1 Ntambu gaa Mlungu Yakana Makakala katulandiri shipindi sha kutoza,

ntambu gaa yawamumana washimanandiri shipindi shakuyi ashi?

2 Wantu wawusiya vimaniziwu vya mbaka za malambu,

na wamonga wiwa mifugu na kuyifyota.

3 Wawapokanga washiwa punda wawu,

wamtula poni ngo'mbi gwa mkenja.

4 Wawalewelera wahushu nawapata vyawafira kupata,

wawatenda wahushu wawatugi.

5 Hangu wahushu wawera handa punda gwa kuntundu

wahushu wasakula kuntundu

su wapati shoseri sha kuwafyota wana wawu.

6 Wahushu wankulisolera masigala ga mabenangu mumalambu,

wankusola mumalambu ga mizabibu ya wakontola.

7 Pashiru poseri kagonja shivula pota nguwu

shaaka sha mpepu wahera sha kuligipikira.

8 Walowa kwa mvula ya kumigongu,

walififa mumatalabuwi nawalowa.

9 Wakontola wiwa wanonu mumaweri ga mawu gwawu,

Wamonga wawatula muuwandana wana wa wahushu.

10 Wana awa watendwa wagendi pota nguwu,

pawapapa nganu agawu pawawera na njala,

11 pawawanyawira lipaki lyawu lya mzayituni wakontola,

ama kukama divayi pota kuyisumata.

12 Kulawa kumjini kulira kwa yawahowiti kupikinika,

na yawatenduwitwi wabotanga kuluwa utanga,

kumbiti Mlungu kapikanirandiri nakamu luwa zawu.

13 Kwana wamonga wakontola yawafirandiri kulangala,

yawazimanandiri njira za kulangala

na wafirandiri kuzifata njira zakuyi.

14 Yakalaga kimuka mandawira putiputi,

su kugenda kuwalaga wahushu na yawahera shintu,

na pashiru papiza, lihengu lyakuyi ndo kwiwa.

15 Mhumba kahepera luwindu lwingiri, pakalonga kwahera yanakamoni,

shakapanu kafifa sheni shakuyi kwa nguwu.

16 Pashiru wantu wabomola numba, su wiwi

kumbiti paluwala walitatila mnumba,

na wafirandiri wawoneki mukulangala.

17 Kwa womberi luwindu tototu ndo mandawira yawu,

na luwindu ndo ganja gwawu.

18 Kumbiti mtakula,

wakontola watolwa kalongola na malawa,

pahala pawu pakulikala pasigala kuwera isi ipangirwa,

kwa hera yakagenda kumalambu gawu ga mizabibu.

19 Handa seluji ntambu yayimung'unyuka mu livuki na mushipindi sha kuyuma

ndo isi yawalikala wantu yawahowiti ntambu yayiwanyasula wakontola.

20 Toziya mlera gwawu kawalwaluwa wantu awa,

wantu wakontola hapeniwaholwi kayi.

Hangu ndo ntambu yawamegwa gambira mtera.

21 Wakontola wawapunja wadala yawahera wana.

Pota kuwatendera maheri wadala wakenja.

22 Mlungu, kwa makakala gakuyi kawagamiziya wana uwezu,

Mlungu pakawakomanga womberi watwezuka na kuhowa.

23 Kawaleka wakontola waliwoni wana ponga,

kumbiti masu gakuyi galolalola migenderanu yawu.

24 Wakontola wanampatiru shaka shifupi hera, shakapanu wagamira,

wayuma na kuwera tifutifu handa lihambi,

walumbatulirwa kutali gambira mikunguwi ya nganu.

25 Gaa, yakaweza kutakula kuwera neni shantakula shanakakandiri

na kulangaziya kuwera visoweru vyangu vyanakakandiri?