1 Moyu gwangu gulendemela kulawirana na aga,

na kuguluka kulawa pahala pakuyi.

2 Mpikaniri kulindimira kwa liziwu lya Mlungu,

na mwunguurumu gwa liziwu kulawa mumulomu mwakuyi.

3 Kalulekaziya luweli pasi pa mpindi yoseri,

lumeta lwakuyi lueneya pembi zoseri za pasipanu.

4 Shakapanu liziwu lyakuyi liguguma,

liziwu lya Mlungu liguguma kwa uweru,

na shaka shoseri ashi lumeta lumetameta.

5 Mlungu katenda lupanta lya kulikangasha kwa liziwu lyakuyi,

katenda mirandu mikulu yatuwezandiri kuyimana.

6 Kayigambira seluji, gutuluki pasi pa isi,

na lufolufolu na mvula, gutowi kwa makakala.

7 Katata mahengu gakila muntu,

su wantu woseri wavimani mahengu gakuyi.

8 Shakapanu wakanyama wawuya mwawalififiti,

na wasigala mumpanga zawu.

9 Lipuga livuma kulawa kwaliyanja,

na mpepu ikalipa kulawa mluhanja lwakuyi.

10 Kwa pumula ya Mlungu balafu ilawira,

sheni sha mashi galibata kalongola.

11 Mlungu kamemiziya mawundi lifolufolu litopa,

mawundi gapalasiya lumeta lwakuyi.

12 Kwakulagalira kwakuyi mawundi na lupanda vizyengetazyengeta aku na kulii,

katenda kila shintu shakalonga,

shitendeki mupasipanu pa vintu vyakaviwumbiti.

13 Mlungu katenda mafiru gakuyi pasipanu,

gaweri toziya ya kuwakomanga wantu,

ama kulanguziya ufiru wakuyi.

14 Gunyamali Ayubu! Gupikaniri makangashu ga Mlungu.

15 Hashi, guvimana Mlungu ntambu yakalagalira,

na kutenda lumeta lwa mawundi lung'eleng'eti?

16 Hashi, guvimana mawundi ntambu yagayeruka kuliyera,

Ndo mahengu ga kukangasha ga ulii yakawera mwaminika gwa umani.

17 Shaka liyega lya livuki kulawa kusika,

kwahera luhamba lwankuguluka pampindi.

Nshimba yaku yanalivuki nentu kwa nguwu yaguvaliti,

18 Hashi, guweza kuziyalika mpindi handa yomberi

ziwera zikamala gambira shiloleru sha shaba shashisugulwa?

19 Ayubu gutufundi shashifiruwa kumgambira Mlungu,

mana ntakulu zyetu zalupalaherandiri, twa mluwindu.

20 Weza hashi kutakula na Mlungu.

Hashi nimpanani lupenu lya kwagamiziwa

21 Vumu wantu wawezandiri kuwona potakufifa,

Mshenji gulififa kumberi kumawundi,

na lipuga lifyagira liyera.

22 Mng'eleng'eta guherepa gulawira kushana,

Mlungu kazyengetwa na uweru wa kutiliziya.

23 Mlungu yakana likakala yatuwezandiri kumsegelera,

uwezu na waminika wakuyi ndo mkulu,

kamema uheri pota kapotuziya haki nakamu.

24 Su wantu woseri wamtira Mlungu,

yomberi kamsherandiri muntu yoseri yakana mtiti.