1 Shakapanu Ayubu kankula.

2 Ntambu gaa gumtangiti yakahera uwezu!

Ntambu gaa gumlopoliti yakahera makakala!

3 Gumgambiriti shishi yakahera na luhala,

na kumaniziya umani waku!

4 Kumbiti gutakula aga toziya ya gaa?

Gaa yakakutenditi kutakula hangu?

Ndo uwezu wa Mlungu

5 Yawahowiti wa pasi aku wankulendemera,

mashi ga pasi na yawalikala aku gawatira.

6 Isi ya wantu yawahowiti yamwaziwu kulongolu kwa Mlungu.

Pahala padoda pagibikirwa ndiri.

7 Mlungu kazalira kushana pahala yapahera shintu,

na kayalika pasipanu pahala yapahera shintu,

8 kagatawa mashi kumawundi gaweri gazotopa,

na mawundi gapantikandiri kwa uzotopa wakuyi.

9 Kagibikira sheni sha lyezi

na kuyalika pampindi pakuyi kwa liwundi.

10 Katula mpaka pakati ya bahari ma mpindi,

mumpaka pakati pa paluwala na pashiru.

11 Mlungu pakalaviya liziwu lya kukalapira,

mpanda za mpindi zilendemera na kulikangasha.

12 Kwa makakala gakuyi kanyamaziyiti bahari,

kwa umani wakuyi kamwangamiziyiti njoka gwa bahari yawamshema Rahabu

13 Kwa mpumula yakuyi kagululiti lyera,

kwa liwoku lyakuyi kamlagiti njoka yakaguluka.

14 Aga ndo madidini hera mumatendu gakuyi,

ndo madidi hera gatupikanira kwa yomberi.

Gaa yakaweza kuvimana ukulu wa makakala gakuyi?