1 Shakapanu Ayubu kankula.

2 Mpikaniri weri vyaniwagambira,

na panu hamuweri watanga kwaneni

3 Muhepeleri, naneni hantakuli

na pantakula kala mwendereyi kumbeziya.

4 Nimlalamikirandiri muntu.

Toziya nana shintu shashintenda nyamali.

5 Mndoli, namwenga hamulikangashi,

na ali haliwatendi mnyamali.

6 Panilihola yagampatiti ntira,

na nshimba yangu yankulendemera kwa lyoga.

7 Ntambu gaa wakontola wankali wakulikala?

Hashi makakala gawu gongereka mpaka muwuzewi?

8 Wawawona wana wawu pawawera na wazukulu,

na wiwuka wawu pawakula.

9 Kwa womberi kila shintu sha ponga pota lyoga,

Mlungu pota kawakomangi.

10 Wang'ombi wawu woseri wongereka,

walela pota ntabiku yoseri.

11 Wana wawu washinigashiniga gambira shipinga,

na wana wawu wavina msambu,

12 Wimba agawu pawagomba ngoma na vingutinguti

na kusekelera lizyiwu lya filimbi.

13 Wantu wakontola wawera na ponga

wahowa pota kutabika.

14 Wamgambira Mlungu nagutushenyiya!

Tufirandiri kuvimana shagufira gwenga.

15 Mlungu Yakana makakala ndo gaa ata tumtenderi?

Twankupata shishi patumluwa?

16 Womberi walihola kuwera na mpatiru kulawilana na weni,

kumbiti neni napamuherandiri na womberi.

17 Hashi mara ninga guwona ga wakontola wakala makaliru matali?

Guwona koo Mlungu kawalaga?

Ama kawagamiziya kwa maya gakuyi?

18 Ata hangu wagulusiwi gambira mihamba miyuma,

waweri gambira miwawi yayitolwa na lyega!

19 Mwenga mtakula, Mlungu kawatulira wana wawu makomangu ga wantu wakontola awa.

Kumbiti neni ntakula Mlungu kawawuziliri wantu weni, su wapati kuvimana!

20 Wakontola wawoni weni pawagamira,

guwaleki waoni weni nkalaliru ya Mlungu Yakana Makakala.

21 Mana wakontola pawahowa hapawalisheri shanashiwapati wiwuka wawu?

Mashaka gawu pagasoka upeleru.

22 Hashi, muntu kaweza kumfunda Mlungu umani,

Mlungu mweni hakawatozi yawalikala pasipanu?

23 Muntu kahowa pakawera na makakala gakuyi goseri,

pakawera na manemu na ponga,

24 kamema lipaki nduu munshimba,

na mihonju yakuyi payiwera yankali makakala.

25 Yumonga kahowa na hinginiku nentu mumoyu,

pakawera kenilawaliri shoseri shiherepa.

26 Hangu, woseri wahowa na kufintirwa,

woseri wagipikirwa na wampekenyi.

27 Mpikaniri! Neni nigamana maholu genu goseri,

na mipangu yenu yankumbeziya.

28 Pa mkosiya, ya koshi numba ya mkulu?

Yakoshi numba yakalikaliti mkontola?

29 Kumbiti memuwakosiyi yawapita njira,

na memfiruwi kuwapikanira mirandu yawatakula.

30 Hashi mkontola kawusiwa su mahalibisiya nagampata

na kaponiziwa lishaka lya nkalaliru!

31 Gaa yakafira kutakula madoda ga muntu mkontola,

ama yakamwuzilira kwa goseri gakagatenditi?

32 Pakatolwa kujegwa mulisembi,

wantu hawatulwi waliloleri lisembi lyakuyi

33 Wantu wavuwa wamfata kumbeli

na wamonga wavuwa wamlongolera pakafintirwa, litapaka lisulusiwa pampindi pakuyi.

34 Muweza hashi mwenga, kunkolamawoku kwa uzigizgi wenu?

Mawankulu genu gahera shoseri ila mpayu.