1 Shakapanu Ayubu kamwankula Elifazi. 2 Handa utama waneni mewupimwi, ntabiku zyaneni zoseri mezitulwi mushipimiru,

3 meviweri vitopa kuliku mhanga gwa kumpwani.

Ndo mana visoweru vyangu ndo vya vuluvulu.

4 Misali ya Mlungu insoma,

shimba yaneni ilanda usungu wakuyi.

Vitiliziya vya Mlungu vinfata.

5 Punda kawezandiri kulira pakawera na ntundu,

ama ng'ombi pakawera na maliwiziwu.

6 Hashi, shintu yashinogandiri washiliya pota munu?

Ama ufufu wa ligi una unoga woseri?

7 Nahera hamu ya shiboga,

na kila shintu shandiya shintenda ndwali.

8 Handa Mlungu mekampanani shilii shanimluwa.

Nfira Mlungu kanankuli luwa yangu,

9 Handa Mlungu mekafiri kumpondamponda, su mekandagi mweni!

10 Mekatendi hangu mekanyamaziyi moyu,

meweri na nemeru mukutama kukalipa handa weriti ndiri nivilema visoweru vyakuyi. Yomberi yakaweriti Mnanagala. 11 Kumbiti nahera makakala ga kwendeleya kulikala.

Ntambu gaa nendeleyi kulikala.

12 Hashi, neni wumbwitwi kwa mabuwi?

Ama nshimba yaneni inyawitwi kwa shaba?

13 Nakaka nahera makakala goseri ga kuntanga,

mana utanga woseri uwusiwa kwa neni.

14 Muntu yakawera muntabiku kafiriti nentu waganja wakuyi wamtangi, ata pakaleka kumguwira Mlungu yakana likakala.

15 Waganja waneni wampayira gambira lushemba,

wampayira gambira mifereji yahera mashi.

16 Nshemba azi zimema balafu

na seluji ilififa mngati mwakuyi

17 Kumbiti shaka sha livuki ilumbujuka,

na shaka sha mpepu nshemba ziyuma.

18 Miyanja ya washuwuza waleka njira pawasakula mashi,

wankuzyengeta kushiwala na kuhowera aku.

19 Wanamwanja kulawa Tema wagamira pawasakula mashi na yawashuwuza wa Sheba wankutumbira kupata mashi.

20 Wakalaziwa kwa kulitumbira hera,

wasoka kunshemba azi na kukalala.

21 Mwenga muwera gambira nshemba azi,

muwona mlandu gwa kutiriziya mwenga mtira.

22 Hashi, niwaluwiti mumpanani lifupu?

Ama mundavilili swinda su muntangi?

23 Ama mndopoli kulawa mumawoku ga mnkondu?

Ama mndopoli mumakakala ga yawamonera?

24 Munfundi, naneni hanyamali.

Mung'ambiziyi pankositi.

25 Visoweru vya nakaka vyana likakala likulu!

Kumbiti gamtakula gahera mana kwaneni.

26 Hashi, mlihora kuwera muweza kuvinyawa kayi visoweru vyantakuliti?

Visoweru vya muntu yakatwezukiti ndo liyega hera.

27 Mwenga mjera kuwagalambulira simbi su muwapati washiwa waweri wa mwenga,

na muwashuhuza waganja wenu su muweri na mpatiru.

28 Kumbiti vinu mundoli.

Neni hapeni ntakuli mpayu kulongolu kwamwenga.

29 Shondi mleki ukontola,

Vinu mndeki, mana neni na muheri.

30 Hashi, mlihola neni na mpayu?

Ama neni niwumanandiri utama?