1 Guloli goseri aga nigawona.

Makutu gangu gapikinira na kuvimana.

2 Goseri yamugamana, neni viraa nigamana.

Kwahera shintu shamushimana shanishimanandiri neni.

3 Kumbiti nananfiru ya kutakula na Mlungu yakana likakala,

nfira kuliteteya kulongolu kwa Mlungu,

4 Kumbiti goseri gamtakula kwa neni ndo mpayu,

mwenga ndo waganga yamponiziyandiri.

5 Mbaka mnyamali nakamu, mimuwoneki handa mwana luhala!

6 Vinu mmpikaniri shantakula neni,

mpikaniri ntambu yaniliteteya.

7 Hashi, mlishera mwankumtakulira Mlungu kwa kutakula mpayu?

Mlihola kulonga kwa kuzyanga kumfiriziya Mlungu?

8 Hashi, mjera kumpendeleya Mlungu?

Hashi, hammuteteyi Mlungu kushotera motu?

9 Hashi, pakawakagula mwenga hamponi?

Ama mlihola muweza kumpayira Mlungu ntambu yamwazyanga wantu wamonga?

10 Nakaka yomberi hakawakalapiri

handa pamlanguziya upendelewu kwa bada.

11 Hashi, ukulu wakuyi uwatiliziyandiri mwenga? Hashi, mumtirandiri?

12 Mitakulu yenu yahera mana handa malivu,

visoweru vyenu vyahera makakala na mana.

13 Mnyamali, naneni yoweri.

Yalifirakundawira lindawiri.

14 Neni nakala

kwa goseri yanagandawiri,

15 Ata Mlungu pakandaga, nahera lya kupotiziya,

Nakaka hanimgambiri neni nahera makosa.

16 Ayi ndo hayiweri kupona kwaneni,

mana yakamguwirandiri Mlungu hapeni kasegeleri kulongolu kwakuyi!

17 Mpikaniri weri visoweru vyangu na vyantakula visoki mmakutu mwenu.

18 Kumbiti vinu mirandu yangu niyitula kala weri

mana nahera makosa.

19 Gaa hakavilemi visoweru vyangu?

Handa kwanayu neni hanyamali na kuhowa.

20 Mlungu gwangu, guntenderi mawili aga,

na neni hapeni nilififi patali na gwenga.

21 Gumbusilili liwoku lyaku lyalinkomanga,

naguleki kuntiliziya.

22 Su gutakuli na neni hanikwankuli.

Ama nanji neni, nagwenga gunankuli.

23 Hashi makosa na vidoda vyangu ndo vininga?

Gunanguziyi makosa na vidoda vyangu.

24 Hashi gulififa nanikuwona

na ntambugaa guntenda handa mnkondu gwaku?

25 Hashi, hagulutendi luhamba lukutiri gambira luhamba liyuma lwaligulusiwa na lyega,

ama kuyitugiziya miwawi?

26 Gwenga gulaviya mirandu itama kulongolu kwaneni,

na kumpapiziya vidoda vya untemba wa neni.

27 Guntawalira minyololu mumagulu,

kugasungulira maleka ga njira zyangu zoseri,

na lwayu zyangu guzitulira upeleru.

28 Hangu muntu kagamira handa shintu shashiwoliti,

gambira nguwu yayiliyitwi na wamehi.