1 Shakapanu Ayubu kamwankula hangu,

2 Mpikinira mirandu gambira ayi ivuwa,

goseri gamntendera niliwoni weri neni gantabisiya.

3 Ndii upeleru wa visoweru vyahera mana?

Ndo shishi shashiwasonguziya kunankula?

4 Handa mwenga memuweri mtabika handa neni,

mewezi kutakula gambira mwenga

na kutunga visoweru vya upaya,

na kutikisiya mtuyi gwangu.

5 Meniwatendi muliwoni weri kwa visoweru vyangu,

na visoweru vyangu meviwatendi mnyamali mumoyu.

6 Kumbiti pantakula utama wangu hapawupoli,

na panyamala hapeni uwuki.

7 Mlungu kansakaziya,

kawalaga nakamu wantu wa numba yangu.

8 Kantenda nondi na awu ndo ukapitawu kwa neni.

Konda kwaneni kuwatenda wantu walihola nana vidoda.

9 Mlungu kakwalambula kwa maya na kunema,

kalanguziya maya gakuyi gakalipa,

toziya yomberi kawera handa mnkondu gwangu yakanjodolera masu.

10 Wantu wantakula kwa beziya na kunseka,

vipinga kwa vipinga vinzyengeta,

na kunkoma mapopu mmasaya.

11 Mlungu kandeka mbatwi na wankondu,

na kandula mmawoku ga wakontola.

12 Weriti nkala kwa ponga, kumbiti Mlungu kamegangameganga,

kankabiti na kumpantanga vipandi vipandi,

kantenditi shintu sha kugumira misali yakuyi,

13 kanasiliti misali kulawa kila uwega.

Kampanta figu pota lusungu,

na mwazi gwangu kita pasi.

14 Kendeleya kuntenda,

na kankomanga gambira mnkondu yakankalalira nentu.

15 Nilisonera nguwu ya mafafa, kulanguziya nankudaya

uweru wangu udodiziwa na mmadikudiku.

16 Sheni shangu shiwera shisheri toziya ya kulira,

ngopi zyangu ziwera ntitu pii,

17 Tembera ntendandiri ukontola kwa mawoku gangu,

na maluwa gangu kwa Mlungu ndo gaherepa.

18 Gwee pasipanu, nagugugibikira makosa gangu,

na kulira kwaneni kupalasiwa kila pahala.

19 Nana unakaka kuwera nanayu mkapitawu gwangu kumpindi,

gwa kundeteya ka kumpindi.

20 Waganja wangu wambeziya,

ndawa masozi kumluwa Mlungu.

21 Mepaweri Muntu mekanteteyi kulongolu kwa Mlungu,

ntambu yayitendeka pasipanu pakati pa wantu wawili.

22 Vinja vyangu visigala vididika,

naneni hang'endi aku kweni hapeni mbuyi.