1 Shakapanu Elifazi muntu gwa kulawa Temani kamgambira Ayubu. 2 Hashi muntu pakafira kuyowera na gwenga hagukalali?

Kumbiti gaa yakaweza kulilewelera kutakula?

3 Guliholi! Gwenga guwafunda wantu wavuwa na

kuwatanga wanyongi waweri na makakala.

4 Visoweru vyaku viwagolosiya yawatwezikiti,

guwatanga wantu awa walikali ntambu yayifiruwa.

5 Kumbiti vinu aga gakupata gwenga na gwenga guwuya kumberi,

gakushinkula na gwenga gutila.

6 Hashi, kumguwira Mlungu ndo litumbiru lyakundiri?

Na haki yaku, ndo litumbiru lyakundiri?

7 Guliholi vinu. Gaa yakahera likosa yakaweza kwaagamira?

Ama yawahera vidoda walaguwa?

8 Ntambu yanivimana neni,

yawayala ukontola

na udoda wabenanga galaaga,

9 Mlungu kawalaga awa kwa pumula yakuyi na kuwalaga kwa maya gakuyi.

10 Wakontola waguguma gambira simba kakalipa,

kumbiti menu gawu gamegangwa.

11 Simba yakawera na makakala kafuwa kwa kukosa mawinga,

na wana woseri wa simba mdala wapalasiwa.

12 Lishaka limu, ng'ambiritwi shisoweru kwa bada,

naneni mpikaniliti kuninitila kwakuyi.

13 Paweriti mmaholu ga pashiru,

shaka ashi mbota paziwakola wantu.

14 Weriti na lyoga nentu,

ata wera nankulendemela.

15 Upepu umputa pa sheni,

viri za nshimba yangu ziligolosiya.

16 Shintu shigoloka jii kulongolu kwaneni,

panishiloliti nishimanitindiri nakamu.

Kuweriti na mwoneku tunga kulongolu kwa neni, kuweliti jiii, shakapanu mpikaniriti liziwu.

17 Muntu kaweza kuwera mwaminika kuliku Mlungu?

Muntu kaweza kuwera kaherepa kuliku muwumba gwakuyi?

18 Handa Mlungu kawawona malaika wakuyi,

ata malaika wakuyi wa kumpindi kuwawona wana likosa,

19 ndo mala ninga nentu ya walii yawalikala munumba

za litapaka lya ukaka lyeni lyanjiru lyakuyi lya mumadikudiku, weni waposholwaposholwa gambira wampekenyi!

20 Mandawila tuwela wakomu na shaka sha pamihi pashiza kumbiti pota wantu kuviman tuweza kuhowa pamihi,

kwahera muntu yakaweza kuvimana!

21 Vyoseri vyatuwera navi haviwusiwi,

womberi wahowa kayi pota kuwera na luhala.