaviya lipaki.

7 Pang'enditi kuligomi lya mji,

na kulivaga pamuhera na wazewi wa mji,

8 wantemba pawamoniti wagolokiti pampeku,

na wazewi yawalivagiti, wagolokiti kwa ligoya.

9 Wakulu pawamoniti walekiti kuyowera

watula shala pamlomu kuwagambira wantu walikali jii,

10 Yawamanikaniti nentu wanyamala,

na miromu yawu itatwa.

11 Kila yakapikaniriti visoweru vyangu kanfiliriti maheri

na pakamoniti, kajimiriti visoweru avi handa vya nakaka.

12 Toziya nimlopoliti mhushu yakanduwiti utanga,

viravirii na mshiwa yakawerandiri na gwa kumtanga.

13 Wantu yawaweriti sambira kuhowa wazyumiti mana niwatangiti,

niwatenditi wakenja wawoni kayi nemeru mumoyu.

14 Mashaka goseri kutenda yagafiruwa ndo gambira nguwu,

na kutenda yagaminika ndo gambira lihabiti na lijenjeri.

15 Kwa wanalwisi weriti masu gakuwalanguziya njira,

kwa vibyeketu weriti mtanga gwawu.

16 Kwa wahushu weriti tati gwawu,

niwatetiyiti wantu kwaugangamala kuteteya maheri ga wantu yaniwamanitindiri.

17 Halibisiya makakala ga wantu wakontola,

niwatenda wawalekiziyi malopola wawu.

18 Mashaka gangu ga kulikala hagongereki gambira muhanga

shakapanu niliholiti kuwera hahoweri munumba yangu.

19 Neni gambira mtera yaguyalikiti mishigira mumashi,

na pashiru mangami galoviya ntambi zyakuyi.

20 Uweru wangu hawuweri syayi kwaneni,

na makakala gangu gapungulwandiri.

21 Shaka ashi wantu wampikiniriti kwa litumbiru,

walikala jii kuhepera shantakula.

22 Pamaliriti kutakula waheriti shakongera,

wapikaniliti kila shisoweru shantakuliti na kushiholera.

23 Wantu wahepeleriti neni gambira yawahepera mvula,

waweriti gambira wantu yawaheperiti shaka mvula ya kuyalira.

24 Pawatwezikiti niwatenditi waweri na nemeru,

ulangala wa sheni shangu uwatenda wanemeleri.

25 Niwalongoleriti kwa kuwalogoziya njira.

Weriti kwawu gambira mfalumi pakati pa mashonta gakuyi.

Gambira mtu yakawazyangazyanga wantu yawadaya.